Paipel HIOP 41
41
Ifa usun, ka tongeni efi eman alikitor won efoch ö,
ika fötätiu chönawan ren efoch säl? Kölf 74.14; 104.26; Ais 27.1
Ifa usun, ka tongeni atikalong efoch säl lon pwötün
ika pwangeni ngächin ren efoch kakia?
Ifa usun, epwe tütüngor ngonuk pwe kopwe fäälimöch ngeni?
Ifa usun, epwe eäni kapas pwetete ngonuk?
Ifa usun, epwe föri eu pwonen atipeeu ngonuk
pwe epwe angang ngonuk tori feilfeilachök?
Ifa usun, kopwe tongeni efisira usun om efisira eman machang,
ika föti ngeni efoch säl pwe noum kewe nengin repwe nöüni?
Ifa usun, ekewe chon attau repwe aninifengen won liwinin?
Ifa usun, ekewe chon amömö repwe kinietiu fitukan o eäni amömö?
Ifa usun, ka tongeni posu silin ngeni chomong fisika
ika posu möküran ngeni mächän likapich?
Are ka atapa i fän eu chök, kosap chüen atapasefäli,
pun kopwe chechemeni usun an fiu ngonuk.
Eman aramas mi ekiekin akufu i epwe lichipüng.
Lupwen a chök küna, epwe fokun rükö.
10 Esap wor eman a pwora pwe epwe tongeni apwökü.
Nge iö chök a tongeni ü ngeni?
11 Iö a tongeni fiu ngeni, nge esap feiengau?
Esap wor eman won unusen fanüfan a tongeni föri ei.
 
12 Iei üpwe chök fos usun pechen ewe alikitor,
pwal usun an pöchökül me lapalapan.
13 Iö a tongeni asera seni silin
ika posu pwochan?
14 Iö a tongeni ammasala awan
mi kula ren ngin mi eniweniw?
15 Pwal won sökürün a wor telin ililin mi fokun kanefengen
o pöchökül usun fau.
16 Ililin kewe ra fokun pachefengen
pwe esor asepwäl a tongeni enilong lefiler.
17 Ra chufengen eu ngeni eu o akükfengen
pwe resap tongeni imwüfesen.
18 Lupwen a mwesi, a fiwu saram,
tinen mesan a usun chök tinen akkar lupwen a tötä.
19 A ngetewu ekkei me lon awan usun ngeten töl,
pwal usun märäkükün ekkei.
20 Ötüöt a ötüwu seni lon pwötün
usun ötüötün wowo mi kü me fän eu kama.
21 Ngasangasan a tongeni akü mwoli,
nge ngeten ekkei a ngetewu seni lon awan.
22 Üan a fokun pöchökül,
nge meinisin mi küna i ra niueiti.
23 Säsärin fitukan a fokun ngüt,
a fokun pöchökül pwe esap tongeni mwökütüküt.
24 Leupwan a pöchökül usun eföü fau,
a pöchökül usun eu nüföfau.
25 Lupwen a anangatä, ekewe chon pöchökül ra fokun niuokus,
resap chüen silei mine repwe föri ren ächewechewen ükün.
26 Esap wor efoch ketilas a tongeni akinasa,
esap pwal wor efoch fisika ika föün esefich ika siles a tongeni afeiengaua.
27 Mächä a usun chök apwangapwangen fetilipwas me ren,
nge piras a usun chök irä mi kirou me ren.
28 Esap tongeni süla ren ekewe föün esefich,
nge ekewe föün öülün ra usun chök pipin fetilipwas me ren.
29 Lifötüföt a usun chök fetilipwas me ren,
a takiri tärekikin ekewe fisika.
30 Ililin lukan a usun chök tärupurupun mökkün sepi seni pwül,
ra arasa ewe pwakak usun chök eu pisekin tuw warawar.
31 A kupeti ewe matau pwe a puropur usun koluk mi pwich lon eu kama
o apurätä pwe a usun chök puren noppuk lon nape.
32 A wor puropuren mwurifion.
Ren ei, eman a tongeni ekieki pwe ewe matau a nopwechepwech.
33 Esap wor och won fanüfan a wewe ngeni.
I eman mönümanau esap wor an niuokus.
34 A otiwei mönümanau meinisin mi lamalamtekia,
a king wor meinisin.”

41:1: Kölf 74.14; 104.26; Ais 27.1