Tongan Bible (Revised West Version) Saame 73
TOHI 3
73
(Saame 73—89)
1 Ko e ikuʻi ʻe he palōfita ʻae ʻahiʻahi kovi. 2 ʻOku ne fakahā hono tupuʻanga, ʻaia ko e monūʻia ʻoe kau angakovi, 13 Mo hono lavea, ʻaia ko e taʻetui. 15 ʻOku ne ikuna ʻaki ʻene ʻilo ki he tuʻutuʻuni ʻae ʻOtua, ʻi he fakaʻauha ʻoe kau angahala, mo e fakamoʻui ʻoe māʻoniʻoni.
Ko e Saame ʻa ʻAsafi.
Ko e moʻoni ʻoku angalelei ʻae ʻOtua ki ʻIsileli,
ʻio, kiate kinautolu ʻoku loto maʻa.
Ka ko au naʻe meimei mole hoku vaʻe:
naʻaku meimei hekea ʻi heʻeku ngaahi laka.
He naʻaku meheka ʻi he kau vale,
ʻi heʻeku mamata ki he fiemālie ʻae angakovi.
He ʻoku ʻikai hanau mamahi ʻi heʻenau mate:
ka ʻoku maʻu pe honau mālohi.
‌ʻOku ʻikai moʻua ʻi he mamahi ʻakinautolu ʻo hangē ko e kakai kehe;
pea ʻoku ʻikai ʻahiʻahiʻi ʻakinautolu ʻo hangē ko e kakai niʻihi.
Ko ia ʻoku takatakai ai ʻakinautolu ʻe he laukau ʻo hangē ko e ukamea fihifihi;
ʻoku ʻufiʻufi ʻakinautolu ʻe he angamālohi ʻo hangē ko e kofu.
‌ʻOku hohopo honau mata ʻi heʻenau sino:
ʻoku nau maʻu meʻa ʻo lahi hake ʻi he holi ʻoe loto.
Kuo kovi ʻakinautolu, pea lea kovi ʻi he fakamālohi:
ʻoku nau lea fakafiefielahi.
‌ʻOku nau hangatonu atu honau ngutu ʻo angatuʻu ki he ngaahi langi,
pea ʻoku ʻeveʻeva honau ʻelelo ʻi māmani.
10 Ko ia ʻoku liu mai ai ki heni hono kakai: pea ʻoku tatau ʻae vai kiate kinautolu ke pito ʻae ipu.
11 Pea ʻoku nau pehē, “ʻOku ʻilo fēfē ʻe he ʻOtua?
Pea ʻoku ai ha ʻilo ʻi he Fungani Māʻolunga?”
12 Vakai, ko eni ʻae kau angakovi ʻoku fiemālie ʻi he māmani;
ʻoku tupu pē ʻenau koloa.
13 Ko e moʻoni ʻoku taʻeʻaonga ʻeku fakamaʻa hoku loto,
mo ʻeku fanofano hoku nima ʻi he māʻoniʻoni.
14 He kuo ʻahiʻahiʻi au ʻi he ʻaho kotoa pē,
pea kuo tautea au ʻi he pongipongi kotoa pē,
15 Kapau te u tala, te u lea pehē;
vakai, ko ʻeku fai hala ki he toʻutangata ʻo hoʻo fānau.
16 Pea ʻi heʻeku ʻahiʻahi ke ʻilo ʻae meʻa ni,
naʻe faingataʻa ia kiate au;
17 Ka ʻi heʻeku hū ki he faletapu ʻoe ʻOtua;
naʻaku toki ʻilo ai honau ikuʻanga.
18 Ko e moʻoni naʻa ke tuku ʻakinautolu ʻi he ngaahi potu hekeheke:
kuo ke laku hifo ʻakinautolu ki he ngaahi fakaʻauha.
19 Kuo ʻomi vave ʻakinautolu ki he malaʻia,
ʻo hangē ko e kemo pe taha ʻoe mata!
Kuo fakaʻauha ʻaupito ʻakinautolu ʻi he ngaahi ilifia.
20 Hangē ko e misi ʻoka ʻā hake ha taha;
ke pehē pe, ʻE ʻEiki, ʻoka ke ka ʻā hake, te ke manukiʻi honau tatau.
21 Naʻe mamahi pehē pe hoku laumālie,
pea naʻe mahuhuhuhu ai hoku loto.
22 Naʻe pehē ʻeku vale, pea naʻe ʻikai te u ʻilo:
naʻaku hangē ko e manu ʻi ho ʻao.
23 Ka ko e moʻoni ʻoku ou ʻiate koe maʻuaipē:
pea kuo ke puke au ʻi hoku nima toʻomataʻu.
24 Te ke tataki au ʻi hoʻo poto,
pea hili ia te ke maʻu au ki ho nāunau.
25 He ko hai mo koe ʻoku ou maʻu ʻi he loto langi?
Pea ʻoku ʻikai ha tokotaha ʻi māmani ʻoku ou holi ki ai, ka ko koe pē.
26 ‌ʻOku vaivai hoku kakano mo hoku loto:
ka ko e makatuʻu ʻo hoku loto ʻae ʻOtua,
mo hoku ʻinasi ʻo taʻengata.
27 Vakai, ʻe ʻauha ʻakinautolu ʻoku mamaʻo ʻiate koe:
kuo ke fakaʻauha ʻakinautolu kotoa pē ʻoku ʻalu meiate koe ʻo fai kovi.
28 Ka ʻoku lelei kiate au ʻeku ʻunuʻunu ke ofi ki he ʻOtua:
kuo u falala ki he ʻEiki ko Sihova, koeʻuhi ke u fakahā ai hoʻo ngāue kotoa pē.