Paipel SOUKAPWÜNG 13
13
Samson a uputiu
13.1-25
Iwe, ekewe aramasen Israel ra pwal förisefäli mine a ngau me fän mesen ewe Samol mi Lapalap. Iei mine ewe Samol mi Lapalap a atolongeer fän nemenien ekewe chon Filistia lon ükükün faik ier.
Iwe, mi wor eman mwän lon Sora seni ewe ainangen Tan itan Manoa. Nge pwülüan esap nöünöü, pun a rit. Iwe, nöün ewe Samol mi Lapalap chon läng a pwä ngeni ewe fefin o üreni, “Nengeni, kosap nöünöü, pun ka rit. Nge iei kopwe pwopwo o nöüni eman ät. Kopwe afäluk pwe kosap ün wain ika sakau mi pwichikar, kosap pwal mongö och mi limengau. Nge lupwen noum ät a uputiu, kosap fichi möküran, pun ewe ät epwe eman Nasir, eu sokun aramas mi imwüla fän iten Kot seni an uputiu. Iwe, i epwe popuetä le angasa chon Israel seni chon Filistia.” Num 6.1-5 Mürin, ewe fefin a feila ren pwülüan o üreni, “Eman aramasen Kot a feito rei, nge won mesan a usun chök won mesen eman nöün Kot chon läng mi fokun eniwokus. Üsap aisini ia a feito me ie, nge i esap üreniei itan. Iwe, a chök üreniei, ‘Kopwe pwopwo o nöüni eman ät. Iei mine seni ikenai kosap ün wain ika och sakau mi pwichikar, kosap pwal mongö och mi limengau. Pun ewe ät epwe eman Nasir, eu sokun aramas mi imwüla fän iten Kot seni an uputiu tori an mäla.’ ”
Mürin, Manoa a iotek ngeni ewe Samol mi Lapalap o üreni, “Ai Samol, üa tüngor ngonuk pwe kopwe mwüt ngeni ewe aramasen Kot, ka piin tinato, epwe liwinsefälito rem, pwe epwe aiti ngenikem mine aipwe föri ngeni ewe ät epwe uputiu.” Iwe, Kot a aüselinga än Manoa iotek, pun nöün Kot we chon läng a liwinsefälito ren ewe fefin mi mot lemäl. Nge Manoa pwülüan we esap nom ren. 10 Mürin, ewe fefin a müttir säla ren pwülüan we o üreni, “Nengeni, ewe mwän mi feito rei ponlon ewe a pwäsefäl ngeniei.” 11 Iwe, Manoa a ütä o tapwela mürin pwülüan we, a feito ren ewe mwän o aisini, “Ifa usun, en ewe mwän ka kapas ngeni pwülüei ei?” Nge i a üra, “Ewer, ngang.” 12 Mürin, Manoa a aisini, “Lupwen om kapas epwe fis, epwe ifa usun lapalapen manauen ewe ät, nge met epwe föri?” 13 Nge nöün ewe Samol mi Lapalap we chon läng a üreni Manoa, “Pwülüom we epwe afäli meinisin mine üa üreni. 14 Esap tongeni mongö och mine a feito seni ewe irän wain ika ün wain ika sakau mi pwichikar, esap pwal mongö och mi limengau. Epwe tümwünü meinisin mine üa allük ngeni.”
15 Mürin, Manoa a üreni nöün ewe Samol mi Lapalap we chon läng, “Kose mochen kopwe ekis witiwit, pwe aipwe amolätä eman apanen kuuch fän itom.” 16 Nge nöün ewe Samol mi Lapalap we chon läng a üreni Manoa, “Are mwo oua mochen üpwe witiwit, üsap mongö enemi mongö. Nge are oua mochen amolätä och, oupwe eäni asoren kek ngeni ewe Samol mi Lapalap.” Pun Manoa esap silei pwe i nöün ewe Samol mi Lapalap we chon läng. 17 Iwe, Manoa a aisini nöün ewe Samol mi Lapalap we chon läng, “Ifa itom, pwe aipwe asamoluk, lupwen om we kapas epwe fis?” 18 Nöün ewe Samol mi Lapalap we chon läng a pälüeni, “Pwota ka ais itei? Pun itei a men amwarar.” 19 Mürin, Manoa a angei eman apanen kuuch me ewe asoren mongö o eäniir asor won ewe achau ngeni ewe Samol mi Lapalap mi föri mettoch mi amwarar. 20 Nge lupwen ewe ekkei a ngetetä seni ewe rongen asor, nöün ewe Samol mi Lapalap we chon läng a fitätä ngetengetan we. Iwe, lupwen Manoa me pwülüan we ra küna ei, ra chapetiu lepwül.
21 Mürin, Manoa a silei pwe i nöün ewe Samol mi Lapalap we chon läng. Iwe, nöün ewe Samol mi Lapalap we chon läng esap chüen pwäsefäl ngeni Manoa me pwülüan we. 22 Iwe, Manoa a üreni pwülüan we, “Sipwe fokun mäla, pun sa küna Kot.” 23 Nge pwülüan we a üreni, “Are ewe Samol mi Lapalap a ekiekin nikich, esap etiwa ach we asoren kek me asoren mongö, esap pwal pwäri ngenikich ika asile ngenikich ekei mettoch meinisin.” 24 Iwe, ewe fefin a nöüni eman ät o aita ngeni Samson. Ewe ät a mämäritä, nge ewe Samol mi Lapalap a afeiöchü. 25 Iwe, Ngünün ewe Samol mi Lapalap a popuetä le amwökütükütü Samson, lupwen a nonom lon Mahane-tan lefilen Sora me Estaol.

13:5: Num 6.1-5