Tongan Bible (Revised West Version) Lea Fakatātā 12
12
1–28 Pea hokohoko atu ki he ngaahi vahe hoko...
Ko ia ʻoku manako ki he ako ʻoku manako ki he poto:
ka ko ia ʻoku fehiʻa ki he valoki ʻoku anga fakamanu ia.
‌ʻOku finangalo lelei ʻa Sihova ki he tangata angalelei:
ka ʻe fakamaau ʻe ia ʻae tangata ʻoku filioʻi kovi.
‌ʻE ʻikai fokotuʻumaʻu ha tangata ʻe he angahala:
ka ʻe ʻikai ngaue ʻae aka ʻoe māʻoniʻoni.
Ko e fefine angalelei ko e tatā ia ki hono ʻunoho:
ka ko ia ʻoku fakamā ʻoku hangē ia ko e popo ki hono ngaahi hui.
‌ʻOku totonu ʻae ngaahi mahalo ʻae māʻoniʻoni:
ka ko e ngaahi fakakaukau ʻae angahala ko e kākā ia.
‌ʻOku alea ʻae angahala ke tatali toitoi ke lilingi toto:
ka ʻoku fakamoʻui ʻakinautolu ʻe he ngutu ʻoe angatonu.
‌ʻOku tulaki hifo ʻae angahala, pea ʻikai ʻakinautolu:
ka ʻe tuʻumaʻu ʻae fale ʻoe māʻoniʻoni.
‌ʻE fakamālōʻia, ʻae tangata ʻo fakatatau ki heʻene poto:
ka ʻe manukiʻi ia ʻaia ʻoku loto talangataʻa.
Ko ia ʻoku fehiʻanekina, ka ʻoku tauhi ia ʻe ia pe,
ʻoku lelei lahi hake ia ʻiate ia ʻoku fakaongoongolelei ia, ʻe ia pe, kae masiva meʻakai.
10 ‌ʻOku tokangaʻi ʻe he tangata māʻoniʻoni ʻae moʻui ʻa ʻene manu:
ka ko e manavaʻofa ʻae angahala ko e fakamālohi pe ia.
11 Ko ia ʻoku faʻa keli hono potu kelekele ʻe mākona ia ʻi he meʻakai:
ka ko ia ʻoku muimui ki he kakai vale ʻoku masiva ia ʻi he ʻilo.
12 ‌ʻOku manako ʻae angahala ki he kolo ʻae kakai angakovi:
ka ʻoku tupu ʻae fua mei he aka ʻoe māʻoniʻoni.
13 ‌ʻOku tauheleʻi ʻae angahala ʻe he talangataʻa ʻa hono loungutu:
ka ʻe hao mai ʻae angatonu mei he kovi.
14 ‌ʻE fakamākona ʻae tangata ʻaki ʻae lelei ʻi he fua ʻo hono ngutu:
pea ʻe ʻomi ki he tangata ʻae tupu ʻoe ngāue ʻa hono nima.
15 ‌ʻOku totonu ʻae hala ʻoe vale ʻi hono mata ʻoʻona:
ka ko ia ʻoku ongoʻi ʻae akonaki ʻoku poto ia.
16 ‌ʻOku ʻilo leva ʻae ʻita ʻoe vale:
ka ʻoku ʻufiʻufi ʻe he tangata fakamākukanga ʻae fakamā.
17 Ko ia ʻoku lea ʻaki ʻae moʻoni ʻoku fakahā ʻe ia ʻae māʻoniʻoni:
ka ʻoku fakahā ʻae kākā ʻe he fakamoʻoni loi.
18 ‌ʻOku ai ʻaia ʻoka lea ʻoku hangē ko e tui ʻaki ha heletā:
ka ko e meʻa fakamoʻui ʻae ʻelelo ʻoe poto.
19 ‌ʻE fokotuʻumaʻu ʻo taʻengata ʻae loungutu ʻoku lea ʻaki ʻae moʻoni:
ka ʻoku ʻosi ʻi he kemo pe taha ʻae ʻelelo ʻoku loi.
20 ‌ʻOku ai ʻae kākā ʻi he loto ʻonautolu ʻoku filioʻi kovi:
ka ʻoku ai ʻae fiefia kiate kinautolu ʻoku alea ki he melino.
21 ‌ʻOku ʻikai ha kovi ʻe hoko ki he angatonu:
ka ʻe fakafonu ʻaki ʻae kovi ʻae angahala.
22 Ko e meʻa fakalielia kia Sihova ʻae loungutu faʻa loi:
ka ʻoku fiefia ia ʻiate kinautolu ʻoku fai fakamoʻomoʻoni.
23 ‌ʻOku fakafufū ʻe he tangata fakamākukanga ʻa ʻene ʻilo:
ka ʻoku fakahā ʻe he loto ʻoe vale ʻae vale.
24 ‌ʻE maʻu ʻae pule ʻe he nima ʻoe faʻa ngāue:
ka ʻe moʻulaloa ki he tukuhau ʻaia ʻoku fakapikopiko.
25 Ko e māfasia ʻi he loto ʻoe tangata ʻoku mapelu ai ia:
ka ʻoku fakafiefiaʻi ia ʻe he lea lelei.
26 ‌ʻOku lelei hake ʻae māʻoniʻoni ʻi hono kaungāʻapi:
ka ʻoku kākāʻia ʻae angahala ʻe honau hala.
27 ‌ʻOku ʻikai ke taʻo ʻe he tangata fakapikopiko ʻae meʻa naʻa ne maʻu ʻi heʻene tuli:
ka ʻoku mahuʻinga ʻae koloa ʻoe tangata faʻa ngāue.
28 ‌ʻOku ai ʻae moʻui ʻi he hala ʻoe māʻoniʻoni,
pea ʻi hono ʻalunga ʻoku ʻikai ai ha mate.