Paipel TUTERONOMI 32
32
Ämi läng, oupwe aüselinga ai kei kapas,
nge en fanüfan, kopwe rongorong mine üa apasa.
Amwo ai kapasen kait epwe püngütiu usun üt,
ai kapas epwe wüch usun amurenipwin,
epwe usun chimwo won ewe fetil mi pwüküfö,
pwal usun püngün üt won iräkis.
Pun üpwe asilefeili iten ewe Samol mi Lapalap.
Oupwe ingemwareiti tekian ach Kot.
 
I ewe achau, an föför ra unusen mürina,
pun an kewe al meinisin ra pwüng.
I eman Kot mi allükülük, esap wor an mwäl,
a pwüng o wenechar.
Nge ämi chon Israel oua föri föför mi ngau ngeni Kot.
Ousap chüen iteni nöün, pun a wor terimi.
Ämi eu täppin aramas mi ngau o rikirik.
Ifa usun, iei ämi kilisou ngeni ewe Samol mi Lapalap,
ämi aramas mi tiparoch o umwes?
Ifa usun, sap i sememi we mi förikemi,
a afisikemiitä pwe oupwe eu mwü.
Oupwe chechemeni ewe fansoun lom, oupwe ekieki usun ekewe täppin aramasen lom.
Oupwe aisini sememi, ir repwe aiti ngenikemi mine a fis.
Oupwe pwal aisini ekewe souakom, ir repwe apworausa ngenikemi usun ewe pworaus.
Lupwen ewe mi Unusen Tekia a ngeni chon ekewe mwü fanüer,
lupwen a aimwüfeseni ekewe aramas, a föri kiännin lefilen ekewe aramas
won ükükün iteiten nöün Israel kewe mwän. Föf 17.26
Nge a filätä ekewe mwirimwirin Jakop pwe ir repwe püsin nöün aramas.
10 Kot a küneer me lon eu fanü mi pön,
me lon eu leni mi pön o uren sokun wörüwör.
A pwelifeiliir o foleniir,
a tümwünüür usun chök fituken lon mesan.
11 Usun eman ikel a mamasa fasan o äkkäs asen nöün kewe apansüsü,
usun a ameresala pöükässin far o amwöchüür pwe repwe nom won,
a pwal uweeretä won pöükässin,
12 iei usun ewe Samol mi Lapalap a chök emweni nöün aramas.
Esap pwal wor eman kot ünükün.
13 A föri pwe ekewe mwirimwirin Jakop repwe nemeni ekewe lenien tekia won fanüfan
o amongöü ngeniir uän ekewe tanipi.
A amötü ngeniir chönün chunen seni lon achau,
pwal apüra seni lon achau mi pöchökül.
14 Kot a aünü ngeniir milik seni ekewe pwiin kow me sip.
A aochocha ngeniir kirisin ekewe nienifön sip me ekewe ätemwänin sip,
pwal fituken kow me ätemwänin kuuch seni Pasan,
a pwal amongöü ngeniir föün wiich mi fokun mürina.
Iwe, a aünü ngeniir wain seni chönün föün irän wain.
 
15 Nge Jesurun * wewen Jesurun Israel a kitinupula o rochongau,
a kitinupula, a wattela o misimis.
Mürin a likitala Kot ewe mi föri,
a turunufasei ewe Achau an Chon Amanau.
16 Iwe, chon Israel ra kupeti leluken Kot ren ekewe koten lükün,
ra asonga ren ar uluulun anümwäl mi anioput.
17 Ra asor ngeni anüroch, nge sap ir kot,
ra asor ngeni ekewe kot resap fokun sileer me mwan,
ngeni minefön kot ra kärän chök pwä,
sokun kot ar kewe lewo resap niueitiir. 1.Kor 10.20
18 Ra likitala ewe Achau mi nöüniir,
ra manlükala ewe Kot mi ngeniir manau.
 
19 Lupwen ewe Samol mi Lapalap a küna ar föför,
a song o pöütala nöün mwän me fefin.
20 Iwe, a apasa, “Üpwe amona mesei seniir o pii met sopolar.
Pun ir eu täppin aramas mi ngau,
aramas resap allükülük.
21 Ra kupeti lelukei ren eman kot sap i kot,
ra pwal asongaei ren ar uluulun anümwäl.
Iei mine üpwe kupeti leluker ren chokewe sap ir eu mwü,
üpwe asongeer ren eu mwü mi umwes. 1.Kor 10.22; Rom 10.19
22 Pun eu ekkei a ngetenget ren ai song,
epwe küri epin lenien sotup,
epwe kenala fanüfan me mine a mär won,
epwe pwal keni longolongun ekewe chuk.
 
23 Iwe, üpwe ionätä feiengau wor,
üpwe pwal eitala ai kewe föün esefich wor.
24 Repwe mäla ren echik,
repwe rosola ren pwichikar watte me mätter mi afeiengau.
Üpwe tinala rer manmwacho
me serepenit mi poison pwe repwe küür.
25 Iwe, aramas repwe mäla ren maun lon alen ekewe telinimw,
nge lon ekewe imw epwe fis niuokus watte.
Alüal me föpwül repwe rosola,
pwal mönükol mi chüen oup me chinlap.
26 Pwüngün ai ekiek pwe üpwe aroserela,
pwe esap wor eman epwe chüen chechemeniir.
27 Nge üa oput än chon oputeer tunosikesik,
pun repwe wewengau ren o apasa,
‘Püsin kich sa awinnakich, ei esap förien ewe Samol mi Lapalap.’
 
28 Iwe, chon Israel eu mwü esap wor chon öüreer,
esap wor ar mirit.
29 Are epwe wor ar tipachem,
repwe wewe ren o ekieki usun sopolar.
30 Pwota eman mwän epwe tongeni tapweri engeröü,
pwota ruoman repwe tongeni asüela engol ngeröü?
Ifa usun, esap fis ei pokiten ar Kot a amömörela,
pokiten ewe Samol mi Lapalap a asechirela?
31 Pun ekewe chon oputeer ra püsin silei
pwe ar kewe kot resap usun än chon Israel Kot.
32 Iwe, ar irän wain a feito seni ekewe irän wain lon Sotom, pwal seni ekewe tanipi lon Komora.
Ar kewe föün irän wain ra poison, umwur ra maras.
33 Ar wain a usun poisonun serepenit me natanaten sokun serepenit mi fokun afeiengau.
34 Ifa usun, ewe Samol mi Lapalap esap iseis ei lon an imwen iseis,
esap lokeelong lon an lenien iseis?
35 Iwe, ewe Samol mi Lapalap epwe ngeniir chappen ar föför
me liwiningauer lon ewe fansoun, lupwen pecher epwe mit.
Ränin ar feiengau a arap, ar kapwüng epwe warakai. Rom 12.19; Ipr 10.30
36 Pun ewe Samol mi Lapalap epwe apwüngü nöün aramas o tongeäsini nöün kewe chon angang,
lupwen a küna pwe esap chüen wor ar pöchökül,
esap pwal chüen wor eman lusun,
ese lifilifil ika ir amanau ika chon ngas. Kölf 135.14
37 Mürin, ewe Samol mi Lapalap epwe aisiniir,
‘Ia ra nom ie ämi kewe kot, ewe achau oua op fan?
38 Oua aochocheer kirisin ämi kewe asor
o aünü ngeniir wainin ämi asoren ün.
Repwe feito o alisikemi,
repwe pwal tümwünükemi.
 
39 Iei oupwe mefi pwe fokun ngang chök ewe Kot, esap wor eman kot ünüki.
Ngang üa niela, üa pwal amanaua, üa akinasa, üa pwal amoela.
Esap wor eman a tongeni ettiwu me lepei.
40 Pun üa aitietä pei läng o pwon fän akapel:
Mwo manauei mi nom rei tori feilfeilachök,
41 lupwen üa seimi nei ketilas mi mweriweriw
pwe üpwe eäni kapwüng,
ngang üpwe ngeni chon pälüeniei chappen ar föför
o apwüngü chon oputaei.
42 Woki kewe föün esefich repwe ün cha,
nei ketilas epwe ochoch fituk,
chan chokewe mi ninnila me chan chon oola,
pwal möküren samolun chon oputaei.’
 
43 Ämi chon ekewe mwü, oupwe fiti nöün ewe Samol mi Lapalap kewe aramas le meseik,
pun epwe apwüngü chokewe meinisin mi niela nöün chon angang
o ngeni chon ü ngeni chappen ar föför,
epwe pwal limeti fanüen nöün aramas seni tipis.” Rom 15.10; Pwär 19.2
44 Iwe, Moses me Josua nöün Nun we mwän ra feito o apasa kapasen ei köl ngeni ekewe aramas meinisin. 45 Nge lupwen Moses a wes me apasa ekei kapas meinisin ngeni chon Israel meinisin, 46 a pwal üreniir, “Oupwe iseis lon lelukemi ekei kapas meinisin üa pwäri ngenikemi ikenai, pwe oupwe tongeni eäniir allük ngeni nöümi, pwe pwal ir repwe tümwünüöchü le apwönüetä kapasen ei allük meinisin. 47 Pun ei allük esap fos pön ngenikemi, ngei fen manauemi. Oupwe aleasochisi pwe oupwe manauatam lon ewe fanü oupwe le pwerela lon pekilan ewe chanpupu Jortan, pwe oupwe fanüeni.”
Kot a mwüt ngeni Moses pwe epwe neneloi ewe fanü Kanaan
32.48-52
48 Iwe, ewe Samol mi Lapalap a kapas ngeni Moses lon ewe chök ränin, 49 “Kopwe feitä won ei chukun Aparim itan Nepo mi nom lon ewe fanü Moap sasape ngeni Jeriko. Kopwe neneloi ewe fanü Kanaan üpwe ngeni ekewe aramasen Israel pwe repwe fanüeni. 50 Iwe, ewe chuk kopwe feitä won, kopwe mäla me ie o chufengen me om kewe lewo, usun Aaron pwiüm we a mäla me won ewe chuk Hor o chufengen me an kewe lewo. 51 Pun ämi ruoman ousap allükülük woi me lein ekewe aramasen Israel me arun ewe kolukun Meripa arap ngeni Kates me lon ewe fanüapön Sin, ousap pwal pwärätä pwe üa pin me lein ekewe aramasen Israel. 52 Iwe, kopwe nenengeni chök ewe fanü me toau, nge kosap tolong lon ewe fanü üpwe ngeni ekewe aramasen Israel.” Num 27.12-14; Tut 3.23-27

32:8: Föf 17.26

*32:15: wewen Jesurun Israel

32:17: 1.Kor 10.20

32:21: 1.Kor 10.22; Rom 10.19

32:35: Rom 12.19; Ipr 10.30

32:36: Kölf 135.14

32:43: Rom 15.10; Pwär 19.2

32:52: Num 27.12-14; Tut 3.23-27