22
A IEJUJ kotin japen o pil karajeraj on irail majani: Wein nanlan rajon nanmarki amen, me kamadipe na ol ni ran en a kapapaud. O a kadarala na ladu kan, pwen luke don kamadip o, me kileledier akan; a re kan kodo. A pil kadarala akai ladu majani: Kaireki me kileledier akan: Kilan, i kaonopadar ai kamadip o: nai kau ol o man wi kan me kamelar, o karoj nikier, ko don kamadip en kapapaud! A irail jota injenoki, ap kowei, amen nan jap we, o amen ko on dodok. A me tei kan jaikidi a ladu kan kaloke o kame ir ala. Nanmarki ap makara kidar, kadarala a jaunpei kan, kamela me lolap oko o ijikedar ar kanim o. A ap indan a ladu kan: Ari, kamadip onoper, a me kileledier akan jota war on. Komail ari kowei nan al akan, a karoj me komail diar, en kalua don kamadip o. 10 Ladu kan ap kola nani al akan, kapokon pena karoj, me irail diaradar, me jued o me mau kan; kamadip ari tounlar. 11 A nanmarki lao pwarado, en kilan toun kamadip, ap diaradar aramaj amen, me jota a kapwat, 12 A ap majani on i: Kompoke pai, iaduen om kak pedelon, pwe jota om kapwat? I ari japaimokid. 13 Nanmarki ap majani on papa kan: Jaliedi i pa o nä akan, ale o kajapokela nan rotorot liki iei wajan maiei o teterok. 14 Pwe me toto paekeredo, a me malaulau piladar. 15 Parijär ap pokon pena, kaparok pena duen ar pan kajapuna i jan a majan; 16 Irail ap kadaralan i nairail tounpadak kan ianaki ladun Erodej kan, potoan on: Jaunpadak, je aja, ir me kotin melel, o kotin kawewe melel duen al en Kot o re jota kotin kupuroki meamen, pwe re jota kotin kajampwaleki janjal en aramaj. 17 Ari, re kotin majani on kit kupur ar. Me pun, en nopwei on nanmarki de jo? 18 A Iejuj lao kotin mani ar me juet, ap majani: Malaun komail, da me komail kajonejon kin ia? 19 Kajale don ia moni en nopwei! Irail ap potoan on i denar eu. 20 A kotin majani on irail: Mom en ij o intin wet? 21 Irail potoan on i: En nanmarki, a i kotin majani on irail: Ari, komail ki on nanmarki, me nain nanmarki, o on Kot, me japwilim en Kot. 22 Irail lao ronadar met, rap puriamuiki o muei jan i, o koieilar. 23 Ran ota Jadujär akai ko don i, me kin inda, me dene me melar akan jolar pan maureda, ap kalelapok re a. 24 Indada: Jaunpadak, Mojej majani, ma meamen melar o jota na jeri, ri a ol en id paudeki a paud, pwen kaipwi on ri a kadaudok a. 25 Ari, pwin pirien eu mi re at, ol ijimen. Mejeni paudeki li amen, ap melar, a jota kadaudok a, ap kakaliki on ri a ol a paud; 26 Pil dueta kariamen o kajilimen kokola lao kaijimen. 27 A ikmuri li o pil melar. 28 Ari; ni en me melar akan ar pan iajada, a pan en ij a paud ren me ijimen, pwe irail karoj me paudekidar i? 29 A Iejuj kotin japen majani on irail: Komail meid japun pwe komail jo weweki kijin likau kan de mana en Kot. 30 Pwe me mauredar akan jolar pan papaud de kapapaud, pwe irail dueta tounlan en Kot akan, me mimi nanlan. 31 Komail jaik doropwe duen en melar akan ar pan maureda, me lolok on komail jan ren Kot, me kotin majani: 32  Nai Kot en Apraam o en Ijaak o en Iakop? A kaidin Kot en me melar akan, pwe en me maur akan. 33 A pokon o lao ronadar met, irail ap puriamuiki a padak. 34 A Parijär akan lao ronadar, me a kotin kadukiedier Jadujär akan, ap pokon pena. 35 Amen irail, jaunkawewe men, kajonejon i potoan on: 36 Jaunpadak, kujoned da me lapalap nan kapun o? 37 A Iejuj kotin majani on i: Koe en pokeki on Kot om Kaun monion om unjok, o nen om unjok, o om lamelam unjok. 38 Iei met me moa en kujoned akan. 39 O me kariau me dueta: Koe en pok on men imp om dueta on pein koe. 40 Kujoned riau met me audepan kapun o jaukop akan. 41 Ni en Parijär akan ar momod pena, Iejuj ap kotin kainoma re ’rail. 42 Majani: Da me komail lamelame duen Krijtuj, nain ij i? Re potoan on: Japwilim en Dawid. 43 A kotin majani on irail: A iaduen da me Dawid kaadaneki i Kaun ren Nen ni a majani: 44 Kaun o kotin majani on ai Kaun, mondi on ni pali maun i, lao I pan wia kida om imwintiti utipan nä om? 45 A iaduen, ma Dawid kaadaneki i Kaun, a pil pan kak na ol? 46 A jota amen, me kak japenki i meakot, o jolar me idok meakot re a kokolata.