Paipel KÖLFEL 66
66
Kölün mwareiti Kot ren an kewe föför mi manaman
66.1-20
Ngeni ewe mi emweni chon köl: Echö köl.
Oupwe mweireir fän pwapwa ngeni Kot,
ämi chon fanüfan meinisin,
oupwe kölü lingen itan
o fokun mwareiti i.
Oupwe apasa ngeni Kot, “Om kewe föför ra fokun amwarar.
Om kewe manaman ra kon lapalap,
pwe chon oputok ra chapetiu me mwom fän niuokus.
Chon fanüfan meinisin ra fel ngonuk,
ra kölün mwareituk,
ra kölün mwareiti itom.”
 
Oupwe feito o nenengeni mine Kot a föri.
An kewe föför me lein aramas ra fokun amwarar.
A awili matau ngeni fanüpwas.
Äm kewe lewo ra fetal lon ewe chanpupu won pecher.
Ikenan äm aia pwapwa ren mine Kot a föri. Eks 14.21; Jos 3.14-17
A nemenem ren an manaman tori feilfeilachök,
mesan ra mamasa ekewe mwü.
Ekewe aramas mi ü ngeni Kot resap tongeni atekiaretä.
 
Ämi chon ekewe mwü, oupwe mwareiti ach we Kot.
Aramas repwe rong ngingin ämi mwareiti i.
I a amwöchü manauach,
nge esap mwüt ngenikich pwe sipwe turula.
 
10 Pun en äm Kot, ka sotunikem,
ka limetikem
usun aramas ra limeti silifer.
11 Ka atolongakem lon fötek.
Ka anomu won sökürüm och wosochou,
12 ka mwüt ngeni aramas pwe repwe purikem.
Äm aia pwerelong lon ekkei me koluk,
nge en ka emwenikeemiwu o atolongakem lon eu leni mi mürina.
 
13 Üpwe feila lon imwom fän asoren kek
o apwönüetä ai kewe pwon ngonuk.
14 Üpwe uwato reöm mine üa pwon ngonuk,
lupwen üa nom lon weires.
15 Üpwe eäni asoren kek ngonuk seni man mi öümanau.
Üpwe eäni asor ätemwänin sip,
pwal ätemwänin kow me kuuch,
pwe ötüötün ekewe asor epwe ötütä.
 
16 Oupwe feito o rongorong, ämi meinisin mi asamolu Kot,
üpwe apworausa ngenikemi mine Kot a föri fän itei.
17 Üa siö ngeni fän leüömong,
üa kölün mwareiti i.
18 Are üa ekiekietä och föför mi ngau lon lelukei,
ewe Samol esap aüselingaei.
19 Nge Kot a fokun aüselingaei,
a aü selingan ngeni ai iotek.
 
20 Üpwe mwareiti Kot,
pun i esap oput ai iotek,
esap pwal amwöchü seniei an we tong ellet.

66:6: Eks 14.21; Jos 3.14-17