Paipel FÖFÖR 16
16
Timoty a eti Paulus me Silas
16.1-5
Iwe, Paulus a sopwela an sai ngeni Terpe me Listra. Ikenan a nom eman souläng itan Timoty. Inan eman fin Juta mi souläng, nge saman eman re Krik. Timoty a iteüöch me ren ekewe chon lükü Jesus meinisin lon Listra me Ikonium. Iwe, Paulus a mochen pwe Timoty epwe eti, iei mine a sirkomsaisi. A föri ei, pokiten ekewe chon Juta meinisin mi nom lon ekewe leni ra silei pwe semen Timoty eman re Krik. Iwe, lupwen ar saifeil lon ekewe telinimw, ra aronga ngeni ekewe chon lükü Jesus ekewe allük ekewe soukünö me ekewe souakom lon Jerusalem ra apwüngala, ra pwal üreniir pwe repwe aleasochisi ekei allük. Iei usun chon ekewe mwichefel ra pöchökülela lon ar lükülük o chochomongola iteiten rän.
A wor künaan Paulus me lon Troas
16.6-10
Iwe, Paulus me chiechian kana ra sai lemenen ekewe fanü Frikia me Kalatia, pun ewe Ngünmifel esap mwüt ngeniir pwe repwe afalafala ewe Kapasen Kot lon ewe fanü Asia. Lupwen ar tori kiänin Misia, ra sotuni ar repwe tolong lon ewe fanü Pitinia, nge ewe Ngünün Jesus esap mwüt ngeniir. Iei mine ra sai lemenen Misia o feitiu lon ewe telinimw Troas. Lon ewe pwinin a wor künaan Paulus. A küna eman mwän seni Masetonia, a üta o tüngormau ngeni, “Kose mochen feito Masetonia o alisikem!” 10 Mürin künaan Paulus ei, äm aia müttir amolätä pwe aipwe feila Masetonia, pun aia mefi pwe Kot a körikem pwe aipwe afalafala ewe Pworausen Manau ngeni ekewe aramas ikenan.
Litia a soulängila me lon Filipi
16.11-15
11 Iwe, äm aia sai won sip seni Troas o saila wenewen ngeni Samotrasia. Nge sorotän ewe rän aia tori Neapolis. 12 Seni ikenan aia sai won fanü tori Filipi, iei ewe akaeuin telinimw lon ewe kinikinin fanü lon Masetonia, pwal eu telinimw ia ekewe chon Rom ra nonom ie. Iwe, äm aia nonom ikenan ekoch rän. 13 Lon ewe ränin Sapat aia feila ngeni eu leni ünükün eu chanpupu lükün ewe telinimw, ewe ia aia ekieki pwe chon Juta ra mwichfengen ie pwe repwe iotek. Iwe, aia mottiu o kapas ngeni ekewe fefin mi mwichfengen ikenan. 14 Iwe, eman me lein ekewe fefin mi aüselingakem Litia seni ewe telinimw Tiatira. Neminei eman chon amömö mangaku mi parachol, nge ra fokun mömong. Ei fefin a fel ngeni Kot, nge ewe Samol a suki lelukan pwe epwe rongosochis ngeni än Paulus afalafal. 15 Mürin än neminei me chon leimwan papatais a tüngor ngenikem, “Oupwe feito o nonom lon imwei are oua ekieki pwe ngang eman chon enletin lükü ach Samol.” Iwe, a pesekem pwe aipwe feila lon imwan.
Paulus me Silas ra nom lon imwen fötek lon Filipi
16.16-40
16 Lon eu rän, lupwen aia feila ngeni ewe lenien iotek, eman amanau föpwül a churikem, eman ngününgau a wäni pwe a tufichin osuni mine epwe fis lon fansoun epwe feito. Neminei a awora chomong moni tolong ngeni nöün kewe masta ren an osuni mine epwe fis ngeni aramas. 17 Ei föpwül a tapwela mürin Paulus me äm chienan kewe o kökkö fän leüömong, “Ekei mwän ir nöün Kot ewe mi Unusen Tekia chon angang! Ra aronga ngenikemi usun ämi oua tongeni küna manau!” 18 Iei usun mine a föri lon chomong kewe rän, tori Paulus a fokun weires ren, pwe a kul ngeni ewe föpwül o üreni ewe ngün mi nom won, “Fän iten Jesus Kraist üa allük ngonuk pwe kopwe towu seni neminei!” Iwe, lon ewe chök otun ewe ngün a towu seni. 19 Lupwen nöün ewe föpwül kewe masta ra mefi pwe ar alen moni tolong a ükütiu, ra turufi Paulus me Silas o etekiniirela lon ewe lenien chulap ren ekewe sounemenem. 20 Ra emweniirela mwen ekewe samollap o ra üreniir, “Ekei mwän ir chon Juta, ra afisätä fitikoko lon ach ei telinimw. 21 Ra afalafal won ekoch örüni mi ü ngeni ach kewe allük. Kich chon Rom, sisap tongeni etiwa ika apwönüetä ekei örüni.” 22 Iwe, pwal ewe mwichen aramas a pöchökül le ü ngeni Paulus me Silas. Mürin ekewe samollap ra kamwei seniir üfer kewe o allük ngeni ekewe sounfiu pwe repwe wichiir. 23 Wesin ar wichiir fän chomong, ra atururelong lon ewe imwen fötek, nge ra allük ngeni ewe chon masen imwen fötek pwe epwe mamasafichiir. 24 Fän iten ei allük ewe chon masen fötek a atururelong lon ewe ruum lukalapen ewe imwen fötek o anükü pecher lefilen irä mi chou.
25 Iwe, ina epwe lukenipwin Paulus me Silas ra iotek o köl kölün mwareiti Kot, nge ekewe chon fötek ra aüseling ngeniir. 26 Iwe, a müttir fis eu chechen fanü mi fokun watte, pwe ewe imwen fötek tori longolongun a mwökütüküt. Lon ewe chök otun ekewe asamalap meinisin ra sukula, nge ekewe selimächä mi föfö ngeni ekewe chon fötek ra pichila. 27 Iwe, ewe chon masen imwen fötek a nenela. Nge lupwen a küna pwe ekewe asamalapen imwen fötek ra sukula, a ekieki pwe ekewe chon fötek ra süla. Iei mine a üttawu nöün ketilas o ekiekin an epwe püsin niela. 28 Nge Paulus a kökkö fän mwelian mi leüömong, “Kosap püsin afeiengauok! Äm meinisin aia nom ikei!” 29 Iwe, ewe chon masen imwen fötek a kökkö pwe eman epwe uwato eu lamp, iwe, a sälong lon ewe ruum o chapetiu mwen Paulus me Silas fän chechech. 30 Mürin a emweniirewu lükün o aisiniir, “Ai samol kana, met ngang üpwe föri pwe üpwe küna manau?” 31 Ra pölüeni, “Kopwe lükü ach Samol Jesus, iwe, ämi me chon leimwom oupwe küna manau.” 32 Mürin ra afalafala kapasen ach Samol ngeni pwal ekewe aramas meinisin mi nom lon imwan. 33 Lon ewe chök kulok lon ewe pwinin ewe chon masen imwen fötek a emweniirela lon pwal eu ruum o a limeti kinaser kewe. Lon ewe chök otun i me chon leimwan meinisin ra papatais. 34 Mürin a emwenala Paulus me Silas lon püsin imwan o amongöniir. Iwe, i me chon an famili meinisin ra fokun pwapwa, pun iei ra lükü Kot.
35 Iwe, lesosorun sorotän ewe rän ekewe samollap ra tinala ekoch meilapen polis fän ei allük, “Oupwe amusala ekei mwän!” 36 Iei mine ewe chon masen imwen fötek a üreni Paulus, “Ekewe samollap ra tinato ei allük pwe ämi me Silas oupwe musala. Iei oupwe le towu o feila fän kinamwe.” 37 Nge Paulus a üreni ekewe meilapen polis, “Ra wichikem mwen mesen ekewe aramas, nge esap wor äm tipis, nge fen äm chon Rom! Mürin ra aturukeemilong lon imwen fötek, nge iei ra mochen tinikeemila le monomon? Apwi, esap fokun ina! Ekewe samollap repwe püsin feito ikei o atowukeemiwu.” 38 Iwe, ekewe meilapen polis ra apworausa ekei kapas ngeni ekewe samollap. Nge lupwen ra rongorong pwe Paulus me Silas ir chon Rom, ra fokun niuokus. 39 Iei mine ekewe samollap ra feila o amusamus ngeni Paulus me Silas. Mürin ra emweniirewu seni ewe imwen fötek o tüngor ngeniir pwe repwe feila seni ewe telinimw. 40 Iwe, lupwen ar towu seni ewe imwen fötek, ra feila lon imwen Litia. Ikenan ra churi chiechier kewe chon lükü Jesus o apöchöküla letiper ren ar kapas, mürin ra feila seniir.