Paipel AISEA 23
23
Kapasen osuni usun Tirus me Siton
23.1-18
Iei än Kot kapas usun Tirus: Oupwe kekechü, ämi säla won ekewe sein amömö, pun Tirus a tala. Iwe, esap chüen wor imw won, esap pwal chüen wor lenien ilen sip. Ei pworaus a torikemi, lupwen oua sai seni ewe fanü Saipiros. Is 26.1–28.19; Sow 3.4-8; Am 1.9-10; Sek 9.1-4; Mat 11.21-22; Luk 10.13-14 Oupwe ngüngüres, ämi chon amömö mi nom aroset. Nöümi chon angang ra sai won matau mi watte, ra uwato remi wiich seni Sihor me resin ewe chanpupu Nil. Leniemi a eu lenien amömö fän iten chon fanüfan meinisin. Kopwe itengau, Siton en telinimwen lematau mi pöchökül, pun ewe matau a apasa, “Üsap cheuchen fam, üsap pwal nöünöü. Üsap foleni alüal, üsap pwal foleni föpwül.” Ekewe chon Isip mwo nge repwe fokun riaföü, lupwen repwe rongorong pworausen talan Tirus. Oupwe saila Tarsis, oupwe kekechü ämi mi nonom aroset. Ifa usun, iei ämi telinimw mi uren pwapwa, a nom seni ekewe fansoun lom? Iei ewe telinimw aramasan ra sai toau pwe repwe nonom ekis meinisin? Iö a ekiekietä ei feiengau won Tirus, ewe telinimw mi ineti mwärin king? An chon amömö ra samol pwal aramas mi iteüöch me won unusen fanüfan. Iwe, ewe Samol mi Unusen Manaman a ekiekietä ewe feiengau, pwe epwe awesi ar lamalamtekia ren mine ra föri, epwe pwal atekisona chokewe mi iteüöch won fanüfan. 10 Oupwe föri tanipi won fanüemi, ämi chon Tarsis, pun esap chüen wor lenien ilen sip. 11 Iwe, Kot a aitiela pöün won matau o achecha ekewe mwü. Ewe Samol mi Lapalap a allük pwe ekewe imw mi pöchökül lon Kanaan repwe tala. 12 Iwe, a apasa, “Esap chüen wor ämi mwänek, ämi chon Siton mi nom lon riaföü. Ikamwo oupwe sai won sip o saila Saipiros, ousap pwal tongeni kinamwe me ie.”
13 Nengeni ewe fanü Papilon. Sap chon Asiria, nge chon Papilon ra föri pwe Tirus epwe eu lenien manmwacho. Ra aüetä ar imwen maun mi tekia, ra ataela ekewe imwen maun mi pöchökül a atatakisi unusen ewe telinimw. 14 Oupwe kekechü, ämi säla won ekewe sein amömö, pun ämi telinimw mi pöchökül a tala. 15 Lon ena fansoun aramas repwe manlükala Tirus lon fik ier, iei ükükün ierin manauen eman king. Nge lesopolan ekewe fik ier epwe fis ngeni Tirus usun mine a mak lon ewe köl usun eman fefin mi amömö inisin fän iten lisowu,
16 “Kopwe angei noum kitar o fetalfeil lon ewe telinimw,
en fefin mi amömö inisum fän iten lisowu, aramas ra malükükala.
Kopwe ngiöch le köl o eäni chomong köl,
pwe ekewe mwän repwe chechemenuk.”
17 Iwe, mürin ekewe fik ier ewe Samol mi Lapalap epwe föri pwe Tirus epwe kaüsefäl. Epwe liwinsefäliti an angangen amömö ngeni ekewe mwü won unusen fanüfan. 18 Iwe, chon ewe telinimw repwe eäni asor ngeni ewe Samol mi Lapalap winnen ar amömö, nge resap ionifengeni o iseis chök. Iwe, ren winner kewe repwe atufichi chokewe mi angang ngeni ewe Samol mi Lapalap, pwe repwe kamö ener mongö mi chomong me üfer mi ling.

23:1: Is 26.128.19; Sow 3.4-8; Am 1.9-10; Sek 9.1-4; Mat 11.21-22; Luk 10.13-14