Paipel KÖLFEL 25
25
Eu iotekin tüngor pwe Kot epwe emweni o tümwünü nöün aramas
25.1-22
Echö än Tafit köl.
Ai Samol mi Lapalap, üa suki ngonuk lelukei.
Ai Kot, üa anomu ai apilükülük womw.
Kosap mwüt ngeniei pwe üpwe säw ren chon oputaei,
kosap pwal mwüt ngeniir pwe repwe ätäiwetiei ren ai kuf.
Ewer, esap wor eman mi apilükülükuk epwe säw.
Nge chokewe mi ü ngonuk repwe säw.
 
Ai Samol mi Lapalap, kopwe aiti ngeniei om kewe al
o aitöchüür ngeniei.
Kopwe emweniei lon om let o aiöüei,
pun en ewe Kot mi amanauaei,
üa apilükülükuk fansoun meinisin.
 
Ai Samol mi Lapalap, kopwe chechemeni om ümöümöch me om tong ellet,
ka pwärätä seni chök lomlom.
Kopwe amusala ai kewe tipis me ai kewe pupungau üa föri lesäräföi.
Ai Samol mi Lapalap, kopwe chechemeniei
lon om tong me om kirikiröch.
 
Ewe Samol mi Lapalap a pwüng o kirikiröch.
Iei mine a aiti ngeni ekewe chon tipis ewe al repwe fetal won.
A emweni chon tipetekison lon mine a pwüng
o aiti ngeniir letipan.
10 Ewe Samol mi Lapalap a eäni tong me allükülük
ngeni chokewe mi apwönüetä an we pwon o aleasochisi an kewe allük.
11 Ai Samol mi Lapalap, kopwe amusala ai tipis usun ka pwon,
pun ai tipis a kon chomong.
12 Iö ewe aramas a niuokusiti ewe Samol mi Lapalap?
Kot epwe aiti ngeni ewe al epwe fetal won.
13 I püsin epwe wöümong,
nge nöün kana repwe fanüeni ewe fanü.
14 Ewe Samol mi Lapalap a chiechifengen me chokewe mi niuokusiti i.
A asile ngeniir an we pwon.
15 Üa sachetä ngeni ewe Samol mi Lapalap fansoun meinisin,
pun i epwe angasaei seni feiengau.
16 Kopwe kul ngeniei o ümöümöch ngeniei,
pun ngang üa metip o osupwang.
17 Kopwe akisikisala weiresin letipei
o angasaeila seni ai kewe riaföü.
18 Kopwe ekieki usun ai riaföü me ai weires
o amusala ai kewe tipis meinisin.
 
19 Kopwe nenengeni chomongun ekewe chon pälüeniei,
pwal usun ar oputangauaei.
20 Kopwe tümwünü manauei o angasaei.
Kosap mwüt ngeniei pwe üpwe säw,
pun üa feito reöm pwe kopwe tümwünüei.
21 Let me wenechar repwe tümwünüei,
pun üa apilükülükuk. 22 Ai Kot, kopwe angasa chon Israel
seni ar kewe weires meinisin.