Tongan Bible (Revised West Version) Siope 16
16
1 ʻOku tauteʻi ʻe Siope ʻa hono kāinga koeʻuhi ko ʻenau taʻeʻofa. 7 ʻOku ne fakamatala ʻae anga ʻoe meʻa mamahi ʻoku ʻiate ia. 17 ʻOku ne fakamoʻoni ki heʻene māʻoniʻoni.
Pea naʻe toki tali ʻe Siope, ʻo ne pehē,
Kuo lahi ʻae meʻa pehē kuo u fanongo ai:
ko e kau fakafiemālie fakamamahi ʻakimoutolu kotoa pē.
‌ʻE ngata afe ʻae launoa?
Pe ko e hā ʻoku ne tokoniʻi koe ke ke tali?
Te u faʻa lea foki ʻeau ʻo hangē pe ko kimoutolu:
ka ne fetongi ʻaki homou laumālie ʻa hoku laumālie,
te u faʻa fokotuʻu lea kiate kimoutolu,
pea te u kalokalo hoku ʻulu kiate kimoutolu.
Ka te u tokoniʻi ʻakimoutolu ʻaki hoku ngutu,
pea ko e ueʻi ʻo hoku loungutu ʻe fakafiemālieʻi ʻakimoutolu.
 
“Neongo ʻeku lea, ʻoku ʻikai fakasiʻisiʻi ʻeku mamahi:
pea kapau te u taʻofi, ko e hā ʻeku fiemālie ai?
Ka ko eni, kuo ne fakakikinaʻi au:
kuo ke fakaʻauha ʻa hoku kāinga kotoa pē.
Kuo ke ʻufiʻufi ʻaki au ʻae feʻufeʻu, ko e fakamoʻoni ia:
pea ʻoku ha hake hoku tutue ʻo valoki ki hoku mata.
‌ʻOku ne haehae au ʻi hono houhau,
ʻaia ʻoku fehiʻa kiate au ʻoku ne fengaiʻitaki hono nifo kiate au,
ʻoku matalili ʻa hoku fili kiate au.
10 Kuo nau fakamanga honau ngutu kiate au;
kuo taaʻi manuki au ʻi hoku kouʻahe;
kuo nau fakataha ʻakinautolu kiate au.
11 Kuo tukuange au ʻe he ʻOtua ki he kakai angahala,
pea kuo ne lī au ki he nima ʻoe kakai fai kovi.
12 Ne u fiemālie, ka kuo ne maumauʻi au:
kuo ne kuku foki hoku kia, ʻo laiki au,
ʻo fokotuʻu au ko hono fanaʻanga.
13 ‌ʻOku tuʻu takatakai kiate au ʻene kau tangata fana,
ʻoku ne fahiua hoku konga loto, ʻo ʻikai tuku;
ʻoku ne lilingi hoku ʻahu ki he kelekele.
14 ‌ʻOku ne maumauʻi au ʻaki ʻae tā ki he tā,
ʻoku ne ʻohofia au ʻo hangē pe ha fuʻu tangata lahi.
15 Kuo u tuitui ʻae tauangaʻa ki hoku kili,
ʻo fakaʻuliʻi hoku nifo ʻi he efu.
16 ‌ʻOku kovi hoku mata ʻi he tangi,
pea ʻoku ʻi hoku laumata ʻae malumalu ʻoe mate;
17 Ka ʻoku ʻikai ʻi ha taʻetotonu kuo ʻi hoku nima:
pea ʻoku māʻoniʻoni foki ʻeku lotu.
 
18 “ʻE kelekele, ʻoua naʻa ke ʻuʻufi hoku toto,
pea ʻoua naʻa hao ki ha potu ʻa ʻeku tangi.
19 Ko eni foki, vakai, ʻoku ʻi he langi hoku fakamoʻoni,
pea ko ia ʻoku ne ʻiloʻi au ʻoku ʻi ʻolunga.
20 ‌ʻOku manukiʻi au ʻe hoku ngaahi kāinga:
ka ʻoku lilingi ʻae loʻimata ʻa hoku mata ki he ʻOtua.
21 Taumaiā ke faʻa alea ʻae tangata mo e ʻOtua,
ʻo hangē ko e tangata mo hono kaungāʻapi! 22 ‌ʻOka hokosia ʻae ngaahi taʻu siʻi,
te u toki ʻalu ʻi he hala ʻe ʻikai te u foki mei ai.