Paipel HIOP 11
11
Sofar a tip ngeni Hiop pwe a tipis
11.1-20
Mürin, Sofar ewe re Nama a pälüeni Hiop,
“Ifa usun, esap wor eman mi mochen pälüeni ätewe mi kapas chomong?
Ifa usun, eman mi kapaspat epwe pwä an pwüng ren an fos?
Ifa usun, om fospat epwe afanafanalai aramas?
Nge lupwen ka eäni kapasen ämängau,
ifa usun, esap wor eman epwe apwünguk?
Pun ka apasa, ‘Mine üa lükü a pwüng,
üa pwal limöch me fän mesen Kot.’
Amwo Kot epwe suki awan o kapas ngonuk
pwe epwe pwäri ngonuk ekewe tipachem mi monomon,
pun a amwarar lon an tipachem.
Mürin kopwe mefi pwe Kot esap liwini ngonuk ükükün liwinin om tipis.
 
Ifa usun, ka tongeni silei usun alololun än Kot monomon?
Ifa usun, ka tongeni weweiti aükükün tekian Ewe mi Unusen Manaman?
A tekia seni läng, met kopwe tongeni föri?
A alolol seni ewe lenien sotup, met kopwe tongeni silei?
A watte seni watten fanüfan,
a chölap seni mataulap.
10 Are Kot a feito o fötekinuk, are a köruketo ngeni kapwüng,
iö a tongeni pinei?
11 Pun a silei ekewe aramas mi atuputup,
nge lupwen a küna föför mi ngau, ifa usun, esap ekieki usun?
12 Are epwe tufich pwe eman aas mi mwacho epwe nöünöü,
nge eman aramas nöün, ina fansoun epwe pwal tufich
pwe eman aramas mi tiparoch epwe mirit.
 
13 Kopwe awenechara lelukom o aitietä poum ngeni Kot.
14 Are föför mi ngau a nom lepoum, kopwe atoaua senuk.
Kosap mwüt ngeni föföringau epwe nom lon imwom.
15 Mürin kopwe anetai mesom, nge kosap säw,
kopwe nüküchar, nge kosap niuokus.
16 Mürin kopwe manlükala om kewe riaföü,
usun om kosap chüen chechemeni ekewe koluk mi pula.
17 Lon manauom epwe saram lap seni saramen leoloas,
nge rochopwaken lon manauom epwe usun chök saramen lesosor.
18 Kopwe manau fän kinamwe, pun a wor om apilükülüköch.
Kot epwe tümwünuk o asösöök fän kinamwe.
19 Kopwe konola, nge esap wor eman epwe aniuokusuk.
Chomong aramas repwe kütta alilisir senuk.
20 Nge ekewe aramasangau repwe nenefetal fän apilükingau.
Resap küna efoch al ra tongeni süla won,
nge ra chök apilüküni pwe repwe mäla.”