Paipel KÖLFEL 104
104
Kot a tümwünü förian kana
104.1-35
Ngüni, kopwe mwareiti ewe Samol mi Lapalap.
Ai Samol mi Lapalap ai Kot, en ka fokun tekia.
Ka üföüf ngeni iteüöch me manaman
o pwölü ngonuk saram usun echö üf.
Ka ameresala ekewe läng usun eu imw mangaku
o aüetä imwom won ekewe koluk.
Ka föri ekewe kuchu pwe woom woken,
o sai won pöükässin asepwäl.
Ka akünöü ekewe asepwäl pwe noum chon künö,
o nöüni chon angang ngetengeten ekkei. Ipr 1.7
Ka anükätiu fanüfan won longolongun kewe,
pwe esap fokun mwökütüküt tori feilfeilachök.
Ka pwölüela fanüfan ren matau mi alolol usun ren echö üf,
ekewe koluk ra nom asen ekewe chuk,
lupwen ka apwüngü ekewe koluk, ra süla.
Ra müttir sü ren püngün om chopulap.
Ra pula won ekewe chuk o putiu lon ekewe lemol
ngeni ewe leni en ka amolätä fän iter.
Ka föri eu kiä pwe ekewe koluk resap tongeni kusula,
resap pwal chüen pwölüela fanüfan.
 
10 Ka ammichätä puächen koluk me lon ekewe lemol.
Chanpupu ra pula lefilen ekewe chuk,
11 pwe ekewe manmwacho meinisin lon ekewe lemäl ra ün seni,
ekewe aas mi mwacho ra ün seni pwe a mola ar kaka.
12 Ekewe machang ra fas won ekewe irä mi mär ünükün ekewe koluk,
ra tik me lein palen ekewe irä.
 
13 Seni won leniom mi tekia ka achöchönü ekewe chuk.
Fanüfan a urela ren om kewe feiöch.
14 En ka amärätä fetil fän iten ekewe kow,
pwal irä fän iten aramas pwe repwe fotukätiu,
pwe epwe wor ener seni ewe fanü.
15 Iwe, epwe wor wain pwe aramas repwe ün o pwapwa,
epwe wor lö pwe repwe emmisi ngeni won meser,
pwal pilawa pwe repwe mongö o pöchökül ren.
 
16 Än ewe Samol mi Lapalap irä ra chöchön ren chomong üt,
ekewe setar won Lepanon i a fotukätiu.
17 Ekewe machang ra senätä faser wor,
ewe öröpwech a lenieni ewe irä itan pain.
18 Ekewe kuuch mi mwacho ra lenieni ekewe chuk tekia,
ekewe man iter pächer ra op fän ekewe achau.
 
19 Ka föri ewe maram pwe epwe asisillätä ekewe fansoun,
akkar a silei fansoun an epwe tuputiu.
20 Ka föri pwin pwe lon kirochan
ekewe manmwacho lein wöllap meinisin ra towu seni lenier.
21 Ekewe nienifön laion ra wörüwör, lupwen ra kütta liaper,
ra kütta ener me ren Kot.
22 Lupwen akkar a tötä, ra liwiniti lenier
o konola lon pwanger.
23 Mürin, aramas ra feila ngeni ar angang,
ra angang tori lekuniol.
 
24 Ai Samol mi Lapalap, ra fokun chomong
ekewe mettoch ka föri. Ka föriir meinisin lon om tipachem.
Fanüfan a ur ren föriom mönümanau meinisin.
25 Ikenan a wor ewe matau mi lapalap o chölap,
a masou ren chomong mönümanau
mi watte me kükün rese lea.
26 Ekewe sip ra saifetal won, pwal ewe man itan Lefiatan,
en ka föri, a kukulou lon. Hiop 41.1; Kölf 74.14; Ais 27.1
27 Ekei mönümanau meinisin ra lükülükuk
pwe kopwe ngeniir ener mongö lon fansoun fich.
28 Lupwen ka ngeniir ener mongö, ra ionifengeni,
lupwen ka suki poum, ra mongö o möt ren.
29 Nge lupwen ka aopa mesom seniir, ra niuokus,
lupwen ka angei seniir ngasangaseer,
ra mäla o liwiniti pwül moromor.
30 Lupwen ka tinato Ngünum, ra fisitä.
En ka försefäli fanüfan.
 
31 Amwo lingen ewe Samol mi Lapalap epwe nom tori feilfeilachök,
amwo ewe Samol mi Lapalap epwe meseikeiti an föför.
32 Lupwen a netiu won fanüfan, fanüfan a chechech.
Lupwen a atapa ekewe chuk, ra ötüöt.
 
33 Üpwe köl ngeni ewe Samol mi Lapalap lon ränin manauei meinisin.
Üpwe kölün mwareiti ai Kot lupwen ai manau.
34 Amwo ai ekinlon epwe apwapwai letipen ewe Samol mi Lapalap,
pun üa meseikeiti i.
35 Ekewe chon tipis repwe rosola seni won fanüfan,
nge ekewe aramasangau repwe mochola.
Ngüni, kopwe mwareiti ewe Samol mi Lapalap.
Ousipwe mwareiti ewe Samol mi Lapalap.

104:4: Ipr 1.7

104:26: Hiop 41.1; Kölf 74.14; Ais 27.1