Tongan Bible (Revised West Version) Hiva ʻa Solomone 3
3
1 Ko e tau ʻae siasi mo e ngaahi meʻa ʻahiʻahi, mo ʻene ikuʻi ia. 6 Ko e vikiviki ʻae siasi koeʻuhi ko Kalaisi.
‌ʻI he ʻeku ʻi hoku mohenga ʻi he pō,
naʻaku kumi kiate ia ʻoku ʻofa ki ai hoku laumālie:
ne u kumi, ka naʻe ʻikai ke ʻiloʻi ia,
Pea ko eni, te u tuʻu hake ʻo ʻalu fano ʻi he ngaahi hala
ʻoe kolo mo e ngaahi hala motuʻa,
pea teu kumi ia ʻaia ʻoku ʻofa ki ai hoku laumālie:
ne u kumi kiate ia, ka naʻe ʻikai te u ʻiloʻi ia.
Naʻe ʻiloʻi au ʻe he kau leʻo ʻoku feʻaluʻaki ʻi he kolo;
pea naʻaku fehuʻi ki ai ʻo pehē,
“Kuo mou mamata kiate ia ʻoku ʻofa ki ai hoku laumālie?”
Pea kuo tuku siʻi atu ʻakinautolu,
pea u ʻilo ia ʻoku ʻofa ki ai hoku laumālie:
pea naʻaku puke ia, pea naʻe ʻikai te u toe tukuange ia,
kaeʻoua ke u ʻomi ia ki he fale ʻo ʻeku faʻē,
mo e potu fale ʻoʻona naʻa ne fanauʻi ai au.
 
‌ʻE ngaahi ʻofefine ʻo Selūsalema, ʻoku ou fekau kiate kimoutolu,
ʻi hoʻomou ʻofa ki he fanga kāseli mo e hainite ʻoe vao,
ke ʻoua naʻa mou ueʻi pe fafangu ʻa hoku ʻofaʻanga,
kaeʻoua ke faʻiteliha pe ia.
Ko hai eni ʻoku haʻu mei he toafa, ʻoku hangē ko e pou ko e kohu ʻoe afi,
pea kuo fakanamu lelei ʻaki ʻae mula mo e laipeno,
mo e ngaahi kakala kotoa pē mei he kau fakatau?
Vakai ki he mohenga ʻo Solomone,
ʻoku kāpui ia ʻe he kau tangata toʻa ʻe toko onongofulu,
mei he kau tangata toʻa ʻo ʻIsileli.
‌ʻOku nau taki taha toʻo ʻae heletā, he ʻoku nau maheni ai mo e tau:
ʻoku taki taha ai ʻene heletā ki hono tuʻa tenga,
naʻa ai ha manavahē ʻi he poʻuli.
Naʻe ngaohi ʻe he tuʻi ko Solomone ha mohenga moʻona,
mei he ngaahi ʻakau ʻo Lepanoni.
10 Naʻa ne ngaohi ʻaki ʻae siliva ʻa hono pou,
pea ko hono faliki ko e koula,
ko hono ʻufiʻufi ko e kulokula,
pea faliki ʻaki ʻi loto ʻae ʻofa ki he ngaahi ʻofefine ʻo Selūsalema.
11 ‌ʻE ngaahi ʻofefine ʻo Saione, mou ʻalu atu, ʻo vakai kia Solomone, ko e tuʻi,
mo e tatā fakatuʻi naʻe tatā ʻaki ia ʻe heʻene faʻē
ʻi he ʻaho ʻo ʻene fakamaʻu ʻunoho,
ʻi he ʻaho ʻoe fiefia ʻa hono loto.