Paipel NUMPERIS 29
29
Ekewe asor repwe fis lon ewe chulapen ettiki rappwa
29.1-6
(Lif 23.23-25)
Iwe, lon aeuin ränin ewe afisuen maram oupwe afisi eu mwich mi pin. Ousap föri och angang lon. Ei rän eu ränin ämi oupwe ettiki ekewe rappwa. Oupwe eäni asoren kek eman nienifön ätemwänin kow, eman ätemwänin sip me füman ätemwänin lam eu ierir, pwe ewe Samol mi Lapalap epwe efich pwoon. Ir meinisin esap wor terir. Epwe pwal chu ngeniir ewe pilawa mi amas o mürina mi nofitfengen me apüra. Iwe, wonu paun pilawa epwe chu ngeni ewe ätemwänin kow, pwal rüanü paun epwe chu ngeni ewe ätemwänin sip, nge ruu paun epwe chu ngeni eman me eman kewe füman lam. Iwe, oupwe pwal eäni asoren tipis eman ätemwänin kuuch pwe epwe fis asoren amusamusen tipis fän itemi ren. Ekei asor repwe fis lükün ewe asoren kek lepoputän maram me ewe asoren mongö mi chu ngeni, pwal lükün ewe asoren kek mi chök fifis iteiten rän me ewe asoren mongö me asoren ün mi chu ngeni lon pwüngün allükür. Ei eu asor ewe Samol mi Lapalap a efich pwoon.
Ekewe asor repwe fis lon ewe ränin amusamusen tipis
29.7-11
(Lif 23.26-32)
Iwe, lon engolun ränin ei afisuen maram oupwe afisi eu mwich mi pin. Oupwe echikefel, ousap pwal föri och angang lon. Nge oupwe eäni asoren kek eman nienifön ätemwänin kow, eman ätemwänin sip me füman ätemwänin lam eu ierir, pwe ewe Samol mi Lapalap epwe efich pwoon. Ir meinisin esap wor terir. Epwe pwal chu ngeniir ewe asoren mongö pilawa mi amas o mürina mi nofitfengen me apüra. Iwe, wonu paun pilawa epwe chu ngeni ewe ätemwänin kow, rüanü paun pilawa epwe chu ngeni ewe ätemwänin sip, 10 nge ruu paun epwe chu ngeni eman me eman kewe füman lam. 11 Oupwe pwal eäni asoren tipis eman ätemwänin kuuch lükün ewe asoren amusamusen tipis, pwal lükün ewe asoren kek mi chök fifis iteiten rän me ewe asoren mongö me asoren ün mi chu ngeni. Lif 16.29-34
Ekewe asor repwe fis lon ewe chulapen likachoch
29.12-40
(Lif 23.33-44)
12 Iwe, lon engol me limuen ränin ewe afisuen maram oupwe afisi eu mwich mi pin. Ousap föri och angang lon, nge oupwe föri eu chulap ngeni ewe Samol mi Lapalap lon ükükün fisu rän. 13 Iwe, lon aeuin rän oupwe eäni asoren kek engol me ülüman nienifön ätemwänin kow, ruoman ätemwänin sip me engol me föman ätemwänin lam eu ierir, pwe ewe Samol mi Lapalap epwe efich pwoon. Ir meinisin esap wor terir. 14 Epwe pwal chu ngeniir ewe asoren mongö pilawa mi amas o mürina mi nofitfengen me apüra. Iwe, wonu paun pilawa epwe chu ngeni eman me eman kewe engol me ülüman ätemwänin kow, rüanü paun epwe chu ngeni eman me eman kewe ruoman ätemwänin sip, 15 nge ruu paun epwe chu ngeni eman me eman kewe engol me föman lam. 16 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
17 Nge lon aruuen rän oupwe eäni asor engol me ruoman nienifön ätemwänin kow, ruoman ätemwänin sip me engol me föman ätemwänin lam eu ierir. Ir meinisin esap wor terir. 18 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür. 19 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
20 Iwe, lon aülüngatin rän oupwe eäni asor engol me eman nienifön ätemwänin kow, ruoman ätemwänin sip me engol me föman ätemwänin lam eu ierir. Ir meinisin esap wor terir. 21 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür. 22 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
23 Iwe, lon arüanün rän oupwe eäni asor engol nienifön ätemwänin kow, ruoman ätemwänin sip me engol me föman ätemwänin lam eu ierir. Ir meinisin esap wor terir. 24 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür. 25 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
26 Nge lon alimuen rän oupwe eäni asor tiueman nienifön ätemwänin kow, ruoman ätemwänin sip me engol me föman ätemwänin lam eu ierir. Ir meinisin esap wor terir. 27 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür. 28 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
29 Iwe, lon awonuen rän oupwe eäni asor waluman nienifön ätemwänin kow, ruoman ätemwänin sip me engol me föman lam eu ierir. Ir meinisin esap wor terir. 30 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür. 31 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
32 Nge lon afisuen rän oupwe eäni asor füman nienifön ätemwänin kow, ruoman ätemwänin sip me engol me föman ätemwänin lam eu ierir. Ir meinisin esap wor terir. 33 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür. 34 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
35 Iwe, lon awaluen rän oupwe pwal afisi eu mwich mi pin. Ousap föri och angang lon. 36 Oupwe eäni asoren kek eman nienifön ätemwänin kow, eman ätemwänin sip me füman ätemwänin lam eu ierir, pwe ewe Samol mi Lapalap epwe efich pwoon. Ir meinisin esap wor terir. 37 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür. 38 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni. Lif 23.34; Tut 16.13-15
39 Ikkei ekewe asor oupwe eäni asor ngeni ewe Samol mi Lapalap lon ämi kewe ränin chulap mi kefilitä. Repwe chu ngeni ämi kewe asoren pwon me asor seni püsin letipemi, ämi kewe asoren kek me asoren mongö me asoren ün pwal ämi kewe asoren kinamwe.” 40 Iwe, Moses a asile ngeni ekewe aramasen Israel wesewesen meinisin mine ewe Samol mi Lapalap a allük ngeni.

29:11: Lif 16.29-34

29:38: Lif 23.34; Tut 16.13-15