Paipel ÄN SALOMON FOS (PROFERPIS) 17
17
A mürina än eman aramas epwe mongö elülü mongö mi pwasapwas, nge mi wor kinamwe, lap seni an epwe eti eu mongön kametip lon eu imw mi wor fitikoko lon. Eman amanau mi mirit epwe nemeni nöün an samol mwän mi föri föför mi äsäw o angei wisan usun chök eman lein ekewe nau. Silifer me kolt ra limelim lon ewe lenien ketel, nge ewe Samol mi Lapalap a sotuni leluken aramas. Eman aramasangau a rongorong ngeni kapas mi ngau, nge eman chon chofana a aüselingafichi kapas chofana. Eman mi takirin ämängaua ekewe chon wöüngau a turunufasei Kot ewe Chon Föriir, nge eman mi pwapwa ren feiengauen eman epwe angei liwiningau. Ekewe chinlap ra aingaing won nöün nöür, ina usun ekewe nau ra aingaing won en me saman. Kapas pöchökül esap fichiti eman chon tiparoch, nge kapas chofana esap fokun fichiti eman samol. Ekoch aramas ra ekieki pwe ar lifangen amichimich a usun chök roong, ra lükü pwe epwe alisiir lon mettoch meinisin. Eman mi mochen pwe aramas repwe tongei epwe amusala ar tipis ngeni, nge eman mi achemasefäli tipisin eman a tongeni ataela chiechifengen. 10 Eu kapasen apwüng ngeni eman mi mirit a watte eselipäan, lap seni eselipäen ipükü wichiwich ngeni eman mi tiparoch. 11 Eman aramas mi ngau a chök mochen ükü ngeni aramas, iei mine eman chon künö mi uwei kapasen afeiengau a tiitiila ren. 12 A mürina ach sipwe churi eman liefefinin pear aramas ra angei seni apanan, lap seni ach churi eman chon tiparoch lon an umwes. 13 Are eman aramas a liwini ingau fän iten föför mürina, feiengau esap sü seni imwan. 14 Ach popuetä eu anini a usun chök ach pwangeni eu epetin koluk, iei mine kopwe ükütiu mwen ewe anini epwe lapala. 15 Ewe Samol mi Lapalap a oput ätewe mi aitöchü ekewe aramasangau me ätewe mi atipisi ekewe chon pwüng. 16 Met lomoten an epwe wor moni lepöün eman chon tiparoch? Ifa usun epwe tongeni möni tipachem, nge esap wor an mirit? 17 Eman chiechiach a tongeekich fansoun meinisin, nge pwiich a nom rech pwe epwe alisikich lon fansoun riaföü. 18 Eman aramas esap mirit a pwon pwe epwe mönätiu än chon arun liwinimang o ngeni asisilen an pwon. 19 Eman mi efich anini a pwal efich tipis, nge eman mi eäni kapas tunosikesik a kütta feiengau. 20 Eman aramas mi rikirik lelukan esap fefeitä, nge eman mi eäni kapas atuputup epwe tolong lon osukosuk. 21 Eman nau mi tiparoch a aworato lolilen ngeni saman, nge semen eman mi umwes esap pwapwa. 22 Eman mi pwapwa lon lelukan iei eu säfei mi mürina, nge eu leluk mi lolilen a asemweni eman. 23 Eman aramas mi ngau a angei lifangen amichimich fän monomon, pwe epwe arikala pwüngün kapwüng. 24 Eman aramas mi silelap a chök ekieki tipachem, nge eman mi tiparoch a chök tanechfeil lon an ekiek. 25 Eman nau mi tiparoch a aworato lolilen ngeni saman, a pwal aworato letipeta ngeni inelapan. 26 Esap pwüng pwe eman chon pwüng epwe mönätiu liwinin eu tipis esap tipisin, a pwal fokun mwäl are aramasöch repwe angei wichiwich fän iten ar wenechar. 27 Eman mi mang le fos a wor an silelap, nge eman mi mosonotam i eman mi weweöch. 28 Pwal eman chon tiparoch mi fanafanala, aramas ra ekieki pwe a mirit, pun are a apüngala awan, a wewe ngeni eman mi tipachem.