16
Ekewe ülüngat chulap mi kefilitä
16.1-17
(Eks 12.1-20)
“Iwe, oupwe chechemeni ewe maram Apip, pwe oupwe föri ewe Pasofer fän iten ewe Samol mi Lapalap ämi we Kot. Pun lon ewe maram Apip ewe Samol mi Lapalap ämi we Kot a emwenikemiiwu lepwin seni ewe fanü Isip. Oupwe feila o eäni asor ewe mönün Pasofer seni nöümi pwiin sip ika kow ngeni ewe Samol mi Lapalap ämi we Kot me lon ewe leni i epwe filätä pwe aramas repwe fel ngeni ie. Ousap mongö pilawa mi wor iis lon fitifengen me ewe mönün Pasofer. Iwe, lon ükükün fisu rän oupwe mongö pilawa esap wor iis lon, usun oua föri, lupwen oua sü seni ewe fanü Isip fän tawat. Oupwe mongö ei pilawa mi iteni pilawan riaföü lon ränin manauemi meinisin, pwe oupwe chechemeni ewe rän oua towu seni lon ewe fanü Isip. Iwe, esap wor pilawa mi wor iis lon epwe pwä remi lon leniemi meinisin lon ükükün fisu rän. Ousap fokun likiti och lusun seni fituken ewe mönün asor oua eäni lon pwinin ewe aeuin rän tori lesosor. Ousap tongeni eäni asor ewe mönün Pasofer lon ämi kewe telinimw ewe Samol mi Lapalap ämi we Kot epwe ngenikemi. Nge oupwe eäni asor ewe mönün Pasofer lon ewe chök leni ewe Samol mi Lapalap ämi we Kot epwe filätä pwe aramas repwe fel ngeni ie. Oupwe eäni ewe asor lekuniol, lupwen akkar a tuputiu, pun lon ei fansoun oua towu seni Isip. Oupwe kukuw ewe mönün Pasofer o ochoch me lon ewe leni ewe Samol mi Lapalap epwe filätä. Nge lesosor oupwe liwiniti imwemi. Iwe, lon ükükün wonu rän oupwe mongö pilawa esap wor iis lon. Nge lon afisuen rän epwe fis eu mwich mi pin fän iten ewe Samol mi Lapalap ämi we Kot. Ousap föri och angang lon ewe rän. Eks 12.1-20; Lif 23.5-8; Num 28.16-25
Iwe, oupwe aleani fisu wiik seni ewe fansoun ekärän aeuin ämi pökü ekewe irän wiich. 10 Mürin oupwe föri ewe chulapen wiik ngeni ewe Samol mi Lapalap ämi we Kot ren ämi eäni asor seni püsin letipemi ükükün mine ewe Samol mi Lapalap ämi we Kot a afeiöchü ngenikemi. 11 Iwe, oupwe pwapwa me fän mesen ewe Samol mi Lapalap ämi we Kot lon ewe leni epwe filätä pwe aramas repwe fel ngeni ie, ämi me nöümi mwän me fefin, nöümi chon angang mwän me chon angang fefin, pwal chon ewe ainangen Lefi mi nom lon ämi kewe telinimw, ekewe chon ekis, ekewe mi mäsen me ekewe fefin mi mä pwülüer ra nom leimi. 12 Oupwe chechemeni pwe ra piin nöünikemi amanau me lon Isip. Iwe, oupwe tümwünüöchü le apwönüetä ekei allük. Lif 23.15-21; Num 28.26-31
13 Mürin ämi ionalong föün wiich seni ewe lenien wichiwich me wain seni ewe lenien üchüch oupwe pwal föri ewe chulapen likachoch lon ükükün fisu rän. 14 Oupwe pwapwa lon ämi chulap, ämi me nöümi mwän me fefin, nöümi chon angang mwän me chon angang fefin, pwal chon ewe ainangen Lefi, ekewe chon ekis, ekewe mi mäsen me ekewe fefin mi mä pwülüer ra nom lon ämi kewe telinimw. 15 Iwe, lon ükükün fisu rän oupwe föri ewe chulap ngeni ewe Samol mi Lapalap ämi we Kot lon ewe leni i epwe filätä. Oupwe fokun pwapwa, pun ewe Samol mi Lapalap epwe afeiöchü uän fotämi irä me angangen pöümi meinisin. Lif 23.33-36,39-43; Num 29.12-38
16 Iwe, fän ülüngat lon eu ier nöümi mwän meinisin repwe feito o fel ngeni ewe Samol mi Lapalap ämi we Kot lon ewe leni i epwe filätä. Repwe feito ren ewe chulapen mongö pilawa esap wor iis lon, ren ewe chulapen wiik me ewe chulapen likachoch. Iwe, resap tongeni feito fän ar asöülapö. 17 Iteiten eman me eman mwän epwe fang usun an tufich ükükün mine ewe Samol mi Lapalap ämi we Kot a afeiöchü ngeni.”
Usun angangen kapwüng
16.18-17.13
18 “Iwe, oupwe afili soukapwüng me nöüwis ükükün ekewe ainang lon ämi kewe telinimw meinisin ewe Samol mi Lapalap epwe ngenikemi. Repwe eäni kapwüng ngeni ekewe aramas fän pwüng. 19 Ousap sorei mine a pwüng, ousap pwal lifilifil aramas. Ousap angei lifangen amichimich, pun ei sokun lifang a achuna mesen chon mirit, pwe ra sorei pwüngün chokewe mi pwüng. Eks 23.6-8; Lif 19.15 20 Oupwe fokun eäni pwüng echök, pwe oupwe manau o fanüeni ewe fanü ewe Samol mi Lapalap ämi we Kot epwe ngenikemi.
21 Iwe, lupwen oupwe senätä eu rongen asor fän iten ewe Samol mi Lapalap ämi we Kot, ousap pwal fotuki och sokun irä pwe uluulun ewe anüfefin Asera ünükün. Eks 34.13 22 Ousap pwal aütai efoch ür mi pin, pun ewe Samol mi Lapalap ämi we Kot a oput. Lif 26.1

16:8: Eks 12.1-20; Lif 23.5-8; Num 28.16-25

16:12: Lif 23.15-21; Num 28.26-31

16:15: Lif 23.33-36,39-43; Num 29.12-38

16:19: Eks 23.6-8; Lif 19.15

16:21: Eks 34.13

16:22: Lif 26.1