Paipel 2.KRONIKA 20
20
Jehosafat a akufu chon Moap me chon Amon
20.1-30
Ekoch fansoun mürin, ekewe mwichen sounfiu seni Moap me Amon, pwal ekoch chon Meun ra tolong lon Juta, pwe repwe maun ngeni Jehosafat. Iwe, ekoch mwän ra feito ren Jehosafat o üreni, “Eu mwichemongun aramas ra feito seni Etom, seni pekilan ewe Setin Mäla, pwe repwe maun ngonuk. Ra fen liapeni Hasason-tamar, iei Enketi. Mürin, Jehosafat a niuokus, a kütta öüröüran me ren ewe Samol mi Lapalap o asilefeili eu ränin echikefel lemenen unusen ewe fanü Juta. Iwe, chon ekewe telinimwen Juta meinisin ra feito o mwichefengen lon Jerusalem, pwe repwe kütta alilisir me ren ewe Samol mi Lapalap.
Mürin, Jehosafat a ütä me lein ewe mwichen chon Juta me chon Jerusalem mi chufengen me mwen ewe leni mi fö lükün ewe imwenfel. Iwe, a iotek, “Äm Samol mi Lapalap, en äm kewe lewo we Kot. En ewe Koten läng, ka nemenem won ekewe mwün fanüfan meinisin. Ka fokun manaman o pöchökül, esap wor eman a tongeni ü ngonuk. En äm Kot, ka asüela chon ei fanü, lupwen noum aramasen Israel ra tolong lon. Ka ngeni ekewe mwirimwirin Apraham chiechiom we ei fanü, pwe repwe fanüeni tori feilfeilachök. Ais 41.8; Jas 2.23 Iwe, ir ra nonom lon o aüetä won eu imwenfel fän itom. Iwe, ra apasa, ‘Are feiengau epwe torikem, are ka apwüngükem ren maun ika mätter ika echik, äm aipwe ütä fän mesom me mwen ei imwenfel ia aramas ra fel ngonuk ie. Are äm aipwe siö ngonuk lon äm riaföü, en kopwe aüselingakem o amanauakem.’ 10 Nge iei ekewe re Amon me Moap me Etom ra feito o maun ngenikem. Iwe, lupwen äm kewe lewo ra feito seni Isip, kosap mwüt ngeniir pwe repwe tolong lon fanüen ekei aramas. Iei mine äm kewe lewo ra pwelila lükün fanüer, nge resap aroserela. Tut 2.4-19 11 Nengeni, iei usun mine ra föri ngenikem. Ra feito, pwe repwe asükeemila seni ewe fanü en ka ngenikem pwe aipwe fanüeni. 12 En äm Kot, kopwe apwüngüür. Pun esap wor äm pöchökül ngeni ei mwichemongun aramas mi feito o maun ngenikem. Äm aisap silei mine aipwe föri, nge äm aia chök nenengenuk pwe kopwe alisikem.”
13 Iwe, ekewe re Juta meinisin, pwülüer me nöür kewe ra ütä me fän mesen ewe Samol mi Lapalap. 14 Nge Ngünün ewe Samol mi Lapalap a feitiu won Jaasiel me lukalapen ewe mwich. Ätei eman seni ewe ainangen Lefi, eman mwirimwirin Asaf. Iwe, Jaasiel nöün Sekaria we mwän, Sekaria nöün Penaia, Penaia nöün Jeiel, nge Jeiel nöün Matania. 15 Iwe, a üra, “Oupwe rongorong, en Jehosafat me ämi chon Juta me chon Jerusalem meinisin. Iei alon ewe Samol mi Lapalap ngenikemi, ‘Ousap niuokus, ousap pwal rükö ren ei mwichemongun aramas. Pun ei maun sap ämi, pwe än Kot. 16 Lesor oupwe feila pwe oupwe maun ngeniir. Repwe feitä won ewe pal mi aletä seni Sis. Oupwe küneer me lesopun ewe lemol ötiuen ewe fanüapön Jeruel. 17 Ämi ousap fiu lon ei maun. Oupwe atettelikemi o ükütä chök. Oupwe nengeni usun än ewe Samol mi Lapalap awinnakemi.’ Ämi chon Juta me chon Jerusalem, ousap niuokus, ousap pwal rükö. Lesor oupwe feila maun ngeniir, nge ewe Samol mi Lapalap epwe etikemi.” Tut 20.1-4; Eks 14.13-14
18 Mürin, Jehosafat a chapetiu lepwül, nge chon Juta me chon Jerusalem meinisin ra pwal chapetiu me fän mesen ewe Samol mi Lapalap o fel ngeni. 19 Iwe, ekewe mwän seni ewe ainangen Lefi seni än Kohat me än Kora kewe cho ra ütä o kölün mwareiti ewe Samol mi Lapalap ewe Koten Israel fän leüömong.
20 Iwe, ekewe aramas ra pwätä lesosorusichin sorotän ewe rän o feila lon ewe fanüapön Tekoa. Nge lupwen ra feila, Jehosafat a ütä mwer o üreniir, “Oupwe aüselingaei, ämi chon Juta me chon Jerusalem. Oupwe anomu ämi apilükülük won ewe Samol mi Lapalap ämi we Kot, pwe oupwe üpöchökül, oupwe pwal lükü mine nöün kewe soufos ra ürenikemi, pwe oupwe win.” 21 Iwe, wesin an öüröüra ekewe aramas, ewe king a filätä ekoch chon köl, pwe repwe kölün mwareiti ewe Samol mi Lapalap fän üfer mi pin, repwe akomwola mwen ewe mwichen sounfiu o köl, “Ousipwe kilisou ngeni ewe Samol mi Lapalap, pun an tong ellet a nonom tori feilfeilachök.” 22 Nge lupwen ra popuetä le kölün mwareiti Kot, ewe Samol mi Lapalap a awarato niuokus watte won ekewe mwichen sounfiu seni Amon me Moap me Etom mi töki ewe fanü Juta. 23 Iwe, ekewe re Amon me Moap ra maun ngeni ekewe re Etom o wesewesen aroserela. Nge lupwen ra wes le aroserela, ra püsin sapefengen o nifengeniir.
24 Iwe, lupwen ekewe sounfiun Juta ra tori ewe imwen mamas mi tekia me lon ewe fanüapö o neneloi ewe mwichemongun aramas, ra chök küna somä mi nom won ewe pwül. Esap wor eman a tongeni süla. 25 Nge lupwen Jehosafat me nöün kewe sounfiu ra feila pwe repwe angei liaper seniir, ra küna pwiin kow mi chomong, pisek, üf me mettoch mi aüchea. Iwe, ra angei ekewe pisek fän iter, tori resap chüen tongeni uwei och. Lon ükükün ülüngat rän ra angei liaper, pun a kon chomong. 26 Nge lon arüanün rän ra mwichefengen lon ewe lemolun Peraka * wewen Peraka mwareiti Kot o mwareiti ewe Samol mi Lapalap. Iei mine ewe leni a iteni lemolun Peraka tori ikenai. 27 Mürin, Jehosafat a emwenala nöün kewe sounfiu ngeni Jerusalem fän pwapwa, pun ewe Samol mi Lapalap a akufu ekewe chon oputer. 28 Iwe, lupwen ra tori Jerusalem, ra feila ngeni imwen ewe Samol mi Lapalap fän tikin kitar me ükülele, pwal fän tikin rappwa. 29 Nge chon ekewe mwü meinisin lon ekewe fanü ra niuokusiti ewe Samol mi Lapalap, lupwen ra rongorong pwe i a akufu ekewe chon oput Israel. 30 Iei usun Jehosafat a nemenem fän kinamwe, pun an Kot a awora kinamwe lekiännin fanüan meinisin.
Usun än Jehosafat nemenem
20.31-37
(1.King 22.41-50)
31 Iwe, Jehosafat a ierini ilik me limu, lupwen a tolong lon wisan wisen king. A nom lon Jerusalem o nemeni Juta lon ükükün rüe me limu ier. Iten inan Asupa nöün Silhi we fefin. 32 Jehosafat a föri mine a pwüng me fän mesen ewe Samol mi Lapalap, usun Asa saman we a föri. 33 Nge ekewe lenien fel won ekewe leni tekia resap katala. Ekewe aramas resap mwo kul ngeni än ar kewe lewo we Kot, pwe repwe angang ngeni ren unusen leluker.
34 Nge lusun pworausen än Jehosafat föför meinisin seni lepoputan tori lesopolan an nemenem a makelong lon puken uruwon Jehu nöün Hanani we mwän o pachelong lon puken uruwon ekewe kingen Israel. 35 Ekoch fansoun mürin, Jehosafat ewe kingen Juta a chiechi ngeni Ahasia ewe kingen Israel mi föri föför mi ngau. 36 Iwe, a eti Ahasia le föri pöisein sip mi kamö me amömö pisek me lon Esion-keper. 37 Nge Elieser nöün Totawahu we mwän seni Maresa a osuni usun feiengauen Jehosafat o üreni, “Pokiten ka chiechi ngeni Ahasia, ewe Samol mi Lapalap epwe ataela mine ka föri.” Iwe, ekewe sip ra tala, nge resap tongeni sai pwe repwe föri ar angang.

20:7: Ais 41.8; Jas 2.23

20:10: Tut 2.4-19

20:17: Tut 20.1-4; Eks 14.13-14

*20:26: wewen Peraka mwareiti Kot