2
1 Ko e feʻofaʻaki ʻa Kalaisi mo hono siasi. 8 Ko e ʻamanaki, 10 Mo e uiuiʻi ʻoe siasi. 14 Ko e tauhi ʻa Kalaisi ki he siasi. 16 Ko e fakahā ʻe he siasi ʻa ʻene tui mo ʻene ʻamanaki lelei.
Ko au ko e lose ʻo Saloni,
ko e lile ʻoe ngaahi teleʻa.
‌ʻO hangē ko e lile ʻi he lotolotonga ʻoe ngaahi ʻakau talatala,
ʻoku pehē ʻa hoku ʻofaʻanga ʻi he ngaahi ʻofefine.
Pea hangē ko e ʻakau ko e moli ki he ngaahi ʻakau ʻoe vao,
ʻoku pehē ʻa hoku ʻofaʻanga ʻi he ʻao ʻoe ngaahi foha.
Ne u nofo hifo ki lalo ʻi hono malumalu,
pea u fiefia lahi,
pea naʻe huʻamelie ʻa hono fua ki hoku ngutu.
Naʻa ne ʻomi au ki he fale keinangaʻanga,
pea naʻe fakamalu ʻaki au ʻae fuka ʻae ʻofa.
Tokoni au ʻaki ʻae uaine,
pea fakafiemālieʻi au ʻaki ʻae ngaahi moli:
he ʻoku ou pongia ʻi he ʻofa.
‌ʻOku ʻi lalo ʻi hoku ʻulu ʻa hono nima toʻohema,
pea ʻoku fāʻufua au ʻe hono nima toʻomataʻu.
‌ʻE ngaahi ʻofefine ʻo Selūsalema,
ʻoku ou fekau kiate kimoutolu, ʻi hoʻomou ʻofa ki he fanga kāseli mo e fanga hainite ʻoe vao,
ke ʻoua naʻa mou ueʻi pe fafangu ʻa hoku ʻofaʻanga,
kaeʻoua ke faʻiteliha pe ia.
Ko e leʻo ʻo hoku ʻofaʻanga! Vakai,
ʻoku haʻu ia mo puna ʻi he ngaahi moʻunga,
pea hopohopo ʻi he ngaahi potu māʻolunga.
‌ʻOku tatau ʻa hoku ʻofaʻanga mo e kāseli pe ko e hainite mui:
vakai, ʻoku tuʻu mai ia mei he tuaʻā,
ʻoku ne fakasio mai mei he ngaahi matapā,
ʻo ne fakahā ia mei he ngaahi kātupa.
10 Naʻe lea mai ʻa hoku ʻofaʻanga, ʻo ne pehē kiate au,
Tuʻu hake ʻa hoku ʻofaʻanga, ko ʻeku tokotaha ʻoku hoihoifua, pea ke haʻu.
11 Vakai, kuo hili ʻae faʻahitaʻu momoko,
pea kuo ʻosi ʻae ʻuha mo mole atu;
12 Kuo tupu hake ʻae ngaahi fisiʻi ʻakau ʻi he funga kelekele,
kuo hoko ʻae ngaahi ʻaho ʻoku hiva ai ʻae fanga manupuna,
pea ʻoku ongoʻi ʻi hota fonua ʻae leʻo ʻoe kulukulu:
13 ‌ʻOku kamata tupu ʻi he ʻakau ko e fiki ʻa hono fua,
pea ʻoku namu lelei mai ʻae fua mui ʻi he ngaahi vaine.
ʻā koe ko hoku ʻofaʻanga, mo ʻeku hoihoifua, ke ke tuʻu hake,
pea ke haʻu.
14 ‌ʻA koe ko ʻeku lupe, ʻoku nofo ʻi he ngaahi ʻanaʻi maka,
mo e ngaahi potu lilolilo ʻoe lilifa,
ke ke fakahā mai ho mata kiate au,
pea tuku ke u fanongo ki ho leʻo;
he ʻoku ke leʻo mālie, pea ʻoku fakaʻofoʻofa ho mata.
15 Ke maʻu mai ʻae fanga fokisi,
ʻae fanga fokisi iiki, ʻaia ʻoku maumauʻi ʻae vaine:
he ʻoku kei mui ʻae fua ʻoe vaine.
16 ‌ʻOku ʻoʻoku ʻa hoku ʻofaʻanga, pea ʻoku ou ʻoʻona au:
ʻoku kai ʻe ia ʻi he potu ʻoe ngaahi lile.
17 Tafoki mai ʻa hoku ʻofaʻanga,
kaeʻoua ke maʻa hake ʻae ʻaho,
pea mole atu ʻae fakapoʻuli,
pea ke tatau koe mo e kāseli pe ko e hainite mui ʻi he ngaahi moʻunga ʻo Peta.