118
1 Ko e enginaki ke fakamālō ki he ʻOtua koeʻuhi ko ʻene ʻaloʻofa. 5 ʻOku fakahā ʻe he tangata tohi saame ko e meʻa lelei ke falala ki he ʻOtua. 19 Pea ʻi he fakatātā kiate ia, ʻoku ne fakahā ʻae hāʻele mai ʻa Kalaisi, pea mo ʻene pule.
1 Mou ʻatu ʻae fakafetaʻi kia Sihova he ʻoku angalelei ia:
koeʻuhi ʻoku tolonga ʻo taʻengata ʻa ʻene ʻaloʻofa.
2 Ke lea ni ʻe ʻIsileli,
“ʻOku tolonga ʻo taʻengata ʻa ʻene ʻaloʻofa.”
3 Ke lea ni ʻae fale ʻo ʻElone,
“ʻOku tolonga ʻo taʻengata ʻa ʻene ʻaloʻofa.”
4 Tuku ke lea ni ʻakinautolu ʻoku nau manavahē kia Sihova, ʻoku tolonga ʻo taʻengata ʻa ʻene ʻaloʻofa.
5 Naʻaku ui kia Sihova ʻi he mamahi:
pea naʻe talia au ʻe Sihova, mo ne tuku au ki he potu ʻataʻatā.
6 ʻOku kau maʻaku ʻa Sihova; ʻe ʻikai te u manavahē ko e hā ʻe faʻa fai ʻe he tangata kiate au.
7 ʻOku fai maʻaku ʻa Sihova mo kinautolu ʻoku nau tokoni au:
ko ia te u mamata ai kiate kinautolu ʻoku nau fehiʻa kiate au.
8 ʻOku lelei lahi ʻae falala kia Sihova ʻi he falala ki he tangata.
9 ʻOku lelei lahi ʻae falala kia Sihova ʻi he falala ki he ngaahi ʻeiki.
10 Naʻe kāpui au ʻe he ngaahi puleʻanga kotoa pē:
ka ʻi he huafa ʻo Sihova te u fakaʻauha ʻakinautolu.
11 Naʻa nau takatakai au; ʻio, naʻa nau kāpui au:
ka ʻi he huafa ʻo Sihova te u fakaʻauha ʻakinautolu.
12 Naʻa nau kāpui au ʻo hangē ko e fanga pi;
kuo tāmateʻi ʻakinautolu ʻo hangē ko e afi ʻi he ʻakau talatala:
he te u fakaʻauha ʻakinautolu ʻi he huafa ʻo Sihova.
13 Kuo ke tekeʻi mālohi au koeʻuhi ke u hinga ai:
ka naʻe tokoni au ʻe Sihova
14 Ko hoku mālohi ʻa Sihova mo ʻeku hiva,
pea kuo hoko ia ko hoku fakamoʻui.
15 Ko e lea ʻoe fiefia mo e fakamoʻui ʻoku ʻi he ngaahi fale fehikitaki ʻoe angatonu:
ʻoku fai mālohi ʻae nima toʻomataʻu ʻo Sihova.
16 Kuo hiki hake ʻae nima toʻomataʻu ʻo Sihova:
ʻoku fai mālohi ʻae nima toʻomataʻu ʻo Sihova.
17 ʻE ʻikai te u mate, kae moʻui,
ʻo fakahā ʻae ngaahi ngāue ʻa Sihova.
18 Kuo tautea fakamamahiʻi au ʻe Sihova:
ka ʻoku teʻeki ai te ne tukuange au ki he mate.
19 Toʻo kiate au ʻae ngaahi matapā ʻoe māʻoniʻoni:
te u hū ai, pea u fakamālō kia Sihova:
20 Ko e matapā eni ʻo Sihova, ʻaia ʻe hū ai ʻae angatonu.
21 Te u fakamālō kiate koe: he kuo ke ongoʻi au,
pea kuo ke hoko ko hoku fakamoʻui.
22 Ko e maka naʻe liʻaki ʻe he kau tufunga kuo hoko ia ko e fungani maka ʻoe tuliki.
23 Ko e ngāue eni ʻa Sihova;
pea ko e meʻa fakaofo ʻi hotau ʻao.
24 Ko e ʻaho eni kuo ngaohi ʻe Sihova;
te tau fiefia pea nekeneka ai.
25 ʻE Sihova, ʻoku ou kole kiate koe, ke ke fakamoʻui ni:
ʻE Sihova, ʻoku ou kole kiate koe, ke ke tuku mai ni ʻae monūʻia.
26 Ke monūʻia ia ʻoku haʻu ʻi he huafa ʻo Sihova:
kuo mau tāpuekina ʻakimoutolu mei he fale ʻo Sihova.
27 Ko e ʻOtua ko Sihova ia, ʻaia kuo ne fakahā ʻae maama kiate kitautolu:
mou nonoʻo ʻae feilaulau ʻaki ʻae ngaahi afo ki he ngaahi nifo, ʻoe feilaulauʻanga.
28 Ko koe ko hoku ʻOtua, pea te u fakamālō kiate koe:
ko koe ko hoku ʻOtua, te u fakahikihikiʻi koe.
29 Mou ʻatu ʻae fakafetaʻi kia Sihova he ʻoku angalelei ia:
koeʻuhi ʻoku tolonga ʻo taʻengata ʻa ʻene ʻaloʻofa.