2
Béaa kâra pai wâjué me côwâ kà Pwi Ukai
1 Tèpa cèikî béebà, [nümabà na bà pacâmuriwà] goro ê pai o wâjué côwâ kà Pwi Ukai kâjè Iésu Kériso, bau ê pai o naanaimarijè kêe, ba na jè tâa ma wàé. 2 Guwà cibwaa nama gùmagù ê pwâranümawà, wiàna rà ina pàra tàpé pâ, é jèe wâjué côwâ* É jèe wâjué côwâ—Grec: É jèe tèepaa i Tòotù kà Pwi Ukai., [ba jèkutâ na pwâ].  pwiri rà o ina pâ, nye ê *Nyuâaê Pwicîri na é nye paari tàra pwiri, wâna âcôwâ† Ê Nyuâaê Pwicîri, na é nye paari tàra pwiri, wâna âcôwâ—Grec: Gée goro ê nyuâaê. Pai ina wèe pâ, vision, é, prophétie (popai naa na nee Pwiduée)., é, rà o ina pâ, wàibà na wii tàra pwiri. 3 1 Timotéo 4.1; 1 Ioane 2.18, 4.3Bwa! Guwà cibwaa nama rà ipa-imwüruwà!
Ée mwa tèepaa me ‘A cicara’
O càcaa pâji tèepaa i tòotù-bà, béaa kâra pai tèepaa kâra [pàra muru. Ba o mwa mara coo] ê pàara, na rà o cicara Pwiduée tèpa âboro na rà dau wâru. Â ée mwa cipàpaa wà pwina ina gooé pâ A cicara‡ Acicara—Pwi ukai kà tàpé na rà cicara Pwiduée, ma êgòjai pâ naèà kêe.. Â wà pwiibà, âna o mwa tubatiàué.
4 Ézékiel 28.2; Daniel 11.36Ée mwa piècaari diri ê pâ namuru na pwicîri, ma diri ê pwina rà ipwamaina ma papwicîri wà tèpa âboro. Â ée mwa ipwamainaê côwâ, ma ina mwara pâ, é tâdòiti jii diri pâ muru. É mwa pâra na too, na tâa na ê wâra pwapwicîri kà Pwiduée, ma inapàpari pâ, wàé Pwiduée! 5 Go jèe nye ina tàwà diri pâ pwiibà, na pàara na ia go bwaa tâa jaawà. É, gona guwà ipwanauri pwiri?
6 Wà A cicara, âna o càcaa pâri ma é ipaarié, béaa kâra ê tòotù kêe. Ba pwa pwina é pacooé tiagoro pwi tòotù bèepwiri.  guwà nye tâmogòori bwàti wà pwiibৠDernière phrase—Càcaa pwéelaa tâjè nabà ê pwina é pacoo Acicara. Pwiri ê naèà kâra mwaciri kà tèpa Roma, é, ê Nyuâaê Pwicîri, é, wakè kâra wâra pwapwicîri, é wà Mikaéla, wà pwi ukai kà tèpa angela. Côo mwara Angela naa na Neeremuru (Vocabulaire), ma Daniel 10.13,20–21.. 7 Âjupâra pâ, é jèe tàgére wakè ni gòropuu, ê pàtàmee na é cicara Pwiduée. Êco na, tiagoro nabà, âna wàijè co tèpa naî Pwiduée na jè côoinaê.  wiàna é càùé côwâ wà pwina é pacooé, 8 Ésaïe 11.4; Auinapàpari 19.15â wà A cicara, âna ée mwa cipàpaa. [Wàéni ê pwina o tèepaa têe na pwâadèreè]:
Ée mwa tèepaa
Pwi Ukai Iésu,
na pwényuâa kêe.
Ée mwa nama é bà,
wiàna é upié goro pwêe.
Ée mwa nama tiàué awé,
goro pai tèepaa me,
naa muugère kêe!
9 Auinapàpari 13.11–13[Êco na, béaa kâra pwiibà, âna] wà A cicara, âna ée mwa pwa pâ câmu na wâru, goro ê pàtàma *Caatana—ê pâ muru na rà o pò goo wà tèpa âboro, â o ipa-imwürurà goo. 10 Â o wâru mwara pâ muru na èpà, na ée mwa pwa, ba na é pwâgàri tèpa âboro. Wà tàpéebà, âna o tiàurà awé, ba tàutàra goo ê âjupâra. Ba wiàna rà gére tòpi, â pwiri rà o udò, [â o tâa tàra ê *âji wâro].
11 Nye wà Pwiduée, na [é panuâ ma o wàrapwiri, ba] é panuâ ê pwi pàtàmee-bà na èpà, ma é ipa-imwürurà. Â rà o cèikî naa goo ê pwina pwâ. 12 Â ée mwa tèirà ma naa wârimuru tàra, gée goo na wâdé tàra na rà pwa na èpà, jii na rà cèikî naa goro ê âjupâra.
Bénabwé popai
13 Éféso 1.4; 2 Tésalonika 1.3Tèpa cèikî béebà, dau wânüma Pwi Ukai tàwà, â wâdé na bà ciburà pwaolé têe goowà! Ba é jèe tàmara pitòrigariwà napwiri* Napwiri—é, Béaa kâra diri tèpa âboro., ba na é pa-udòwà [ma o tâa tàwà ê âji wâro]. Â é wàrapwiri goro ê Nyuâaê Pwicîri kêe, na é nama guwà tèpa âboro pwicîri kà Pwiduée, â gée goro pai cèikî kàwà naa goro ê âjupâra. 14 Â é todàwà, na ia bà picémara tàwà ê *Picémara Wâdé, ba na guwà tâa na pai maina ma muugère kà Pwi Ukai kâjè Iésu Kériso. 15 Êkaa na wàrapwiri, co tèpa béebà, na wâdé na guwà tà mwü [naa na cèikî kàwà]. Â guwà cimwü naa goo ê popai na ia bà naa tàwà, naa na pwâratùra, é, na bà wii tàwà naa na pâ tii.
16 Wà Pwiduée Caa kâjè, âna dau wânümee tâjè. Â gée goro ê *pimeaari imudi kêe, â é nye ciburà pagòojè dàra gòiri. Â é jèe naa tâjè ê cèikî na maina, na pàara na jè bwaa tapacîri diri pâ wâdé na ée mwa naa tâjè. Â bà ilari jiiru ma wà Pwi Ukai Iésu Kériso pâ, 17 na ru pagòowà, ba na [o câguwà caa piwâ na] guwà ciburà pwa ma ina ê pwina wâdé!
*2:2 É jèe wâjué côwâ—Grec: É jèe tèepaa i Tòotù kà Pwi Ukai.
†2:2 Ê Nyuâaê Pwicîri, na é nye paari tàra pwiri, wâna âcôwâ—Grec: Gée goro ê nyuâaê. Pai ina wèe pâ, vision, é, prophétie (popai naa na nee Pwiduée).
2:3 1 Timotéo 4.1; 1 Ioane 2.18, 4.3
‡2:3 Acicara—Pwi ukai kà tàpé na rà cicara Pwiduée, ma êgòjai pâ naèà kêe.
2:4 Ézékiel 28.2; Daniel 11.36
§2:6 Dernière phrase—Càcaa pwéelaa tâjè nabà ê pwina é pacoo Acicara. Pwiri ê naèà kâra mwaciri kà tèpa Roma, é, ê Nyuâaê Pwicîri, é, wakè kâra wâra pwapwicîri, é wà Mikaéla, wà pwi ukai kà tèpa angela. Côo mwara Angela naa na Neeremuru (Vocabulaire), ma Daniel 10.13,20–21.
2:8 Ésaïe 11.4; Auinapàpari 19.15
2:9 Auinapàpari 13.11–13
2:13 Éféso 1.4; 2 Tésalonika 1.3
*2:13 Napwiri—é, Béaa kâra diri tèpa âboro.