Paipel HIOP 12
12
Hiop a allükülükü än Kot manaman me tipachem
12.1-25
Mürin, Hiop a pälüeni,
“Ewer, ämi oua aramas tipachem,
nge lupwen oupwe mäla, tipachem epwe pwal mäla.
Nge a pwal wor ai mirit usun chök ämi, ngang üsap kis fami.
Iö esap silei ekei mettoch oua kapas usun?
Ngang üa uretakir me ren chiechiei.
Üa uretakir me rer, ngang eman mi wenechar o pwüng.
Me lom üa kökköri Kot, nge i a pälüeniei.
Esap wor ämi weires, nge oua aitengauaei ai nom lon riaföü,
oua wichi ätewe mi arap ngeni an epwe tur.
Lon imwen ekewe chon solä a wor kinamwe,
nge chokewe mi asonga Kot ra nonomöch,
ir chokewe mi eäni kot püsin ar pöchökül.
 
Iwe, kopwe aisini ekewe manfetal, ir repwe aiti ngonuk ekei mettoch,
kopwe aisini ekewe mansüsü, ir repwe ürenuk usun.
Ika kopwe aisini fanüfan, epwe aiti ngonuk,
nge ekewe ikenen leset repwe apworausa ngonuk ei pworaus mi let.
Iö me lein ekewe mönümanau meinisin esap silei
pwe pöün ewe Samol mi Lapalap a föriir?
10 Manauen ekewe mönümanau meinisin a nom lepöün Kot,
pwal ngasangasen aramas meinisin.
11 Ifa usun, sap än ewe seling angang pwe epwe alefila lefilen kapas mürina me kapas ingau,
usun chök ewe chönaw a alefila lefilen nennen mongö mi anö me mongö mi ngau?
12 Tipachem a nom ren ekewe chinlap,
nge mirit a nom ren eman mi manauatam.
 
13 Nge tipachem me manaman ra nom ren Kot,
a wor an öüröür me mirit.
14 Are Kot a ataela och, iö epwe tongeni aüsefälietä?
Are i a kalapusei eman, iö a tongeni amusa?
15 Are Kot a amwöchü ekewe koluk, ra pwasatä,
nge are a apuela ekewe koluk, a fis noter.
16 Pöchökül me tipachem ra nom ren Kot.
Ewe chon tup me ewe chon atuputup ra nom fän nemenian.
17 A angei seni ekewe chon öüröür ar tipachem
o föri pwe ekewe soukapwüng ra föri föförün chon umwes.
18 A angei seni ekewe king ar nemenem o fötekiniir.
19 A atekisona ekewe souasor
o asapwilätiu ekewe mi wor ar manaman.
20 A afanafanalai chokewe aramas ra lüküür
o angei seni ekewe souakom ar mirit.
21 A aworato itengau won ekewe aramas tekia
o awesi än ekewe chon pwora pöchökül.
22 A pwärawu mettoch mi alolol seni lon rochopwak
o atolonga saram lon lenien rochopwaken mäla.
23 A atekiatä ekewe mwü, nge mürin a ataarela.
A awattela ekewe mwü, nge mürin a föri pwe chor repwe oola.
24 A angei seni ekewe samol won fanüfan ar mirit
o afetaleer won fanüapö ia esap wor efoch al ie.
25 Ra atapfeil lon rochopwak, pun esap wor ar saram,
a ataroporopafetaleer pwe ra usun chök aramas mi pulas.”