2
Ewe Aramas mi Tipis
2.1-12
Nge usun waren ach Samol Jesus Kraist, pwal usun ach chufengen me i o nonom ren, ngang üa tüngormau ngenikemi, ämi pwii kana, 1.Tes 4.15-17 pwe ousap müttir rukola lon ämi ekiek, ika osukosuk ren ewe kapas pwe ewe Ränin ach Samol a fen war. Eli oua ekieki, pwe aia apasa ei lupwen aia osuni ika aia afalafal ika aia makkei ekei kapas lon toropwe. Ousap mwüt ngeni eman epwe atupukemi lon sokopaten angangen atuputup. Pun ewe Rän esap wareto mwen an epwe fis pwe aramas repwe üfengen me Kot o ewe Aramas mi Tipis epwe pwäto, i ewe epwe kiteterila lon ewe hell. I epwe ü ngeni iteiten mettoch aramas ra aita ngeni Kot o fel ngeni, epwe pwal püsin seikätä wor meinisin. Epwe mwo nge feila lon än Kot we imwenfel o mot won an lenien mot o püsin aita ngeni pwe i Kot. Tan 11.36; Is 28.2
Ousap chechemeni pwe üa fen ürenikemi ekei mettoch meinisin lupwen üa nonom remi? Nge mi wor och a pinei ei an epwe fis iei, o ämi oua silei met a pinei. Iwe, ewe Aramas mi Tipis epwe pwäto lon ewe fansoun mi fich ngeni. Pun ewe tipis mi monomonola a fen akangang iei, nge ewe eman mi pinei an epwe fis ei iei epwe chök sopwela le föri iei usun tori Kot epwe angeala. Mürin ewe Aramas mi Tipis epwe pwäla. Nge lupwen ach Samol Jesus epwe war epwe niela i ren enienin ngasangasan mi towu seni awan o amüchala ren lingen an war. Ais 11.4 Ewe Aramas mi Tipis epwe war fän pöchökülen Satan o föri sokopaten manaman me asisil mi chofona, Mat 24.24 10 epwe aea sokopaten angangen atuputup mi ngau ngeni chokewe repwe pöütmwälila. Repwe pöütmwälila pokiten resap fokun mochen etiwa o aücheani ewe kapas mi let pwe repwe küna manau ren. 11 Iei popun Kot a tinala rer ewe manamanen atuputup, pwe repwe lükü mine a chofona. 12 Iei mine chokewe meinisin resap lükü ewe kapas mi let, nge ra pwapwa le föri tipis, Kot epwe apwüngala pwe ra tipis.
Kot a afilikemi pwe oupwe küna manau
2.13-17
13 Iwe, äm aipwe fokun kilisou ngeni Kot fansoun meinisin fänäsengesimi pwiim kana mi chen me ren ach Samol. Pun seni lepoputän, Kot a afilikemi pwe oupwe küna manau ren än Ngünmifel apinikemi, pwal ren ämi lükü ewe kapas mi let. 14 Kot a körikemi ngeni ei manau mi fö ren ewe Pworausen Manau aia afalafala ngenikemi. A körikemi pwe oupwe angei wisemi lon lingen ach Samol Jesus Kraist. 15 Iei mine ämi pwiim kana, oupwe üppos o kamwöchünük won ekewe kapas mi let äm aia aiti ngenikemi lon äm kewe afalafal pwal lon ekewe toropwe aia mak ngenikemi.
16 Püsin ach Samol Jesus Kraist me Samach Kot, ewe mi echenikich o fang ngenikich chipen letipach fansoun meinisin pwal ach apilükülüköch ren an ümöümöch, 17 epwe echipa letipemi o apöchökülakemi, pwe oupwe föri o apasa mine a mürina fansoun meinisin.

2:1: 1.Tes 4.15-17

2:4: Tan 11.36; Is 28.2

2:8: Ais 11.4

2:9: Mat 24.24