Tongan Bible (Revised West Version) ʻAmosi 5
5
1 Ko e tangilāulau koeʻuhi ko ʻIsileli, 4 Ko e enginaki ki he fakatomala. 21 ʻOku liʻaki ʻe he ʻOtua ʻa ʻenau ngāue fakamālualoi.
Fanongo ki he lea ni, ʻoku ou ʻai kiate kimoutolu, ʻi he tangilāulau, ʻe fale ʻo ʻIsileli.
“Kuo hinga ʻae taʻahine ʻa ʻIsileli,
ʻe ʻikai te ne toetuʻu;
kuo liʻaki ia ʻi hono fonua;
ʻoku ʻikai ha taha ke toe fokotuʻu ia.”
He ʻoku pehē ʻe Sihova, ko e ʻOtua;
“Ko e kolo naʻe ʻalu ai ʻae toko taha afe, ʻe toe pe ʻae toko teau,
pea ko ia naʻe ʻalu ai ʻae toko teau, ʻe toe pe ʻae toko hongofulu, ki he fale ʻo ʻIsileli.
¶ Pea ʻoku pehē ʻe Sihova ki he fale ʻo ʻIsileli,
“Kumi kiate au, pea te mou moʻui:
Kaeʻoua naʻa kumi ʻa Peteli,
pe hū ki Kilikali,
pea ʻoua naʻa laka ki Peasipa:
koeʻuhi ʻe ʻalu moʻoni ʻa Kilikali ke pōpula,
pea ʻe hoko ʻa Peteli ko e meʻa noa pē.
Kumi kia Sihova, pea te mou moʻui telia naʻa hā mai ia,
hangē ko e afi ʻi he fale ʻo Siosefa,
pea ne keina ia, kae ʻikai ha taha ʻi Peteli ke fuʻifuʻi ia.
Ko kimoutolu ʻoku liliu ʻae fakamaau ko e ʻakau kona,
pea mou tuku ʻae angatonu ʻi he fonua,
Kumi ia naʻa ne ngaohi ʻae fetuʻu ʻe fitu mo ʻOlioni,
pea ʻoku ne liliu ʻae ʻata ʻoe mate ko e pongipongi,
pea ne ngaohi ʻae ʻaho ke poʻuli ʻi he pō:
pea ʻoku ne ui ʻae ngaahi vai ʻoe tahi,
pea ne lilingi ia ki he funga ʻoe fonua: ko Sihova hono huafa:
‌ʻOku ne fakamālohi ʻae vetekina ki he mālohi,
koeʻuhi ke tauʻi ʻe he vetekina ʻae kolo.
10 ‌ʻOku nau fehiʻa kiate ia ʻoku fai ʻae valoki ʻi he matapā,
pea ʻoku nau fākaliliʻa kiate ia ʻoku lea ʻi he angatonu.
11 Koeʻuhi ko e meʻa ʻi hoʻomou malakiʻi ʻae kakai masiva,
pea ʻoku mou toʻo meiate ia ʻae ngaahi kavenga uite:
kuo mou langa ʻae ngaahi fale ʻaki ʻae maka kuo tā,
ka ʻe ʻikai te mou nofo ai;
kuo mou tō ʻae ngaahi ngoue vaine matamatalelei,
ka ʻe ʻikai te mou inu uaine mei ai.
12 He ʻoku ou ʻilo hoʻomou ngaahi talangataʻa lahi,
pea mo hoʻomou fungani angahala:
ʻoku nau fakamamahiʻi ʻae angatonu,
ʻoku nau maʻu tukungoue,
pea ʻoku nau fakateketeke atu ʻae kakai masiva ʻi he matapā.
13 Ko ia ʻe longo ai ʻae fakapotopoto ʻi he kuonga ko ia;
he ko e kuonga kovi.
14 Kumi ʻae lelei, kae ʻikai ko e kovi,
koeʻuhi ke mou moʻui:
ko ia, ko Sihova ko e ʻOtua ʻoe ngaahi tokolahi, te ne ʻiate kimoutolu,
ʻo hangē ko hoʻomou lea.
15 Fehiʻa ki he kovi, pea ʻofa ki he lelei,
pea fokotuʻumaʻu ʻae fakamaau ʻi he matapā;
heiʻilo pe ʻe ʻaloʻofa ʻa Sihova, ko e ʻOtua ʻoe ngaahi kautau, ki he toenga ʻo Siosefa.”
16 Ko ia ko Sihova ko e ʻOtua ʻoe ngaahi kautau, ko e ʻEiki, ʻoku pehē,
“ʻE ʻi ai ʻae tangi ʻi he ngaahi hala kotoa pē;
pea te nau pehē ʻi he ngaahi hala motuʻa kotoa pē, ‘ʻOiauē! ʻOiauē!’
Pea te nau ui ʻae tangata ngoue ki he tangi,
pea mo kinautolu ʻoku poto ʻi he tangilāulau ke fai ʻae tangi.
17 Pea ʻe ʻi ai ʻae tangi ʻi he ngoue vaine kotoa pē:
he te u laka mai ʻiate koe,” ʻoku pehē ʻe Sihova.
18 “Malaʻia kiate kimoutolu ʻoku holi ki he ʻaho ʻo Sihova!
He koeʻumaʻā ia kiate kimoutolu?
Ko e ʻaho ʻo Sihova kuo poʻuli,
kae ʻikai maama.
19 Hangē ko e tangata ʻoku hola mei he laione,
pea ʻoku ne fakafetaulaki mo ha pea;
pe ko ha taha ne hū ki fale, pea ne faʻaki hono nima ki he holisi,
ka naʻe ʻuusi ia ʻe ha ngata.
20 ‌ʻIkai ʻe poʻuli ʻae ʻaho ʻo Sihova, pea ʻikai maama?
ʻIo, ko e poʻuli ʻaupito, ka ʻe ʻikai ʻi ai ha maama siʻi ke ulo?
21 “ʻOku ou fehiʻa, ʻoku ou fakaliliʻa ki homou ngaahi ʻaho kātoanga,
pea ʻe ʻikai te u nanamu ki hoʻomou ngaahi fakataha mamafa.
22 Neongo ʻoku mou hifo ʻaki ʻae ngaahi feilaulau tutu mo e ngaahi feilaulau meʻakai,
ʻe ʻikai te u maʻu ia:
pea ʻe ʻikai te u tokangaʻi ʻae ngaahi feilaulau fakalelei ʻo hoʻomou fanga manu sino.
23 Hiki ke mamaʻo ʻiate au ʻae longoaʻa ʻo hoʻomou hiva;
he ʻe ʻikai te u fanongo ki he mālie ʻo hoʻomou ngaahi meʻa faiva.
24 Ka ʻe tuku ʻae fakamaau ke tafe hangē ko e vai,
pea mo e angatonu hangē ko e vaitafe mālohi.
25 “Kuo mou hifo ʻaki ʻae ngaahi feilaulau mo e ngaahi hifo kiate au, ʻi he taʻu ʻe fāngofulu ʻi he toafa, ʻe fale ʻo ʻIsileli? 26 Ka kuo mou fua ʻae fale fehikitaki ʻo homou Moloke mo Kiuni, ko hoʻomou ongo tamapua, ko e fetuʻu ʻo homou ʻotua, ʻaia naʻa mou ngaohi moʻomoutolu. 27 Ko ia te u pule ke mou ʻalu pōpula kituʻa Tamasikusi:” ʻoku pehē ʻa Sihova, ʻaia ko hono huafa, ko e ʻOtua ʻoe ngaahi kautau.