Paipel APAKUK 2
2
Kot a pälüeni än Apakuk iotek
2.1-5
Ngang üpwe feitä won ai lenien mamas o ütä won imwei imw tekia. Üpwe asüküsükü met Kot epwe üreniei pwe üpwe apasa, pwal mine epwe pälüeni ngeni ai siö. Mürin ewe Samol mi Lapalap a pälüeniei o apasa, “Kopwe makeetiu mine üpwe pwäri ngonuk won och lenien mak, nge epwe fokun fat, pwe chokewe mi sä repwe mecheres le aleani. Pun mine üpwe pwäri ngonuk epwap pwönüetä lon eu fansoun mi kefilitä. Nge fansoun an epwe pwönüetä epwe fokun müttir, nge esap chofana. Are epwe mang le pwönüetä, kopwe chök witiwit. Epwe fokun pwönüetä, nge esap mang. Ipr 10.37 Nengeni, ätewe a lamalamtekia, esap wenechar lelukan. Nge ekewe chon pwüng repwe manau ren ar lükü Kot. Rom 1.17; Kal 3.11; Ipr 10.38 Ellet, wöümong och mi atuputup. Ätekewe mi mochenia ra lamalamtekia o sarawaraw, resap fokun menemen usun mäla. Iei mine ra maun ngeni chomong mwü o liapeniir fän püsin iter.”
Kapasen feiengau fän iten ekewe chon pwüngingau
2.6-20
Iwe, ekewe chon kuf repwe chietä echö kölün ämängau, repwe turunufasei ewe chon akufuur o apasa, “Feiengauom, en mi achukuchukätä mine esap om o pisekisekila ren om eriani seni chon liwinimang mine ra liwinimang ngonuk. Ifa ükükün fansoun än ei lapalap epwe fis?” Ifa usun, ekewe chon liwinimang ngonuk resap müttir ütä, resap pwök o föri mine kopwe chechech ren? Mürin en kopwe wiliti liaper. En ka soläni pisekin chomong mwü. Nge iei chokewe mi chüen manau seni ekewe mwü meinisin repwe soläni pisekum, pun ka nimanauei ekewe aramas o föri angangen mwänewüs ngeni chon fanüfan, ngeni ekewe telinimw me chokewe mi imweimw lor.
Feiengauom, en mi angei om win fän pwüngingau fän iten chon leimwom o aüetä imwom won eu leni mi tekia pwe esap tori och feiengau. 10 Nge om raw a chök awarato säw won chon leimwom. Ren om arosala chomong mwü, ka chök püsin awarato feiengau womw. 11 Pwal föün etippen ewe imw repwe kökkö o üpälü ngonuk, nge irälapan kewe repwe elliwini ewe kökkö.
12 Feiengauom, en mi aüetä eu telinimw fän nimanau o anüküchara fän föföringau. 13 Iei fän letipen ewe Samol mi Unusen Manaman, pwe än ekewe aramas angang epwe karala, nge än chon ekewe mwü angang weires epwe solapmwäl. 14 Nge än chon fanüfan silei lingen ewe Samol mi Lapalap epwe alolol usun matau a alolol. Ais 11.9
15 Feiengauom, en mi aünü ngeni chon arum wain mi nofitfengen me om lingeringer tori repwe pulas ren, pwe kopwe äsäweer o aitengaueer. 16 Iei kopwe pwölüla ren säw, nge sap ren ling. Kopwe püsin ün o taroporopfetal. Ewe Samol mi Lapalap epwe aünü ngonuk püsin om kapen feiengau, nge om ling epwe wiliti säw. 17 Ka pöküetiu ewe wöllapen Lepanon, iei aramas repwe pwal pökuketiu. Ka niela ekewe mönün ie, iei ekewe man repwe fokun aniuokusuk. Ei epwe fis pokiten ka nimanauei ekewe aramas o föri angangen mwänewüs ngeni chon fanüfan, ngeni ekewe telinimw me chokewe mi imweim lor.
18 Met lomoten eu uluulun anümwäl? A chök och mettoch eman aramas a püsin auluulu. Esap tongeni pwäri ngonuk och ngei chofana echök. Met feiöchün ngeni ewe chon föri pwe a lükü eu uluulun anümwäl esap tongeni kapas? 19 Feiengauom, en mi apasa ngeni efoch mwüch: Kopwe nennela! ika ngeni eföü fau esap tongeni mwökütüküt: Kopwe pwätä! Ifa usun, eu uluulun anümwäl a tongeni pwäri ngonuk och? A tongeni pwölüpwöl ngeni kolt me silifer, nge esap fokun wor ngasangasen manau lon.
20 Ewe Samol mi Lapalap a nom lon imwan mi pin, nge chon fanüfan meinisin repwe mosonosonola me fän mesan.

2:3: Ipr 10.37

2:4: Rom 1.17; Kal 3.11; Ipr 10.38

2:14: Ais 11.9