Tongan Bible (Revised West Version) Saame 21
21
1 Ko e fakafetaʻi ʻi he tuku mai ʻae mālohi, 7 Mo e ʻamanaki ki he tokoni ʻamui.
Ki he Takimuʻa, ko e Saame ʻa Tevita.
‌ʻE Sihova, ʻe fiefia ʻae tuʻi ʻi ho mālohi;
pea ʻe fiefia lahi ʻaupito ia ʻi hoʻo fakamoʻui.
Kuo ke foaki kiate ia ʻae holi ʻa hono loto,
pea naʻe ʻikai te ke taʻofi ʻiate ia ʻae kole ʻa hono loungutu.
Sila.
He ʻoku ke tokoni ʻaki ia ʻae ngaahi tāpuaki ʻoe lelei:
ʻoku ke ʻai ki hono fofonga ʻae tatā fakatuʻi ʻoe koula lelei.
Naʻa ne kole ʻae moʻui ʻiate koe, pea naʻa ke foaki ia kiate ia,
ʻio, ʻae ngaahi ʻaho lōloa ʻo taʻengata pea taʻengata.
‌ʻOku lahi ʻene vikiviki ʻi hoʻo fakamoʻui:
kuo ke tuku kiate ia ʻae fakaʻapaʻapa mo e nāunau.
He kuo ke ngaohi ia ke mātuʻaki monūʻia ʻo taʻengata:
kuo ke fakafiefia lahi ʻaupito ia ʻaki ho fofonga.
He ʻoku falala ʻae tuʻi kia Sihova,
pea ko e meʻa ʻi he ʻaloʻofa ʻoe Fungani Māʻolunga ʻe ʻikai ueʻi ia.
‌ʻE ʻilo ʻe ho nima ʻa ho ngaahi fili kotoa pē:
pea ʻe ʻilo ʻe ho nima toʻomataʻu ʻakinautolu ʻoku fehiʻa kiate koe.
Te ke ngaohi ʻakinautolu ke hangē ko e ngotoʻumu vela ʻi he ʻaho ʻo hoʻo tuputāmaki:
ʻe fakaʻauha ʻakinautolu ʻe Sihova ʻi hono houhau,
ʻe keina ʻo ʻosi ʻakinautolu ʻe he afi.
10 Te ke fakaʻauha honau fua mei he fonua,
mo honau hako mei he ngaahi fānau ʻae tangata.
11 He naʻa nau tokanga ke fai kovi kiate koe:
naʻa nau fakatupu ʻae mahalo kovi, ʻaia naʻe ʻikai te nau faʻa fai.
12 Ko ia te ke fai ke fulituʻa ʻakinautolu,
ʻoka ke ka ʻai ʻae ngaahi ngahau ki he uka ki he mata ʻokinautolu.
13 Ke ke māʻolunga, ʻE Sihova, ʻi he mālohi ʻoʻou:
ko ia te mau hiva mo fakamālō ai ki hoʻo māfimafi.