Paipel NUMPERIS 27
27
Än nöün Selofehat fefin tüngor
27.1-11
Iwe, nöün Selofehat kewe fefin ra feito o uwato ar tüngor. Iwe, Selofehat nöün Hefer mwän, nge Hefer nöün Kiliat mwän, nge Kiliat nöün Makir mwän, nge Makir nöün Manasa mwän seni än Manasa cho, nge Manasa nöün Josef we mwän. Iwe, iten nöün Selofehat kewe fefin Mala, Noa, Hokla, Milka me Tirsa. Iwe, ra üta leasamalapen ewe imw mangaku ia aramas ra churi Kot ie fän mesen Moses me ewe souasor Eleasar, pwal fän mesen ekewe souemwen me ekewe aramas meinisin. Iwe, ra apasa, “Semem we a mäla lon ewe fanüapö. Nge esap wor nöün mwän. I esap eman lein än Kora we mwich mi chufengen le ü ngeni ewe Samol mi Lapalap, pwe a mäla pokiten püsin an tipis. Pwota iten semem epwe töttöluwu seni an cho pokiten esap wor nöün mwän? Oupwe ngenikem eu fanü me lein fanüen pwin semem.”
Iwe, Moses a asile ngeni ewe Samol mi Lapalap ar tüngor. Nge ewe Samol mi Lapalap a üreni Moses, “Än nöün Selofehat kewe fefin tüngor a pwüng. Kopwe afanüeer me lein fanüen pwin semer, pun fanüer we won semer epwe toriir. Num 36.2 Iwe, kopwe üreni ekewe aramasen Israel: Are eman mwän a mäla, nge esap wor nöün mwän, nöün fefin epwe fanüeni fanüan. Nge are esap wor nöün fefin, pwin ewe mwän repwe fanüeni fanüan. 10 Nge are esap wor pwin, pwin saman kewe repwe fanüeni fanüan. 11 Nge are esap wor pwin saman we, eman me lein an eterekes mi kükü ngeni epwe fanüeni fanüan. Ei epwe eu pwüng me eu allük fän iten ekewe aramasen Israel, usun ngang ewe Samol mi Lapalap üa allük ngonuk.”
Moses a filätä Josua pwe siwilin
27.12-23
(Tut 31.1-8)
12 Iwe, ewe Samol mi Lapalap a üreni Moses, “Kopwe feitä won ewe chukuchukutä Aparim o nenneloi ewe fanü üa ngeni ekewe aramasen Israel. 13 Nge lupwen ka küna ewe fanü, pwal en kopwe mäla o chufengen me om kewe lewo usun pwiüm Aaron. 14 Pun oua lükümach ngeni ai kewe kapas me lükün ekewe koluk me lon ewe fanüapön Sin, lupwen ekewe aramas ra lal ngeniei, nge ämi ousap apiniöchüei fän meser.” (Ikkei ekewe kolukun Meripa lon Kates lon ewe fanüapön Sin.) Tut 3.23-27; 32.48-52 15 Iwe, Moses a üreni ewe Samol mi Lapalap, 16 “En Samol mi Lapalap popun manauen mönümanau meinisin, kose mochen kopwe filätä eman mwän epwe emweni ei mwichen aramas, 17 epwe akakomweer le emweniir lon mettoch meinisin, pwe noum mwichen aramas esap wewe ngeni eu pwiin sip esap wor ar chon mas.” 1.King 22.17; Is 34.5; Mat 9.36; Mark 6.34 18 Iwe, ewe Samol mi Lapalap a üreni Moses, “Kopwe emwenato Josua nöün Nun we mwän o iseis poum won, pun Ngüni a nom won. Eks 24.13 19 Kopwe aütäi fän mesen ewe souasor Eleasar pwal fän mesen ekewe aramas meinisin, pwe kopwe ngeni wisan. 20 Kopwe isetä won ekis om nemenem, pwe ekewe aramasen Israel meinisin repwe aleasochisi. 21 Epwe ütä fän mesen ewe souasor Eleasar, nge Eleasar epwe kütta letipei fän itan ren ewe Urim * Urim eu minen asisil ra aea le asisila letipen Kot. Iwe, fän än Eleasar kapas Josua fiti ekewe aramasen Israel meinisin repwe föri sokopaten ar angang meinisin.” Eks 28.30; 1.Sam 14.41; 28.6 22 Iwe, Moses a föri usun mine ewe Samol mi Lapalap a allük ngeni. A emwenato Josua o aütäi fän mesen ewe souasor Eleasar me ekewe aramas meinisin. 23 Iwe, a iseis pöün won o awisa ngeni wisan usun ewe Samol mi Lapalapa a aiti ngeni. Tut 31.23

27:7: Num 36.2

27:14: Tut 3.23-27; 32.48-52

27:17: 1.King 22.17; Is 34.5; Mat 9.36; Mark 6.34

27:18: Eks 24.13

*27:21: Urim eu minen asisil ra aea le asisila letipen Kot

27:21: Eks 28.30; 1.Sam 14.41; 28.6

27:23: Tut 31.23