Tongan Bible (Revised West Version) Saame 58
58
1 ʻOku valoki ʻe Tevita ʻae kau fakamaau angakovi. 3 ʻOku ne fakahā ʻae anga ʻoe kakai angahala. 6 ʻOku tuku ʻakinautolu ki he fakamaau ʻae ʻOtua. 10 Ko e fiefia ai ʻae kakai māʻoniʻoni.
Ki he Takimuʻa, ʻAli-Tasikiti, ko e Saame mahuʻinga ʻa Tevita.
‌ʻAe fakataha, ʻoku moʻoni ʻa hoʻomou lea māʻoniʻoni ʻakimoutolu?
ʻAe ngaahi foha ʻoe tangata, ʻoku mou fakamaau totonu koā?
‌ʻIo, ʻoku mou fai kovi ʻi loto;
ʻoku mou fakamamafa ʻae kovi ʻo homou nima ʻi māmani.
Talu ʻae māvae ʻae angakovi mo e manāva mo ʻenau hē:
ʻoku nau ʻalu hē leva talu ʻenau fanauʻi, ʻi he lea loi.
Ko honau kona ʻoku hangē ko e kona ʻoe ngata:
ʻoku nau tatau mo e ngata tuli ʻoku ne tāpuni hono telinga;
‌ʻAia ʻe ʻikai tokanga ki he leʻo ʻoe kau fakafiemālie,
neongo ʻae poto lahi ʻoe tangata faiva.
‌ʻE ʻOtua, ke ke sili honau kau nifo ʻi honau ngutu:
ʻE Sihova, pakiʻi ʻo toʻo kituʻa ʻae kau nifo lahi ʻoe fanga laione mui.
Tuku ke vela ʻo vai ʻakinautolu ʻo hangē ko e vai ʻoku tafe maʻuaipē:
ʻoka teteke ʻe ia ʻene kau fana ke fana ʻaki ʻene ngaahi ngahau, tuku ke tuʻutuʻu ʻakinautolu.
Ke mole ʻo ʻosi ʻakinautolu ʻo hangē ko e sineli:
tuku ke nau hangē ko e tama taʻehoko ʻae fefine, koeʻuhi ke ʻoua naʻa nau mamata ki he laʻā.
‌ʻI he teʻeki vela ki hoʻomou kulo ʻae okooko ʻakau talatala,
ʻe ʻosi ʻene ʻave moʻui ʻakinautolu ʻi hono houhau, ʻo hangē ko e ʻahiohio.
10 ‌ʻE fiefia ʻae māʻoniʻoni ʻi heʻene mamata ki he totongi:
ʻe fufulu ʻe ia hono vaʻe ʻi he toto ʻoe angakovi.
11 Ko ia ʻe pehē ai ʻe he tangata, “Ko e moʻoni ʻoku ai ʻae totongi ki he māʻoniʻoni:
ko e moʻoni ko e ʻOtua ia ʻoku fakamaau ʻi māmani.”