2
Kapasen fön usun ach sisap lifilifil aramas
2.1-13
Ämi pwii kana, ämi chon lükü ach Samol Jesus Kraist, ewe Samol mi ling, ousap lifilifil aramas pokiten chök lapalapen inisiir me lükün. Are eman aramas mi pisekisek a feito lon ämi mwich fän nöün ring seni kolt, pwal fän üfan mi lingöch, nge eman aramas mi wöüngau a pwal feito fän üfan mi mesingau, nge are oua pwärala ämi meniniti ewe aramas mi üföüf üf mi lingöch o oua üreni, “Kopwe mottiu ikei won ei lenien mot mi mürina”, nge oua üreni ewe aramas mi wöüngau, “Kopwe ütä ikenan”, ika “Kopwe mottiu ikei arun pechei”, mürin oua tipis ren ämi lifilifil aramas lefilemi, pwal ren ämi longuni pwüngün ämi apwüng won ekiek mi ngau.
Ämi pwii kana mi achengicheng, oupwe aüseling! Ifa usun, Kot esap filätä ekewe aramas mi wöüngau won ei fanüfan pwe repwe pisekisek lon ar lükülük o feiöchüni feiöchün ewe Mwün Kot, i a pwon ngeni chokewe mi echeni? Nge ämi oua asäwa ekewe mi wöüngau. Ifa usun, esap ekewe chon pisekisek ir ekewe mi ariaföüükemi o atekinikemiila mwen ekewe soukapwüng? Ifa usun, esap pwal ir chokewe mi turunufasei ewe it mi mürina a föü womi?
Oua föri mine a pwüng are oua aleasochis ngeni allükün ewe Mwün Kot mi mak lon ekewe Toropwe mi Pin, “Kopwe echeni chon arum usun püsin om echenuk.” Lif 19.18 Nge are oua lifilifil aramas ren chök lapalapen inisiir me lükün, oua tipis, pun ewe Allük a atipisikemi pwe oua chon atai allük. 10 Pun iö a apwönüetä ekewe allük meinisin, nge a atai eu chök kewe allük, ätewe a tipisin atai ekewe allük meinisin. 11 Pun ewe eman mi apasa, “Kosap lisowu”, a pwal apasa, “Kosap niela aramas”. Inamwo ika kosap lisowu, nge ka niela aramas, ka eman chon atai allük. Eks 20.13-14; Tut 5.17-18 12 Iei mine oupwe kapas o föri sokun föför usun chök aramas repwe küna kapwüng ren ewe allük mi angasakichela. 13 Pun Kot esap eäni tong ngeni eman aramas esap eäni tong, lupwen a apwüngü. Pun tong a win lon kapwüng.
Lükülük me föför
2.14-26
14 Ämi pwii kana, met lomoten are eman aramas a apasa pwe a wor an lükülük, are an föför esap alletätä? Ifa usun, ei sokun lükülük epwe tongeni amanaua i? 15 Are mi wor pwiich souläng are fefinach souläng esap wor üfer, esap pwal naf aner mongö, 16 nge eman me leimi epwe üreniir, “Oupwe feila fän kinamwe. Oupwe aüföüfakemi o amongökemi!” nge ousap ngeniir mine ra osupwang ren lon manauen inisiir, met chök lomoten ämi afeiöchüür? 17 Ina chök usun ren lükülük. Are epwe wor chök ämi lükülük, nge esap fiti föför, a mäla ämi lükülük.
18 Nge eli eman epwe üra, “En ka eäni lükülük, nge ngang üa eäni föför.” Pölüan me rei, “Kopwe pwäri ngeniei om we lükülük ese fiti föför, nge ngang üpwe pwäri ngonuk ai lükülük mi fiti föför.” 19 Ifa usun, ka lükü pwe mi wor eman chök Kot? A öch om lükü. Ekewe anün rochopwak ra pwal lükü, nge ra chechech ren niuokus. 20 Ka umwes! Ifa usun, ka mochen än eman epwe alletätä ngonuk, pwe lükülük ese fiti föför a mä? 21 Ifa usun, ach we lewo Apraham esap küna pwüng me ren Kot ren an föför, lupwen a eäni asor Isaak nöün we won ewe rongen asor? Ken 22.1-14 22 Ka küna pwe an lükülük me an föför ra angangfengen, nge an lükülük a unusöchüla ren an föför. 23 Iwe, mine a mak lon ekewe Toropwe mi Pin a pwönüetä, “Apraham a lükü Kot, nge pokiten an lükü a küna pwüng me ren Kot”. Iei mine Apraham a iteni “Chiechien Kot”. Ken 15.6; 2.Kron 20.7; Ais 41.8 24 Iei usun oua küna pwe eman aramas a küna pwüng me ren Kot ren an föför, sap ren an lükülük echök.
25 Ina chök usun ren ewe fin lisowu Rahap. Neminei a küna pwüng me ren Kot ren an föför, lupwen a etiwa ekewe chon Israel mi operi ewe fanü o alisiir pwe repwe süla won pwal efoch al. Jos 2.1-21
26 Pun usun eu inis a mäla are ewe ngün esap nom lon, pwal iei usun ewe lükülük a mäla are ese fiti föför.

2:8: Lif 19.18

2:11: Eks 20.13-14; Tut 5.17-18

2:21: Ken 22.1-14

2:23: Ken 15.6; 2.Kron 20.7; Ais 41.8

2:25: Jos 2.1-21