Tongan Bible (Revised West Version) Saame 59
59
1 ʻOku lotu ʻa Tevita ke moʻui ia mei hono ngaahi fili. 6 ʻOku hanu ia ʻi heʻenau fai fakamamahi. 8 ʻOku ne falala ki he ʻOtua. 11 ʻOku lotu ia telia ʻakinautolu, 16 Pea fakamālō ki he ʻOtua.
Ki he Takimuʻa, ʻAli-Tasikiti, ko e Saame mahuʻinga ʻa Tevita, ʻi he fekau ʻa Saula ke nau leʻohi ʻae fale ke tāmateʻi ia.
‌ʻE hoku ʻOtua, ke ke fakahaofi au mei hoku ngaahi fili:
maluʻi au meiate kinautolu ʻoku tuʻu hake kiate au.
Ke ke fakahaofi au mei he kau fai kovi mo ke fakamoʻui au mei he kau tangata pani toto.
Vakai, ʻoku nau tatali ʻo lama ki hoku laumālie:
ʻE Sihova, kuo kātoa fakataha ʻae kau mālohi kiate au:
ka ʻoku ʻikai ʻi heʻeku talangataʻa, pe ko ʻeku angahala.
‌ʻOku nau feleleʻi ʻo teuʻi ʻakinautolu, ka ʻoku ʻikai haʻaku kovi:
ke ke ʻā ke tokoni au, pea ke ʻafioʻi.
Pea ko koe, ʻE Sihova, ko e ʻOtua, ʻoe ngaahi tokolahi, ko e ʻOtua ʻo ʻIsileli,
ke ke ʻā hake ʻo ʻahiʻahi ki he hiteni kotoa pē:
ʻoua naʻa ke ʻaloʻofa ki he kau angakovi kākā.
Sila.
‌ʻOku nau liu mai ʻi he efiafi: ʻoku nau longoaʻa ʻo hangē ko e kulī,
pea ʻalu fakatakamilo ʻi he kolo.
Vakai, ʻoku nau hake ʻi honau ngutu:
ʻoku ʻi honau loungutu ʻae ngaahi heletā:
he ʻoku nau pehē, “ko hai ʻoku ne fanongo?”
Ka ko koe, ʻE Sihova, te ke kata kiate kinautolu;
te ke manuki ki he hiteni kotoa pē.
Pea koeʻuhi ko ʻene mālohi ko ia te u tatali ai kiate koe:
he ko hoku hūfanga ʻae ʻOtua.
10 Ko e ʻOtua ʻoku ʻaloʻofa kiate au te ne tokoni au:
ʻe tuku kiate au ʻe he ʻOtua ke u mamata ki heʻeku holi ki hoku ngaahi fili.
11 ‌ʻOua naʻa ke tāmateʻi ʻakinautolu, telia naʻa ngalo ʻi hoku kakai;
fakahēʻi ʻakinautolu ke mamaʻo ʻi ho mālohi;
pea ʻohifo ki lalo ʻakinautolu, ʻE ʻEiki, ko homau fakaū.
12 Ko e meʻa ʻi he angahala ʻa honau ngutu, mo e ngaahi lea ʻa honau loungutu,
tuku ke moʻua ai ʻakinautolu ʻi heʻenau laukau:
koeʻuhi ko e kape mo e loi ʻoku nau lea ʻaki.
13 Fakaʻauha ʻakinautolu ʻi he houhau,
fakaʻauha ʻakinautolu ke ʻoua naʻa kei ai ʻakinautolu:
pea tuku ke ʻilo ʻekinautolu ʻoku pule, ʻae ʻOtua, ʻia Sēkope,
ʻo aʻu ki he ngaahi ngataʻanga ʻo māmani.
Sila.
14 Pea tuku kenau liu mai ʻi he efiafi;
tuku kenau longoaʻa ʻo hangē ko e kulī, ʻo ʻalu fakatakamilo ʻi he kolo.
15 Tuku kenau ʻalu ʻo hē fano ai pē ʻo kumi kai,
pea lāunga ʻo kapau ʻe ʻikai tenau mākona.
16 Ka te u hiva au ki ho mālohi;
ʻio, te u hiva mālohi ʻi hoʻo ʻaloʻofa ʻi he pongipongi:
he ko hoku ungaʻanga koe,
mo e hūfanga kiate au ʻi he ʻaho ʻo ʻeku mamahi.
17 ‌ʻE hoku mālohi, te u hiva kiate koe:
he ko hoku kalofanga ʻae ʻOtua, ko e ʻOtua ʻoku ʻaloʻofa kiate au.