Tongan Bible (Revised West Version) Saame 45
45
1 Ko e māfimafi mo e ʻofa ʻoe puleʻanga ʻo Kalaisi. 10 Ko e ngāue ʻae siasi mo hono lelei ʻo ia.
Ki he Takimuʻa ʻi he Sosanimi, ko e akonaki ki he ngaahi foha ʻo Kola, ko e Hiva ki he ngaahi ʻofa.
‌ʻOku mapuna hake ʻi hoku loto ʻae meʻa lelei:
te u lea ki he meʻa kuo u ngaohi ki he tuʻi:
ko hoku ʻelelo ko e peni ki he tohi vave.
‌ʻOku ke fakaʻofoʻofa lahi ʻi he ngaahi fānau ʻae tangata:
kuo lilingi ʻae ʻofa ki ho loungutu:
ko ia kuo fakamonūʻia ai koe ʻe he ʻOtua ʻo lauikuonga.
‌ʻE Fungani Māfimafi ke ke nonoʻo hoʻo heletā ki ho tuʻatenga,
ʻi ho nāunau mo ho mālohi.
Pea ʻi hoʻo māfimafi ke ke hāʻele monūʻia,
ko e meʻa ʻi he moʻoni mo e angavaivai mo e māʻoniʻoni;
pea ʻe ako kiate koe ʻe ho nima toʻomataʻu ʻae ngaahi meʻa fakailifia.
‌ʻOku māsila hoʻo ngaahi ngahau ʻi he loto ʻoe ngaahi fili ʻoe tuʻi;
ʻoku tō ki lalo ʻae kakai ʻiate koe.
‌ʻE ʻOtua, ko ho nofoʻanga ʻoku lauikuonga pea taʻengata:
ko e tokotoko ʻo ho puleʻanga ko e tokotoko māʻoniʻoni ia.
‌ʻOku ke ʻofa ki he māʻoniʻoni, pea fehiʻa ki he angahala:
ko ia ko e ʻOtua ko ho ʻOtua, kuo ne tākai ʻaki koe ʻae lolo ʻoe fiefia ʻo lahi hake ʻi ho kāinga.
‌ʻOku namu mula, mo ʻalosi, mo kāsia, ʻa ho ngaahi kofu kotoa pē,
mei he ngaahi fale lei, ʻaia kuo nau fakafiefiaʻi koe.
Naʻe ʻi hoʻo kau fefine ongolelei ʻae ngaahi ʻofefine ʻoe ngaahi tuʻi:
naʻe tuʻu ʻae tuʻi fefine ʻi ho nima toʻomataʻu ʻi he koula mei Ofeli.
10 Fakafanongo, ʻE ʻofefine, pea tokanga, ʻo fakatokangaʻi ho telinga;
fakangaloʻi foki hoʻo kakai ʻaʻau, mo e fale ʻo hoʻo tamai;
11 Ko ia ʻe manako lahi ai ʻae tuʻi ki ho hoihoifua:
he ko ho ʻEiki ia; pea ke hū kiate ia.
12 Pea ʻe ʻi ai ʻae ʻofefine ʻo Taia mo e meʻaʻofa;
ko e kau koloaʻia ʻi he kakai te nau kumi lahi ki hoʻo ʻofa.
13 Ko e ʻofefine ʻoe tuʻi ʻoku lelei lahi ʻi loto;
ko hono ngaahi kofu kuo lalanga ʻaki ʻae koula.
14 ‌ʻE ʻomi ia ki he tuʻi ʻi he kofu ʻoku matamatalelei hono tuitui:
ko e kau tāupoʻou ko hono kaumeʻa ʻaia ʻoku muimui kiate ia ʻe omi ʻakinautolu kiate koe.
15 ‌ʻE omi ʻakinautolu ʻi he fiefia mo e nekeneka:
te nau hū ki he fale ʻoe tuʻi.
16 ‌ʻE fetongi hoʻo ngaahi tamai ʻe hoʻo fānau,
ʻaia te ke fakanofo ko e ngaahi ʻeiki ʻi māmani kotoa pē.
17 Te u fai ke manatuʻi ʻa ho huafa ʻi he toʻutangata kotoa pē:
ko ia ʻe fakafetaʻi ʻae kakai kiate koe ʻo lauikuonga pea taʻengata.