3
1 ʻOku lauʻikoviʻi ʻe Siope ʻae ʻaho ʻa hono fanauʻi mo e ngāue naʻe fai ʻi ai. 13 Ko e fiemālie ʻoe mate. 20 ʻOku lāunga ia ki he moʻui, koeʻuhi ko ʻene mamahi.
Pea hili ia naʻe mafaʻa ʻae ngutu ʻo Siope, ʻo ne lauʻikoviʻi ʻa hono ʻaho. Pea lea ʻa Siope, ʻo ne pehē,
“Ke ʻauha ʻae ʻaho naʻe fanauʻi ai au,
mo e pō ko ia naʻe kalanga ai, ‘Kuo fanauʻi ʻae tama tangata.’
Ke fakapoʻuli ʻae ʻaho ko ia;
ke ʻoua naʻa tokanga ki ai ʻae ʻOtua mei ʻolunga,
pea ʻoua naʻa ulo ai ʻae maama.
Ke maʻu ia ʻe he fakapoʻuli mo e ʻata ʻoe mate;
ke heka maʻu ki ai ʻae ʻao matolu;
ke fakailifia ia ʻe he fakapoʻuli ʻoe ʻaho.
Ke ʻohofi ʻae pō ko ia ʻe he fakapoʻuli matolu;
ke ʻoua naʻa fakahoko ia ki he ngaahi ʻaho ʻoe taʻu,
pe kau ia ʻi he lau ʻoe ngaahi māhina.
‌ʻIo, ke lala ʻae pō ko ia,
ke ʻoua naʻa ʻi ai ha leʻo fakafiefia.
Ke kapeʻi ia ʻekinautolu ʻoku laukoviʻi ʻae ʻaho,
ʻakinautolu ʻoku nau teu ke fai hake ʻenau lāunga.
Ke fakapoʻuli ʻae ngaahi fetuʻu ʻo hono efiafi poʻuli;
ke holi ia ki he maama,
kaeʻoua siʻi naʻa ʻi ai;
pea ʻoua naʻa ʻilo ʻe ia ʻae maʻa ʻae ʻaho:
10 Koeʻuhi naʻe ʻikai ke tāpuni ʻae ngaahi matapā ʻoe manāva kiate au,
pe fufū ʻae mamahi mei hoku mata.
11 “Ko e hā naʻe ʻikai ai te u mate mei he manāva?
Ko e hā naʻe ʻikai ai te u tukuange hoku laumālie ʻi heʻeku haʻu mei he fatu?
12 Ko e hā naʻe tali teu ʻai au ʻe he foʻi tui?
Mo e huhu koeʻuhi ke u huhu ai?
13 He ka ne ʻikai, pehē kuo u tokoto taʻengāue eni pea longo pe,
pea u mohe pe ʻo mālōlō ai,
14 ‌ʻO fakataha mo e ngaahi tuʻi mo e ngaahi pule ʻo māmani,
naʻa nau langa moʻonautolu ʻae ngaahi potu naʻe lala;
15 Pea fakataha mo e ngaahi ʻeiki naʻe maʻu koula,
naʻa nau fakapito honau ngaahi fale ʻaki ʻae siliva:
16 Pea teu ʻikai ʻo hangē ko e tama tō ʻi he fufū;
ʻo hangē ko e fānau ʻoku ʻikai mamata ki he maama.
17 ‌ʻOku ngata ʻi ai ʻae fakamamahi ʻe he kau angahala;
pea mālōlō ʻi ai ʻae kau ongosia.
18 ‌ʻOku mālōlō fakataha ai ʻae kau pōpula;
ʻoku ʻikai ke nau ongoʻi ai ʻae leʻo ʻoe fakamālohi.
19 ‌ʻOku ʻi ai ʻae iiki mo e lalahi;
pea tauʻatāina ai ʻae tamaioʻeiki mei heʻene ʻeiki.
20 “Ko e hā ʻoku tuku ai ʻae maama kiate ia ʻoku ʻi he mamahi,
mo e moʻui kiate ia ʻoku laumālie mamahi;
21 ‌ʻAia ʻoku holi ki he mate, ka ʻoku ʻikai ia;
pea lahi ʻene kumi ki ai ʻi heʻene kumi ki he ngaahi koloa fufū;
22 ‌ʻAkinautolu ʻoku nekeneka ʻaupito,
mo fiefia, ʻoka nau ka ʻilo ʻae faʻitoka?
23  Ko e hā kuo foaki ai ʻae maama ki he tangata kuo fakapuli hono hala,
pea kuo ʻākilotoa ia ʻe he ʻOtua?
24 He ʻoku muʻomuʻa ʻeku ngaahi toʻe ki heʻeku kai,
pea ko ʻeku tangi kalanga ʻoku lilingi atu ʻo hangē ko e vai.
25 Hē ko e meʻa ne u manavahē lahi ki ai kuo tō ia kiate au,
pea ko ia ne u ilifia ai kuo hoko mai.
26 Naʻe ʻikai te u fiemālie, pe te u mālōlō, pe te u nofo noa pe;
ka naʻe hoko pe ʻae mamahi.”