Paipel ÄN SALOMON KÖL 5
5
Kofoti, en mi wor tongom me rei, üa feito ren tanipii we.
Üa ionifengeni ai säfei mi aüchea itan mör me ai nofitin mongö,
üa neni ai fasen chunen me chönün,
üa pwal ünümi ünümei wain me ünümei milik.
Oupwe mongö o ün, ämi chienei.
Ämi chienei mi achengicheng, oupwe fokun ün.
Riaföün toaufesen
5.2-8
Fefin
Üa möür, nge letipei a nela.
Iwe, üa tan pwe üa rongorong pwe ätewe mi wor tongan me rei a fichifich o apasa,
“Kopwe suki ngeniei asamen imwom, acheniei mi achengicheng,
nei lisom pwal nei mi fokun limelimöch.
Mökürei a chöchön ren amurenipwin,
nge meten mökürei a chöchön ren chichin amurenipwin.”
Üa fen pwilitawu üfei.
Ifa usun ai üpwe pwilitisefälielong?
Üa fen talü pechei.
Ifa usun ai üpwe alimengauasefäli?
Iwe, ätewe mi wor tongan me rei a aitielong pöün lon pwangen asamen imwei,
nge letipei a fokun mwökütüküt ren.
Üa pwätä pwe üpwe suki asamen imwei ngeni ätewe mi wor tongan me rei,
nge pei me aüti ra sür ren säfei mi aüchea itan mör,
lupwen üa atapa lokun ewe asam.
Iwe, üa suki asamen imwei ngeni ätewe mi wor tongan me rei,
nge i a fen kul o feila.
Ngüni a süla, pun ese chüen nom.
Üa kütta ätewe mi wor tongan me rei, nge üsap küna.
Üa köri, nge esap pälüeniei.
Ekewe chon mas ra künaei, lupwen ra feilfetal lon ewe telinimw.
Iwe, ra wichiei o akinasaei.
Ekewe chon mas won tittin ewe telinimw ra urusi seniei mine üa filiti ngeniei.
Üa tüngor ngenikemi, ämi föpwülün Jerusalem,
are oua küna ätewe mi wor tongan me rei,
oupwe üreni pwe üa riaföü ren ai tongei.
Ewe fin apwüpwülü söfö a mwareiti ewe mwän apwüpwülü söfö
5.9-6.3
Chienan fefin
En mi liöch seni fefin meinisin,
ren met ätewe mi wor tongan me reöm a aüchea seni ekewe lusun mwän?
Ren met ätewe mi wor tongan me reöm a aüchea seni ekewe lusun mwän,
pwe a iei usun om tüngor ngenikem?
Fefin
10 Ätewe mi wor tongan me rei a unusen äteöch o mesemesöch,
a sil me lein engol ngeröü aramas.
11 Möküran a usun chök kolt mi mürina,
nge meten möküran ra rürü
o chol usun ülen eman ängä.
12 Föün mesan ra mürina usun chök lisom mi nom ünükün chanpupu o tütü lon milik,
ra masolong lon lenier usun fau aüchea.
13 Sapan ra wewe ngeni lenien irän nofitin mongö mi fokun pwokus.
Tinawan a usun kiop
ra sup ren säfei mi aüchea itan mör.
14 Iwe, pöün ra wewe ngeni fochun kolt
ra fout ngeni ring a wor faü aüchea lor.
Inisin a motoutou usun chök ngiin äläfan,
a pwal fout ngeni fau aüchea itan safaia.
15 Pechen ra usun chök ür seni ewe fau itan alapaster,
ra longolong won kolt.
Iwe, lapalapan a wewe ngeni ewe chuk Lapanon,
a pwal mürina usun ewe irä setar.
16 An kapas a fokun pwetete.
Ellet, a fokun äteöch.
Iei usun lapalapen ätewe mi wor tongan me rei,
ämi föpwülün Jerusalem.
Chienan fefin