Paipel FÖFÖR 17
17
Paulus me Silas ra angang ngeni Kot lon Tesalonika
17.1-9
Iwe, Paulus me Silas ra sai tori ekewe telinimw Amfipolis me Apolonia, ra pwal tori Tesalonika, ia a wor ie eu imwen felikis än chon Juta. Iwe, Paulus a tolong lon ewe imwen felikis usun an örüni. Lon ülüngat ränin sapat a kakapas ngeni ekewe aramas seni lon ekewe Toropwe mi Pin, a awewe ngeniir o alletätä seni lon ekewe wokisin pwe ewe Kraist epwe fokun tolong lon riaföü o manausefäl seni mäla. Iwe, Paulus a üra, “Ätei Jesus, ngang üa afalafala ngenikemi usun, iei i ewe Kraist.” Iwe, ekoch me lein ekewe aramas ra lükü o tipeeu ngeni Paulus me Silas, pwal chomong chon Krik mi fel ngeni Kot me chomong fefin mi iteföüla.
Nge ekewe chon Juta ra lolowo. Iei mine ra achufengeni ekoch aramasangau seni won ekewe al o förätä eu mwichen afitikoko mi popuetä eu osukosuk lon ewe telinimw. Ra atalong imwen eman mwän itan Jason fän iten ar repwe kütta Paulus me Silas pwe repwe emweniirewu mwen ewe mwichen aramas. Nge pokiten resap küneer, ra etekinawu Jason me ekewe ekoch chon lükü Jesus mwen nöüwisen ewe telinimw o ra kökkö fän leüömong, “Ekei mwän ra afisätä fitikoko ekis meinisin! Nge iei ra feito lon ach ei telinimw. Iwe, Jason a etiweer lon imwan. Ir meinisin ra atai än Sisar allük, pun ra apasa pwe mi pwal wor eman king itan Jesus.” Iwe, lupwen ar rongorong ekei kapas, ewe mwichen aramas me ekewe nöüwisen ewe telinimw ra tolong lon watten fitikoko. Mürin ekewe nöüwis ra echimwa Jason me ekewe ekoch aramas pwe repwe püngütiu moni fän iten ar repwe musala. Mürin ra amuseerewu.
Paulus me Silas ra angang ngeni Kot lon Perea
17.10-15
10 Iwe, lupwen a pwinila, ekewe chon lükü Jesus ra tinala Paulus me Silas Perea. Lupwen ra tori ikenan, ra feila lon ewe imwen felikis än chon Juta. 11 Iwe, ekewe aramasen Perea ra tipemecheres seni ekewe aramasen Tesalonika, pun ra etiwa ewe afalafal fän mochenin letiper. Iteiten rän ra kaiö lon ekewe Toropwe mi Pin o kütta are met Paulus a apasa a wesewesen pwüng. 12 Iwe, chomong chon Juta me leir ra lükü Jesus. Pwal chomong fin Krik mi itetekia me chomong re Krik ra pwal lükü. 13 Nge lupwen ekewe chon Juta mi nom lon Tesalonika ra silei pwe Paulus a pwal afalafala ewe kapasen Kot lon Perea, ra feila ikenan o etipetipa ekewe aramas pwe repwe förätä eu mwichen afitikoko. 14 Lon ewe chök otun ekewe chon lükü Jesus ra tinala Paulus lon ewe lenien suun sip, pwe epwe sai, nge Silas me Timoty ra nonometiu lon Perea. 15 Iwe, ätekewe mi emwenala Paulus ra etala tori Aten. Mürin ra liwinsefäliti Perea fän än Paulus öüröür ngeniir, pwe Silas me Timoty repwe chök müttir saila ren.
Paulus a nom lon Aten
17.16-34
16 Iwe, lupwen Paulus a witiwiti Silas me Timoty lon Aten, a fokun weires lupwen a küna pwe ewe telinimw a ur ren uluulun anümwäl. 17 Iei mine a kakapas ngeni ekewe chon Juta me ekewe chon Krik mi fel ngeni Kot me lon ar we imwen felikis. A pwal kapas ngeni ekewe aramas mi feito lon ewe lenien chulap iteiten rän. 18 Iwe, pwal ekoch soutipachem seni ekewe mwichen Epikurean me Stoik ra aninifengen me Paulus. Ekoch me leir ra ais, “Met ätei mi tiparoch a mochen apasa lon an aingaing?” Nge pwal ekoch ra apasa, “Usun itä a kakapas usun ekoch koten ekis.” Ra apasa ei, pokiten Paulus a afalafal usun Jesus me ewe manausefäl. Iei mine ra angei Paulus o emwenala ren ewe mwichen soupwüng mi mwichfengen won ewe Areopakus. 19 Iwe, ra üreni, “Äm aia mochen silei ei afalafal mi fö ka kakapas usun. 20 Ka uwato och pworaus äm aisap fokun rongorong mwo me mwan. Äm aia mochen silei met wewen.” 21 (Pun ekewe chon Aten meinisin me ekewe chon ekis mi nom ikenan ra sani ar repwe awora fansoun le apworausa pworaus mi fö o aüseling ngeni pworaus mi fö.)
22 Mürin Paulus a üta me lon ewe mwich me won ewe Areopakus o apasa, “Ämi re Aten! Üa küna pwe oua fokun angang ngeni chomong kot. 23 Pun lupwen üa fetalfeil lon ämi ei telinimw üa küna ekewe leni ia oua fel ngeni ekewe kot ie, üa pwal küna eu rongen asor a mak ekei kapas won, ‘Fän iten ewe Kot esap wor eman a silei.’ Ewe oua fel ngeni nge ouse fen mwo silei, iei i ewe üa aronga ngenikemi. 24 Ewe Kot mi föri fanüfan me meinisin mine a wor lon, i Samolun läng me fanüfan, esap nonom lon imwenfel mi för ren pöün aramas. 1.King 8.27; Ais 42.5; Föf 7.48 25 Esap wor och mine a osupwang ren, pwe aramas repwe tongeni awora fän itan, pun püsin i a ngeni aramas manau me ngasangas pwal mettoch meinisin. 26 Seni eman aramas i a föri sokun aramas meinisin, pwe repwe nonom won unusen fanüfan. Mwen an föriir, a akota fansoun manauer o alenier lon en me lenian. 27 Kot a föri ei, pwe aramas repwe kütta i, iwe, eli repwe küna i are repwe küküttafeili. Nge Kot esap wesewesen toau seni eman me eman leich, 28 usun eman a fen apasa,
‘Sia manau me mwökütüküt me nonom lon i.’ A usun chök ekoch me lein nöümi chon makkei köl ra apasa,
‘Pwal kich sia nöün.’ 29 Iei mine pokiten sia nöün Kot kana, sisap fokun ekieki pwe lapalapen Kot a wewe ngeni eu uluulun anümwäl seni kolt ika silifer ika fau, förien sousilelap. 30 Iwe, Kot a manlükala ekewe fansoun lupwen aramas resap silei i. Nge iei a allük ngeni aramas meinisin lon ekewe leni meinisin pwe repwe kul seni ar föför mi ngau. 31 Pun a filätä eu rän epwe apwüngü unusen chon fanüfan meinisin fän pwüng ren eman mwän i a awisa ngeni. A fen alletätä ei ngeni aramas meinisin ren an amanauasefäli ei mwän seni mäla.”
32 Iwe, lupwen ekewe aramas ra rongorong pwe Paulus a afalafal usun manausefäl seni mäla, ekoch me leir ra takiri, nge pwal ekoch ra apasa, “Äm aia mochen rongorong om kopwe pwal kapassefäl usun ei mettoch.” 33 Mürin ei, Paulus a feila seni ewe mwich. 34 Iwe, ekoch mwän ra eti Paulus, pun ra lükü mine a eäni afalafal, eman me leir itan Tionisius, i eman chon ewe mwichen soupwüng. A pwal wor eman fefin itan Tamaris, pwal ekoch aramas mi lükü Jesus.

17:24: 1.King 8.27; Ais 42.5; Föf 7.48