Paipel ÄN SALOMON FOS (PROFERPIS) 18
18
Eman mi püsin imwüla a chök kütta an mochen, a ü ngeni meinisin mine aramas ra ekieki pwe a pwüng. Eman aramas mi tiparoch esap pwapwaiti weweöch, a chök pwapwa are a tongeni pwärätä mefian. Lupwen a fis föföringau, a pwal fis sochowun, nge lupwen a fis itengau, a pwal fis säw. Än eman aramasöch kapas ra usun chök eu lenien tipachem, ra alolol usun matau, ra fat usun kolukun eu chanpupu mi pumong. Esap mürina ach sipwe echeni eman aramasangau ika ach sipwe arikala pwüngün kapwüng seni eman esap wor an tipis. Än eman chon tiparoch kapas a afisätä anini, nge ren an kapas a atoto an epwe angei wichiwich. Eman chon tiparoch a püsin feiengau ren kapasen awan, nge an kewe kapas eu sär fän äsengesin. Än eman chon luapas kapas ra usun chök elülü mongö mi fokun annö, ra tolong leutun eman aramas. Eman mi chipwang ngeni an angang a pwipwi ngeni eman mi atai mettoch. 10 Iten ewe Samol mi Lapalap a usun chök eu imw tekia mi pöchökül, ewe chon pwüng a sälong lon o küna manau. 11 Nge ekewe chon pisekisek ra ekieki pwe wöür a tümwünüür seni feiengau, usun chök eu tit mi tekia o pöchökül a epeti eu telinimw seni feiengau. 12 Eman aramas a lamalamtekia mwen feiengau epwe tori, nge tipetekison a akom mwen iteüöch. 13 Are eman aramas a pälüeni mwen esamwo rongorong, ina an tiparoch epwe pwal säw. 14 Eman aramas mi apilüköch lupwen an samau a tongeni manau. Nge are eman a apilükingau, ese tongeni pwäk. 15 Eman aramas mi mirit a fefeitä lon an silelap, nge eman mi tipachem a aü selingan ngeni kapasen silelap. 16 Än eman aramas lifang a wäsi alan pwe epwe tongeni churi ekewe aramas tekia. 17 Eman mi akomwen fos lon kapwüng, aramas ra ekieki pwe a pwüng tori ewe chon pälüeni a feito o pälüeni an kapas. 18 Pwüngün üttüt a aükätiu anini o awesi fitikoko lefilen ruoman mi pöchökül. 19 Eman pwipwi mi fön letipan a weires ach sipwe liapeni, lap seni ach liapeni eu telinimw mi pöchökül. Nge kapasen anini ra pöchökül usun chök pöchökülen lokkun asamen imwen king. 20 Eman aramas a wisen manau ren eselipäen kapasen awan. 21 Mine eman aramas a apasawu seni awan a eselipä ngeni, iei mine chokewe mi efich fofos repwe angei liwinin. 22 Eman mi küna eman pwülüan a küna eu mettoch mi mürina o angei ümöümöch me ren ewe Samol mi Lapalap. 23 Lupwen eman chon wöüngau a tüngor, a eäni kapas pwetete, nge eman chon wöümong a eäni kapas pälüen mi pöchökül. 24 Eman aramas mi chomong chiechian a tongeni fetal ngeni feiengau, nge mi wor eman chiechian a kan ngeni, lap seni wesewesen pwiin.