1 MAIN, der kotin kaloke ia ni omui kupur jued, o der kame ia ni omui onion.

2 Pwe japwilim omui kananan kajik katieu lel don ia, o lim omui katoutou ia.

3 Jota mau kot ni pali war ai pweki omui onion, o jota moleilei nan kokon ai kan pweki dip ai

4 Pwe dip ai kin kadupaledi mon ai, re kin katoutou ia dueta meakot me toutou melel.

5 Ai ola kan pojuedela o nanan pweki ai pweipwei.

6 I kin koj pena o pairok wei alialu, i kin injenjued anjau karoj,

7 Pwe lonelon ai monedier melel, o jota mau kot ni pali war ai.

8  Nai luetalar melel o i wokiwok pajaner. I kin janejan, pweki monion i jota kak moleilei.

9 Main, kom kotin mani ai inon karoj, o ai janejan jota rir jan komui.

10 Monion i rerer, ai kelail ko janer re i, o marain en maj ai pil rotorotala.

11 Kompoke pai o ai warok kan kin doowei jan ia, o juedeki ai kalokolok, o jau i kan kin doo jan ia.

12 O me kin inon ion kame ia la, kin majamajan ia, o me men wia jued on ia, kin indinda duen ar pan wiada dodok jued, o re kin widiwidin anjau karoj.

13 A nai dueta me jalonepon amen, me jota ron waja, o dueta me loton, me jota kak jar pajan au a.

14  Nai dueta ol amen me jolar ron waja, o jota depuk en lokaia mi nan au ai.

15 A i kin auiaui komui, Main. Komui Main ai Kot pan kotin japen ia.

16 Pwe i men, ren der peren kin ia. Ma nä i pan krijedi, re pan peren kida melel.

17 Pwe i koren ion pupedi, o ai kalokolok kin koren ion ia anjau karoj.

18 Pwe i weokada dip ai kan o juedeki dip ai.

19 A ai imwintiti kan memaureta o irail me kelail; me kailon kin ia ni jota karepa me toto.

20 O me kin depukki ai me mau me jued, kin palian ia, pweki ai dadaurata me mau.

21 Ieowa ai Kot, kom der muei jan ia o der doowei jan ia!

22 Kom kotin madan don ia, Main jauaj pa i.