Paipel 1.SAMUEL 12
12
Än Samuel amwirimwir ngeni ekewe aramas
12.1-25
Iwe, Samuel a kapas ngeni chon Israel meinisin, “Nengeni, üa aüselinga alomi lon meinisin mine oua üreniei o seikätä eman nöümi king. Iei a wor ämi we king epwe emwenikemi. Ngang üa chinlap, a pwal pwech mökürei, nge nei kewe mwän ra nom remi. Üa emwenikemi seni lealüali tori ikenai. Ngang üa nom iei. Oupwe pwärätä ngauei fän mesen ewe Samol mi Lapalap, pwal fän mesen nöün we mi kepit. Iö üa angei nöün ätemwänin kow ika nöün aas? Iö üa atupu ika ariaföüü. Seni iö üa angei och lifangen amichimich pwe üpwe achuna mesei ren? Oupwe pwärätä ngauei, nge ngang üpwe aliwini ngenikemi mine üa angei.” Iwe, ekewe aramas ra üreni Samuel, “Kosap atupukem ika ariaföüükem, kosap pwal angei och seni eman aramas.” Nge Samuel a üreniir, “Ewe Samol mi Lapalap a küna, pwal nöün we mi kepit a küna ikenai pwe ousap oori ngeniei och.” Iwe, ra üreni, “Ewer, Kot a küna.”
Iwe, Samuel a üreni ekewe aramas, “Ewe Samol mi Lapalap i ewe mi filätä Moses me Aaron o emwenawu ämi kewe lewo seni ewe fanü Isip. Eks 6.26 Iei oupwe ütä lon en me lenian, nge ngang üpwe aturukemi fän mesen ewe Samol mi Lapalap ren an kewe föför meinisin a föri ngenikemi, lupwen a amanauakemi me ämi kewe lewo. Lupwen Jakop me an famili ra feila Isip, nge chon Isip ra ariaföüür, ämi kewe lewo ra siö ngeni ewe Samol mi Lapalap. Iwe, ewe Samol mi Lapalap a tinato Moses me Aaron pwe repwe emwenawu ämi kewe lewo seni Isip o afanüa ngeniir ei fanü. Eks 2.23 Nge ra manlükala ewe Samol mi Lapalap ar we Kot. Iei mine a mwüt ngeni Sisera ewe samolun mwichen sounfiu seni Hasor, pwal ekewe chon Filistia me ewe kingen Moap pwe repwe maun ngeni ämi kewe lewo o akufuur. Souk 4.2; Souk 13.1; Souk 3.12 10 Mürin ra siö ngeni ewe Samol mi Lapalap o apasa, ‘Äm aia tipis, pun aia likitukela en äm Samol mi Lapalap o angang ngeni ekewe uluulun Paal me Astarot. Nge iei kopwe angasakem seni chon oputakem. Iwe, äm aipwe angang ngonuk.’ Souk 10.10-15 11 Mürin, ewe Samol mi Lapalap a tinato Kition me Parak, Jefta me ngang. Aia angasakemi seni chon oputakemi mi nom ünükümi, pwe oua nom fän kinamwe. Souk 7.1; Souk 4.6; Souk 11.29; 1.Sam 3.20 12 Nge lupwen oua küna, pwe Nahas ewe kingen chon Amon a feito pwe epwe maun ngenikemi, oua pöütala ewe Samol mi Lapalap ämi we Kot i fen ämi king o üreniei, ‘Äm aia mochen eman king epwe nemenikem.’ 1.Sam 8.19 13 Iei i ewe king oua tüngor, oua pwal filätä. Nengeni, ewe Samol mi Lapalap a seikätä eman nöümi king. 14 Are oua meniniti ewe Samol mi Lapalap o angang ngeni, are oua pwal aüselinga alon, nge ousap ü ngeni an kewe allük, are ämi me nöümi king mi nemenikemi oupwe tapwela mürin ewe Samol mi Lapalap ämi we Kot, oupwe feiöch. 15 Nge are ousap aüselinga alon ewe Samol mi Lapalap, nge oua ü ngeni an allük, mürin ewe Samol mi Lapalap epwe ü ngenikemi me ämi king. 16 Iei mine oupwe ütä o nengeni ei manaman mi lapalap ewe Samol mi Lapalap epwe le föri me mwemi. 17 Ifa usun, sap iei fansoun esap püng üt? Nge iei ngang üpwe tüngor ngeni ewe Samol mi Lapalap pwe epwe tinato chopulap me üt. Mürin ämi oupwe silei o küna pwe iei eu föför mi fokun ngau oua föri me fän mesen ewe Samol mi Lapalap, pun oua tüngor eman king fän itemi.” 18 Iei mine Samuel a tüngor ngeni ewe Samol mi Lapalap, nge i a tinato chopulap me üt lon ewe ränin. Iwe, ekewe aramas meinisin ra fokun niuokusiti ewe Samol mi Lapalap me Samuel.
19 Mürin, ekewe aramas meinisin ra üreni Samuel, “Kopwe iotek ngeni ewe Samol mi Lapalap om we Kot fän iten noum kei chon angang pwe aisap mäla. Pun aia apacha ngeni äm kewe tipis meinisin ei föför mi ngau, pwe äm aia tüngor eman king fän item.” 20 Iwe, Samuel a üreni ekewe aramas, “Ousap niuokus. Ewer, oua föri ei föför mi ngau, nge ousap chök kul seni ewe Samol mi Lapalap, nge oupwe angang ngeni ren unusen lelukemi. 21 Ousap angang ngeni ekewe anümwäl mi lomotongau, resap tongeni afeiöchükemi ika amanauakemi, pun ra lomotongau. 22 Ewe Samol mi Lapalap esap pöütikemiila pokiten itan mi tekia, pun a efich pwe ämi oupwe nöün aramas. 23 Nge ngang won inisi, esap fokun tufich ngeniei pwe üpwe tipis ngeni ewe Samol mi Lapalap ren ai üpwe ükütiu le iotek fän itemi. Ngang üpwe aiti ngenikemi mine a öch o pwüng. 24 Nge eu chök, oupwe meniniti ewe Samol mi Lapalap o angang ngeni ren unusen lelukemi fän allükülük. Pun oupwe ekieki usun ekewe mettoch mi amwarar Kot a föri fän itemi. 25 Nge are ämi oua chök sopwela le föri föför mi ngau, oupwe feiengau, ämi me nöümi we king.”

12:6: Eks 6.26

12:8: Eks 2.23

12:9: Souk 4.2; Souk 13.1; Souk 3.12

12:10: Souk 10.10-15

12:11: Souk 7.1; Souk 4.6; Souk 11.29; 1.Sam 3.20

12:12: 1.Sam 8.19