Paipel KÖLFEL 122
122
Eu iotekin kinamwe fän iten chon Jerusalem
122.1-9
Echö kölün feitä än Tafit.
Üa pwapwa, lupwen ra üreniei,
“Ousipwe feila ren imwen ewe Samol mi Lapalap.”
Iei äm aia tolong lon asamalapom kewe
o ütä lon, en Jerusalem.
 
Jerusalem a kaüsefälitä
usun eu telinimw mi nükünüköch.
Chon ekewe ainang ra feitä ie,
ekewe ainangen Israel,
pwe repwe kilisou ngeni ewe Samol mi Lapalap,
usun a fen allük ngeniir.
Ikenan mi wor lenien mot fän iten chokewe mi eäni kapwüng,
ekewe lenien motun king fän iten chon leimwen Tafit.
 
Oupwe tüngor pwe epwe wor kinamwe lon Jerusalem,
“Amwo chokewe mi echenuk repwe feiöch.
Epwe wor kinamwe lon tittum, Jerusalem,
o imwom kewe imwen king repwe nükünük.”
Pokiten pwi me chienei kewe üpwe apasa ngeni Jerusalem,
“Kinamwe epwe nonom lomw.”
Pokiten imwen ewe Samol mi Lapalap ach we Kot
üpwe kütta om feiöch.