Paipel ÄN SALOMON KÖL 6
6
Ia ätewe mi wor tongan me reöm a feila ie,
en mi liöch seni fefin meinisin?
Ia a feila ie,
pwe aipwe etuk le kütta?
Fefin
Ätewe mi wor tongan me rei a feila ren tanipin we
ia ekewe irän nofitin mongö ra mär ie.
Ikenan epwe foleni nöün pwiin sip
o fichifich kiop.
Aüküki me ren, ngang nöün, nge aükükün me rei, i nei.
A foleni nöün pwiin sip lein ekewe kiop.
Ewe mwän apwüpwülü söfö a mwareiti ewe fin apwüpwülü söfö
6.4-7.5
Mwän
En mi wor tongom me rei,
ka liöch usun ekewe telinimw Tirsa me Jerusalem,
nge ka pwal eniwokus usun eu mwichen sounfiu fän ar filäik.
Kopwe akulu mesom seniei,
pun üa tiperukoruk rer.
Meten mökürom a usun chök epwi pwiin kuuch
ra tötiu me won ekewe chukun Kiliat.
Ngiim ra pwech usun chök epwi pwiin sip
ra liwinto seni ar lenien tütü.
Ir meinisin a wor nöür lippwe,
esap wor eman me leir a aemanüla.
Sapom ra woparapar fän pwölüpwölün won mesom usun chök pekin apel.
A wor wone kiwinnen ewe king me walik ülüpwülüan,
pwal föpwül resap lea.
Nge ngang üa chök tongei eman,
neminewe mi liöch usun eman lisom.
I chök eman won inan,
a pwal lieson me won.
Lupwen ekewe föpwül ra küna, ra apasa pwe a feiöch,
nge kiwinnen ewe king me ülüpwülüan meinisin ra mwareiti.
10 Iö we a ling usun chök mallen rän,
a tinöch usun maram o saramaram usun akkar,
nge a pwal eniwokus usun eu mwichen sounfiu fän ar filäik?
11 Üa feitiu ren ewe tanipin almont,
pwe üpwe nengeni ekewe irä mi pwüküfö lon ewe lemol,
pun üa mochen silei ika ekewe irän wain ra sawit,
ika ekewe apel ra ua.
12 Iwe, üse mörüei mwo, nge ai mochen a nukieila
won wän nei aramas woken, pwe üpwe ar samol.
Chienan fefin
13 Kopwe liwinto, kopwe liwinto, en föpwülün Sulam,
kopwe liwinto, kopwe liwinto pwe aipwe tongeni atolok.
Mwän
Pwota oua mochen katol ewe föpwülün Sulam,
lupwen a pwörük lefilen ruu telin chon katol?