21
Usun än Jehoram nemenem lon Juta
21.1-20
(2.King 8.17-24)
Iwe, Jehosafat a mäla, nge ra peiaseni ren an kewe lewo lon ewe telinimwen Tafit. Iwe, Jehoram nöün we mwän a siwili lon wisan wisen king. Ikkei ir nöün Jehosafat ewe kingen Juta kewe mwän ir pwin Jehoram: Asaria, Jehiel, Sekaria, Asariahu, Mikael me Sefatia. Iwe, semer we a lifang ngeniir chomong silifer me kolt me pisek mi aüchea, a pwal ngeni eman me eman eu kewe telinimw mi pöchökül tittir lon Juta. Nge ewe mwü a ngeni Jehoram, pun i ewe mwänichi. Lupwen Jehoram a wiseni ewe wisen king o anüküchara mwün, a niela pwin kewe meinisin, a pwal niela ekoch me lein ekewe samolun Israel. Jehoram a ierini ilik me ruu, lupwen a tolong lon wisan wisen king. A nom lon Jerusalem o nemenem lon ükükün walu ier. Iwe, a tipis usun ekewe kingen Israel o föföringau usun chon leimwen Ahap, pun a pwülüeni nöün Ahap we fefin. Iwe a föri mine a ngau me fän mesen ewe Samol mi Lapalap. Nge ewe Samol mi Lapalap esap mochen arosala ekewe mwirimwirin Tafit pokiten ewe pwon a eäni ngeni Tafit, pun a fen pwon ngeni, pwe epwe wor eman mwirimwirin, epwe nemenem fansoun meinisin. 1.King 11.36
Iwe, lupwen fansoun mwün Jehoram, ekewe chon Etom ra ü ngeni Juta o seikätä püsin eman nöür king. Ken 27.40 Iei mine Jehoram me nöün kewe meilapen sounfiu ra tötä won war kewe woken o tolong lon ewe fanü Etom. Ikenan ekewe sounfiun Etom ra pwelifeiliir, nge Jehoram me nöün kewe meilapen wan kewe woken ra ütä lepwin o sü seniir. 10 Iei usun chon Etom ra ütä, nge resap chüen nom fän nemenien Juta tori ikenai. Lon ewe chök fansoun Lipna a pwal ütä won mwün, pun Jehoram a likitala ewe Samol mi Lapalap än an kewe lewo we Kot.
11 Jehoram a pwal mwo nge föri lenien fel ngeni ekewe uluulun anümwäl won chukuchukutän ewe fanü Juta o emweni ekewe chon Jerusalem me chon Juta ngeni tipis, pwe ra kul seni Kot. 12 Iwe, ewe soufos Elias a tinala echö toropwe ren Jehoram. Iei masouen ewe toropwe, “Iei alon ewe Samol mi Lapalap än Tafit om we lewo we Kot: En kosap apirü föförün Jehosafat semom we, ika föförün Asa semen semom we, ewe kingen Juta, 13 nge ka apirü föförün ekewe kingen Israel o emweni ekewe chon Juta me chon Jerusalem ngeni tipis, usun chök Ahap me nöün kana ra emweni chon Israel ngeni tipis. Ka pwal mwo nge niela pwiüm kewe mi mürina senuk. 14 Pokiten ka föri ekei föför, ewe Samol mi Lapalap epwe awarato eu feiengau watte won noum aramas, won noum kana me pwülüom kewe, pwal won mettochum meinisin ka eäni. 15 Nge püsin en kopwe samauni eu samau mi fokun weires ren samaun lukom, epwe ngauala rän me rän, tori tarom repwe seliseliwu.”
16 Iwe, ewe Samol mi Lapalap a föri, pwe ekewe chon Filistia me chon Arapia mi nom arap ngeni ekewe chon Itiopia ra oput Jehoram. 17 Iei mine ra töki Juta o maun ngeni. Ra uweela ekewe pisek meinisin me lon imwen ewe king, ra pwal uweela nöün kewe mwän me pwülüan kewe, pwe esap chüen wor eman nöün mwän a nom ren, chilon chök Ahasia nöün setiputur.
18 Iwe, mürin an fis ekei pworaus meinisin, ewe Samol mi Lapalap a asamaua Jehoram ren eu samaun luk esap tongeni pöchökül ren. 19 A chök sasamau, nge mürin ruu ier taran ra seliseliwu, pwe a mäla fän cheuch watte. Iwe, nöün aramas resap föri eu ekkei fän iten ar asamolu, usun ra piin föri ngeni an kewe lewo. 20 Jehoram a ierini ilik me ruu, lupwen a tolong lon wisan wisen king. A nom lon Jerusalem o nemenem lon ükükün walu ier. Iwe, a mäla, nge esap wor eman a letipeta usun. Ra peiaseni lon ewe telinimwen Tafit, nge sap lon peiasen ekewe king.

21:7: 1.King 11.36

21:8: Ken 27.40