25
1 Ko e ngaahi lea ʻoku kau ki he ngaahi tuʻi, 8 Pea ke ʻoua ʻe kau ʻi he ngaahi fekeʻikeʻi mo e meʻa ʻoku tupu ai ia.
Ko eni foki ʻae ngaahi lea fakatātā ʻa Solomone, ʻaia naʻe hiki ʻe he kau tangata ʻa Hesekaia ko e tuʻi ʻo Siuta.
Ko e nāunau ia ʻoe ʻOtua ke fakafufū ha meʻa:
ka ko e meʻa ʻe ongoongolelei ai ʻae ngaahi tuʻi ke kumi ke ʻilo ʻae ngaahi meʻa.
Ko e langi ʻi hono māʻolunga, mo e māmani ʻi hono taumamaʻo,
mo e loto ʻoe ngaahi tuʻi, ʻoku taʻefaʻaʻiloʻi.
Ke toʻo atu ʻae ʻuli mei he siliva,
pea ʻe ngaohi mei ai ha ipu ʻe ia ʻoku ne fakamaʻa siliva.
Ke ʻave ʻae angahala mei he ʻao ʻoe tuʻi,
pea ʻe fokotuʻumaʻu ai hono nofoʻa fakaʻeiʻeiki ʻi he māʻoniʻoni.
‌ʻOua naʻa ke hiki hake koe ʻi he ʻao ʻoe tuʻi,
pea ʻoua naʻa ke tuʻu ʻi he potu ʻoe kakai māʻolunga.
He ʻoku lelei hake ke lea ʻo pehē kiate koe, “ʻAlu hake koe ki heni;”
ʻi he tuku koe ʻo fakamaʻulalo ʻi he ʻao ʻoe tuʻi kuo ke mamata ki ai.
‌ʻOua naʻa ke ʻalu fakavave atu ke fakakikihi,
telia naʻa ʻe ʻikai te ke ʻilo ʻae meʻa ke fai ʻoka ʻosi ia, ʻoka fakamaaʻi koe ʻe ho kaungāʻapi.
Ke mo fai toko ua pe hoʻo mo fakakikihi mo ho kaungāʻapi;
pea ʻoua naʻa fakahā ha tala fakalilolilo ki ha taha kehe:
10 Telia naʻa fakamaaʻi koe ʻe ia ʻoku fanongo ki ai,
pea ʻikai toe foki meiate koe ho ongoongo kovi.
11 Ko e lea ʻoku ngali mo totonu hono leaʻaki,
ʻoku hangē ia ko e ʻapele koula ʻi ha ipu siliva.
12 ‌ʻO hangē ko e hau koula mo e teunga ʻoe koula lelei,
ʻoku pehē ia ʻaia ʻoku valoki fakapotopoto kiate ia ʻoku telinga ongo.
13 ‌ʻO hangē ko e momoko ʻoe ʻuha hinehina ʻi he lolotonga ʻae ututaʻu,
ʻoku pehē ʻae talafekau totonu kiate kinautolu ʻoku nau fekauʻi ia:
he ʻoku ne fakafiemālie ʻe ia ki he loto ʻo ʻene houʻeiki.
14 Ko ia ia ʻoku polepole ʻi ha foaki loi,
ʻoku hangē ia ko e ngaahi ʻao mo e matangi taʻehanoʻuha.
15 ‌ʻOku fakalotoʻi ʻae tuʻi ʻi he fai fakakukafi,
pea ʻoku fesiʻi ʻae hui ʻe he ʻelelo molū.
16 Kuo ke ʻilo ha honi? Kai ai koe ke mākona lelei pe,
telia naʻa ke fatufāʻia ai,
pea lua ʻaki.
17 Ke taʻofi ho vaʻe mei he fale ʻo ho kaungāʻapi;
telia naʻa fiu ia ʻiate koe, pea fehiʻa ai kiate koe.
18 Ko e tangata ʻoku fakamoʻoni loi ki hono kaungāʻapi,
ʻoku hangē ia ko e ʻakau fakapō, mo e heletā, pea mo e ngahau māsila.
19 Ko e falala ʻi he tuʻutāmaki ki ha tangata taʻeangatonu,
ʻoku hangē ia ko e nifo popo, pe ko e vaʻe kuo tapeva.
20 ‌ʻOku hangē ko e tangata ʻoku toʻo ʻo ʻave ha kofu ʻi he faʻahitaʻu momoko,
pea hangē ko e fefiofi ʻae vaimahi mo e naita,
ʻoku pehē ʻaia ʻoku hiva ʻaki ʻae ngaahi fasi ki he loto māfasia.
21 Kapau ʻoku fiekaia ho fili, foaki ki ai ʻae mā ke ne kai;
pea kapau ʻoku fieinua, foaki kiate ia ʻae vai ke inu:
22 He te ke hilifaki ai ʻae malalaʻi afi ki hono ʻulu,
pea ʻe totongi lelei ʻe Sihova kiate koe.
23 ‌ʻOku tupu ʻae ʻuha mei he matangi tokelau;
ʻoku pehē foki ʻoku tupu ʻae matalili mei he ʻelelo ʻoe fakakovi.
24 ‌ʻOku lelei hake ʻae nofo ʻi he tuliki ʻi he tuʻa fale,
ʻi he nofo mo ha fefine faʻa kē ʻi ha fale ʻoku fuʻu ʻatā.
25 ‌ʻOku hangē ko e vai momoko kiate ia ʻoku fieinua,
ʻoku pehē ʻae ongoongolelei mei he fonua mamaʻo.
26 Ko e hinga ʻae tangata māʻoniʻoni ʻi he ʻao ʻoe kau angahala,
ʻoku hangē ia ko e matavai kuo fakangaueue, mo e vaitafe kuo fakaʻuliʻi.
27 ‌ʻOku ʻikai lelei ke kai lahi ʻi he honi:
pea pehē, ko e kumi ʻe he kakai honau ongoongolelei ʻonautolu pe ʻoku ʻikai ko e ongoongolelei ia.
28 Ko ia ia ʻoku ʻikai faʻa puleʻi hono laumālie ʻoʻona,
ʻoku tatau ia mo e kolo kuo holoki hifo, pea ʻoku ʻikai hano ʻā.