Paipel KÖLFEL 24
24
Ewe king mi ling
24.1-10
Echö än Tafit köl.
Fanüfan me masouan meinisin än ewe Samol mi Lapalap,
pwal meinisin mi nonom won ir nöün. 1.Kor 10.26
Pun i a anomu fanüfan won ekewe matau
o anükücharätiu won ekewe koluk.
 
Iö epwe tongeni feitä won chukun ewe Samol mi Lapalap?
Nge iö epwe tongeni nom lon lenian mi pin?
Chokewe mi limöch ar föför me ar ekiek,
resap fel ngeni uluulun anümwäl, resap pwal chofana le akapel. Mat 5.8
Ewe Samol mi Lapalap epwe afeiöchüür.
Kot epwe pwärätä pwe ra pwüng o amanaueer.
Iei usun ekewe aramas mi kütta Kot,
chokewe mi feito fän mesen än Jakop we Kot.
 
Oupwe sukala ekewe asam,
oupwe sukchöchöla ekewe asamen lom,
pwe ewe king mi ling epwe tolong lon.
Iö ewe king mi ling?
Ewe Samol mi Lapalap mi pöchökül o pwora,
ewe Samol mi Lapalap mi win lon maun.
Oupwe sukala ekewe asam,
oupwe sukchöchöla ekewe asamen lom,
pwe ewe king mi ling epwe tolong lon.
10 Iö ei king mi ling?
Ewe Samol mi Unusen Manaman, i ewe king mi ling.

24:1: 1.Kor 10.26

24:4: Mat 5.8