Aruachön nöün Paulus Toropwe ngeni ekewe Souläng lon
Tesalonika
Kapas akom
I. Chon makkei ei toropwe: Ewe soukünö Paulus.
II. A mak ngeni iö: Ngeni ekewe souläng lon Tesalonika.
III. Itelapemongen ei toropwe: Än Jesus liwinsefäl.
IV. Kapas aüchean ei toropwe: Souläng repwe üppos o kamwöchünük won ekewe kapas mi let.
V. Masouen ei toropwe: Pokiten wewengauen ewe kapas usun än Jesus liwinsefäl a chök soposopola osukosuken chon ewe mwichefel lon Tesalonika. Aruachön nöün Paulus toropwe a pworaus usun ewe lükülük pwe itä ewe ränin än Jesus liwinsefäl a fen fis. Paulus a afataöchü ei ekiek o aiti ngeni ekewe souläng, pwe mwen än Jesus liwinsefäl föför esepwüng me föföringau epwe fokun wattela fän nemenien eman mi monomon itan “Ewe Aramas mi Tipis”, ätewe epwe ü ngeni Kraist.
Ewe soukünö Paulus a aitifichi ngeni chokewe mi aleani ei toropwe aüchean ar repwe nüküchar lon ar lükü, inamwo ika a toriir weires me riaföü, repwe angang pwe epwe wor met repwe manau seni usun Paulus me chienan kewe ra föri, repwe pwal likitü le föri mine a mürina.
VI. Tettelin masouen ei toropwe:
Kapas akom 1.1-2
Kapasen mwareiti me kapasen ing 1.3-12
Kapasen öüröür usun än Jesus epwe liwinsefälito 2.1-17
Kapasen fön usun manauen souläng 3.1-15
Kapasen lesopolan 3.16-18
1
Kapong
1.1-2
Äm Paulus me Timoty aia kapong ngeni chon ewe mwichefel lon Tesalonika, ir nöün Samach Kot me ach Samol Jesus Kraist: Föf 17.1 Samach Kot me ach Samol Jesus Kraist epwe ngenikemi ümöümöch me kinamwe.
Ewe kapwüng lupwen Kraist epwe liwinsefäl
1.3-12
Ämi pwiim kana, äm aia fokun kilisou ngeni Kot fänäsengesimi fansoun meinisin. A pwüng ngenikem pwe aipwe föri ei, pokiten ämi lükülük a fokun fefeitä o ämi chen lefilemi a fokun lapalapala. Iei popun äm aia aingaing womi lein än Kot kewe mwichefel. Aia aingaing won ämi likitü me ämi lükülük lon ekewe ninni me riaföü meinisin mi fis ngenikemi.
Ekei mettoch meinisin ra alletätä pwe än Kot kapwüng a pwüng. Iei popun oupwe fich ngeni ämi oupwe alealong lon Mwün Kot, ewe mwü oua riaföü fänäsengesin. Enlet, Kot epwe föri mine a pwüng: Epwe atoto riaföü won chokewe mi ariaföüükemi, epwe pwal angasakemi ämi mi riaföü, epwe pwal angasakem. Ei epwe fis lupwen ach Samol epwe feito seni läng fiti nöün kewe chon läng mi pöchökül, epwe pwal feito ren ngetengeten ekkei, pwe epwe apwüngü chokewe mi pöütala Kot, resap pwal aleasochis ngeni ewe Pworausen Manau usun ach Samol Jesus. Ir repwe riaföü ren ewe apwüngün feiengau esemüch, repwe imwü seni mwen mesen ach Samol pwal seni an we pöchökül mi amwarar, Ais 2.10 10 lupwen epwe war lon ewe Ränin, nöün kewe chon pin meinisin repwe alinga i o ekewe chon lükülük meinisin repwe asamolu i. Pwal ämi oupwe etiir, pun oua lükü ewe kapasen Kot äm aia aiti ngenikemi.
11 Iei mine äm aia iotek fän itemi fansoun meinisin. Aia tüngor ngeni ach Kot pwe epwe alisikemi, pwe oupwe fich ngeni ewe manau i a körikemiilong lon. Iwe, Kot epwe atufichikemi ren an manaman, pwe oupwe tongeni föri ekewe föför mi mürina meinisin oua mochen föriir, epwe pwal aunusöchü ämi angang oua föri pokiten ämi lükülük. 12 Ren ei iten ach Samol Jesus epwe ling me remi, nge pwal ämi oupwe ling me ren. Ei epwe fis pokiten ümöümöchün ach Kot me ach Samol Jesus ngenikemi.

1:1: Föf 17.1

1:9: Ais 2.10