Nöün Paulus Toropwe ngeni ekewe Souläng lon
Rom
Kapas akom
I. Chon makkei ei toropwe: Ewe soukünö Paulus.
II. A mak ngeni iö? Ngeni ekewe soulängin Rom.
III. Itelapemongen ei toropwe: Ach küna pwüng ren ach lükülük me ach küna pin ren Ngünmifel.
IV. Kapas aüchean ei toropwe: Än Kot akot fän iten än aramas repwe küna Manau.
V. Masouen ei toropwe: Paulus a makkei ei toropwe ngeni ekewe souläng lon ewe mwichefelin Rom pwe repwe amolätä fän iten an epwe churiir lon Rom. Än Paulus akot fän iten an epwe angang lein ekewe souläng lon ekoch fansoun, nge mürin epwe feila Spain ren ar alilis ngeni. A makkei ei toropwe pwe epwe awewei usun wewen ewe lükülük lon Kraist me lapalapen föförün lon manauen souläng. Masouen än Paulus afalafal lon ei toropwe a fokun unusöch lap seni makkean kewe toropwe meinisin.
Mürin än Paulus kapong ngeni ekewe soulängin ewe mwichefel lon Rom, pwal mürin an üreniir pwe a iotek fän iter, a makkeetiu itelapemongen ei toropwe: “Ewe Pworausen Manau a pwärätä usun än Kot akot fän iten än aramas repwe küna pwüng me ren. Ei a fis ren lükülük seni lepopun tori lesopolan.” (Sopw 1.17)
Mürin Paulus a sopwela le awewei kapas aüchean ei toropwe: Aramas meinisin, chon Juta me chon lükün Israel, ra nom fän nemenien tipis, iei mine ra osun ar repwe küna pwüng me ren Kot. Aramas ra chök tongeni küna pwüng me ren Kot ren ar lükü Jesus Kraist. Mürin Paulus a awewei ewe manau mi fö ren eufengen me Kraist mi fis ren ewe chiechifengen mi fö lefilen aramas me Kot. Chokewe mi lükü a wor ar kinamwefengen me Kot, pun ewe Ngünün Kot a angasa ir seni ewe manamanen tipis me mäla. Lon sopun 5-8 Paulus a pwal awewei aüchean än Kot Allük me manamanen ewe Ngünün Kot lon manauen chon lükü. Mürin Paulus a achocho le awewei usun än ekewe chon Juta me ekewe chon lükün Israel chufengen lon än Kot we akot fän iten aramas meinisin. A apasa, pwe än chon Juta oput Jesus, iei eu kinikin lon än Kot akot fänäsengesin an epwe nukieto aramas meinisin, pwe än Kot ümöümöch epwe toriir lon Jesus Kraist. Paulus a pwal lükü pwe ekewe chon Juta resap oput Jesus fansoun meinisin. Lesopolan Paulus a makkei usun met eman souläng epwe föri lon manauan, lapalan usun än eman souläng epwe tongei aramas. A pwal awewei usun ach angang ngeni Kot, usun wisen souläng ngeni mwü, pwal usun wiser ngeni eman me eman aramas, pwal usun ewe mwelien letipen aramas. Amüchülan ei toropwe a pworaus usun püsin manauan, pwal usun an mwareiti Kot.
VI. Tettelin masouen ei toropwe:
Kapas akom me itelapemongen lon ei puk 1.1-17
Aramas meinisin ra osun ar repwe küna manau 1.18–3.20
Än Kot angangen amanaua aramas 3.21–4.24
Ewe manau mi fö lon Kraist 5.1–8.39
Än Kot akot ngeni chon Israel 9.1–11.36
Usun manauen souläng 12.1–15.13
Kapasen lesopolan me än Paulus kapong 15.14–16.27
1
Än Paulus kapong me wisan
1.1-7
Ngang Paulus, eman chon angangen Kraist Jesus, üa kö pwe üpwe eman soukünö mi imwüla fän iten ai üpwe arongafeili än Kot we Pworausen Manau. Ei Pworausen Manau Kot a fen pwon me lomlom ren nöün kewe soufos usun a fen mak lon ekewe Toropwe mi Pin. A kapas usun Nöün we, ach Samol Jesus Kraist: Lon an wiliti aramas, a uputiu lon tettelin eman mwirimwirin Tafit. Nge lon pekin ngünün mi fel a pwä fän manaman mi lapalap pwe i Nöün Kot, ren an manausefäl seni mäla, i Jesus Kraist ach Samol. Ren Jesus Kraist, Kot a ngeniei ewe ümöümöch, pwe üpwe wiseni ewe wisen soukünö fän itan, pwe üpwe emweni aramasen ekewe mwü meinisin pwe repwe lükü i o aleasochis ngeni. Pwal ämi mi nonom lon Rom, oua pachelong lein chokewe Kot a köriir pwe oupwe nöün Jesus Kraist. Iei mine üa mak ngenikemi meinisin mi nom lon Rom, ämi chokewe Kot a echenikemi o körikemi pwe oupwe chon pin: Kot Samach me ach Samol Jesus Kraist epwe ngenikemi ümöümöch me kinamwe.
Eu iotekin kilisou
1.8-15
Ngang üpwe akomwen kilisou ngeni ai Kot ren Jesus Kraist fänäsengesimi meinisin, pun aramasen unusen fanüfan ra rongorong usun ämi lükülük. Kot, ewe eman üa angang ngeni ren unusen letipei ren ai afalafala ewe Pworausen Manau usun Nöün we, i nei chon pwärätä pwe üa fokun chechemenikemi 10 lon ai iotek fansoun meinisin. Üa tüngor ngeni Kot, pwe are fän letipan, epwe mwüt ngeniei pwe üpwe feila remi lon ei fansoun. 11 Pun üa fokun mochen churikemi pwe üpwe ngenikemi och feiöchün ngün pwe oupwe pöchökülela, 12 wewen, pwe ämi me ngang sipwe apöchökülafengenikich ren ach lükülük.
13 Ämi pwii kana, oupwe fokun chechemeni pwe fän chomong üa akota ai üpwe churikemi, nge a chök wor sokun epet a pineei fansoun meinisin ai üpwe feila remi. Ngang üa mochen asoulängala ekoch leimi, usun üa pwal föri me lein ekewe ekoch chon lükün Israel. Föf 19.21 14 Pun mi wor wisei ngeni aramas meinisin, ngeni ekewe mi mirit me ekewe resap mirit, ngeni ekewe mi tipachem pwal ekewe mi tiparoch. 15 Iei mine üa fokun mochen afalafala ewe Pworausen Manau ngenikemi mi nonom lon Rom.
Manamanen ewe Pworausen Manau
1.16-17
16 Üsap säwäsini ewe Pworausen Manau, pun iei ewe manamanen Kot mi tongeni amanaua chokewe meinisin mi lükü, a akom ngeni ekewe chon Juta, nge mürin pwal ngeni ekewe chon lükün Israel. Mark 8.38 17 Pun ewe Pworausen Manau a pwärätä usun än Kot akot fän iten än aramas repwe küna pwüng me mwan. Ei a fis ren lükülük seni lepoputän tori lesopolan. Usun ewe toropwe mi pin a apasa, “Ewe aramas mi küna pwüng mwen mesen Kot epwe manau ren an lükülük.” Ap 2.4
Än chon fanüfan tipis
1.18-32
18 Än Kot song a pwä seni läng won tipis meinisin me föföringauen aramas, ra pinei ewe let ren ar föför esepwüng, pwe aramas resap silei. 19 Pun mine aramas ra tongeni silei usun Kot a fat ngeniir. Püsin Kot a fen afata ngeniir. 20 Esap wor eman aramas a tongeni küna Kot. Nge aramas ra tongeni silei usun Kot ren ekewe mettoch i a föri. Pun seni ewe fansoun Kot a föri fanüfan ra fokun tongeni weweiti pwe an manaman a nom tori feilfeilachök, pwe i wesewesen Kot. Iei mine esap wor än aramas künetipingen. 21 Ikamwo ra silei usun Kot, nge resap asamolu i usun Kot, resap pwal kilisou ngeni. Ar ekiek esap fokun wor lomotan, nge letiper mi wewemang a uren rochopwak. Ef 4.17-18 22 Ra apasa pwe ra tipachem, nge ra tiparoch. 23 Akasiwilin ar fel ngeni ewe Kot mi manau feilfeilachök ra fel ngeni uluulun anümwäl mi för lon liosun aramas mi mä, ika liosun mansüsü, manfetal me mantötö. Tut 4.16-18
24 Iei mine Kot a asechala ekei aramas pwe repwe föri föför mi limengau ren mochenian letiper. Ra föri mettoch mi asäw lefiler eman ngeni eman. 25 Ra akasiwili mine a let usun Kot ngeni mine a chofona. Ra fel ngeni mine Kot a föri o angang ngeni, nge resap fel ngeni Kot ewe Chon Föri mettoch meinisin, i ewe sipwe mwareiti tori feilfeilachök! Amen.
26 Pokiten ar föri iei usun, Kot a asechiirelong lon sokun mocheniangau mi fokun asäw. Ekewe mwo fefin, nge ra sorei pwükütän ekewe föför mi öch ngeni inisiir ngeni sokun föför esap öch ngeniir. 27 Pwal ina chök usun ren ekewe mwän, ra likitala föför mi öch lefilen mwän me fefin o ra opucherela ren sokun mocheniangau fengen lefiler. Mwän ra föri sokun föför mi fokun asäw lefiler eman ngeni eman, nge lesopolan ra püsin aworato liwiningau wor ren ar föför mi ngau.
28 Pokiten ekei aramas resap fokun mochen amwöchü lon letiper mine ra silei usun Kot, i a asechiirela lon ngauen letiper, pwe ra föri sokun föför esap pwüng. 29 Ra ur ren sokopaten föför mi ngau, föför esepwüng, tipemong, kirikiringau. Ra uren lolowo, niela aramas, fiu, likatuputup, ekingau. Ra ngününgün, 30 ra kapasingau usun pwal eman, ra oput Kot, ra turunufas, ra lamalamtekia o sikesik. Ra chök ekieki sokun föför mi ngau. Ra lükümach ngeni semer me iner. 31 Esap wor mengiringirin letiper, resap apwönüetä ar pwon, resap eäni kirikiröch ngeni aramas ika eäni tong ngeniir. 32 Ra silei pwe Kot a apwüngala, pwe ekewe aramas mi föri ekei sokun föför repwe mäla. Iwe, resap chök sopwela le föri ekei sokun föför, nge ra pwal tipeeu ngeni ekewe aramas ra föri iei usun.

1:13: Föf 19.21

1:16: Mark 8.38

1:17: Ap 2.4

1:21: Ef 4.17-18

1:23: Tut 4.16-18