Tongan Bible (Revised West Version) Lea Fakatātā 11
11
1–31 Pea hokohoko atu ki he ngaahi vahe hoko...
Ko e fai kākā ʻi he fakamamafa meʻa ko e fakalielia kia Sihova:
ka ʻoku ne leleiʻia ʻi he fakamamafa totonu.
‌ʻOka hoko ʻae fielahi, ʻoku hoko foki mo e mā:
ka ʻoku ʻi he angavaivai ʻae poto.
‌ʻE fakahinohinoʻi ʻae angatonu ʻe heʻenau fai totonu:
ka ʻe fakaʻauha ʻae angahala ʻe heʻenau talangataʻa.
‌ʻOku ʻikai ʻaonga ʻae koloa ʻi he ʻaho ʻoe houhau:
ka ʻoku fakahaofi mei he mate ʻae māʻoniʻoni.
‌ʻE fakatonutonu ʻae hala ʻoe haohaoa ʻi heʻene māʻoniʻoni:
ka ʻe hinga ʻae angahala ʻi heʻene angahala ʻaʻana.
‌ʻE fakamoʻui ʻae māʻoniʻoni ʻi heʻenau angatonu:
ka ʻe moʻua ʻae angahala ʻi heʻenau kovi ʻanautolu.
‌ʻOka mate ʻae tangata angahala, ʻe ʻauha ai ʻene ʻamanaki:
pea ʻoku ʻauha mo e ʻamanaki ʻoe taʻeangatonu.
‌ʻOku fakamoʻui ʻae māʻoniʻoni mei he mamahi,
pea kuo tongia ia ʻe he tangata angahala.
‌ʻOku fakamalaʻia ʻe he tangata kākā ʻa hono kāinga ʻaki hono ngutu:
ka ko e meʻa ʻi he ʻilo ʻe fakamoʻui ʻae angatonu.
10 ‌ʻOku fiefia ʻae kolo ʻi he monūʻia ʻae māʻoniʻoni:
pea ʻi he mate ʻae angahala ʻoku ai ʻae mavava.
11 ‌ʻOku hakeakiʻi ʻae kolo ʻi he tāpuaki ʻoe angatonu:
ka ʻoku holoki hifo ia ʻe he ngutu ʻoe angahala.
12 Ko ia ʻoku masiva poto ʻoku ne fehiʻa ki hono kaungāʻapi:
ka ʻoku fakalongo pē ʻae tangata poto.
13 ‌ʻOku fakahā ʻae ngaahi tala fufū ʻe ia ʻoku fakalanga lau:
ka ko ia ʻoku loto totonu ʻoku ne ʻufiʻufi ʻae meʻa.
14 ‌ʻI he ʻikai ha faʻa fakakaukau ʻoku hinga ʻae kakai:
ka ʻoku ai ʻae maluʻi ʻi he fakakaukau ʻae toko lahi.
15 Ko ia ʻoku ne tongia ha taha foʻou ʻe mamahi ai ia:
pea ko ia ʻoku fehiʻa ke fai ʻae fetongi ʻe tuʻutuʻumālie ia.
16 ‌ʻOku maʻu ʻi he fefine angalelei ʻae ongoongolelei:
pea ʻoku maʻu pe ki he kakai mālohi ʻenau koloa.
17 ‌ʻOku fai lelei ʻe he tangata angaʻofa ki hono laumālie ʻoʻona:
ka ko ia ʻoka anga fakamālohi ʻoku ne fakamamahiʻi hono kakano ʻoʻona.
18 ‌ʻOku fai ʻe he angahala ʻae ngāue fakakākaaʻi:
ka ʻe maʻu ʻae totongi moʻoni ʻe ia ʻoku tūtuuʻi ʻae māʻoniʻoni.
19 ‌ʻO hangē ʻoku fakatau ʻae māʻoniʻoni ki he moʻui:
ʻoku pehē, ko ia ʻoku tulituli pau ki he kovi ʻoku ne fai ia ke ne mate ai ia.
20 Ko kinautolu ʻoku loto pikopiko ʻoku fakalielia kia Sihova:
ka ʻoku fiemālie ia ʻiate kinautolu ʻoku totonu honau hala.
21 Neongo ʻae fepukeaki ʻae nima ʻoe kakai angahala ʻe ʻikai taʻetautea ʻakinautolu:
ka ʻe fakamoʻui ʻae hako ʻoe māʻoniʻoni.
22 ‌ʻO hangē ko e mama koula ʻi he ihu ʻoe puaka,
ʻoku pehē ʻae fefine hoihoifua ʻoku ʻikai ke anga fakapotopoto.
23 ‌ʻOku lelei maʻu pe ʻae holi ʻae kakai māʻoniʻoni:
ka ko e houhau ʻoku ʻamanaki ki ai ʻae angahala.
24 ‌ʻOku ai ʻaia ʻoku faʻa foaki, kae maʻu ai ʻo lahi:
pea ʻoku ai ʻoku taʻofi ʻi he meʻa ʻoku totonu ke fai,
ka ʻoku tupu ai ʻa ʻene masiva.
25 ‌ʻE fakamaʻumeʻaʻi ʻae loto ʻoku faʻa ʻofa:
pea ko ia ʻoku faʻa fakaviviku ʻe fakaviviku ia foki.
26 ‌ʻE fakamalaʻia ia ʻe he kakai ʻaia ʻoku taʻofi ʻae meʻakai:
ka ʻe hilifaki ʻae monūʻia ki hono ʻulu ʻaia ʻoku faʻa fakatau ia.
27 ‌ʻOku maʻu ʻae ongoongolelei ʻe ia ʻoku kumi fakamātoato ki he lelei:
ka ko ia ʻoku kumi ki he kovi, ʻe hoko mai pe ia kiate ia.
28 ‌ʻE hinga ia ʻaia ʻoku falala ki heʻene koloa:
ka ʻe tupu ʻae māʻoniʻoni ʻo hangē ko e vaʻa.
29 Ko ia ʻoku faʻa fakafiuʻi ʻa hono fale ʻoʻona, ʻe maʻu pe ʻe ia ʻae matangi:
pea ʻe hoko ʻae vale ko e tamaioʻeiki kiate ia ʻoku poto hono loto.
30 Ko e fua ʻoe māʻoniʻoni ʻoku hangē ko e ʻakau ʻoe moʻui;
pea ko ia ʻoku lavaʻi ʻae ngaahi laumālie ʻoku poto ia.
31 Vakai, ʻe maʻu totongi ʻae māʻoniʻoni ʻi he māmani:
ka ʻe lahi hake ʻene maʻu totongi ʻe he angakovi mo e angahala.