Paipel 2.SAMUEL 2
2
Tafit a seikitä pwe epwe kingen Juta
2.1-7
Mürin ekoch fansoun Tafit a aisini ewe Samol mi Lapalap, “Ifa usun, üpwe feila lon eu kewe telinimwen Juta?” Ewe Samol mi Lapalap a pälüeni, “Kopwe feila.” Iwe, Tafit a ais, “Meni telinimw üpwe feila lon?” Ewe Samol mi Lapalap a üreni, “Kopwe feila Hepron.” Iei mine Tafit a feila Hepron, pwal pwülüan kewe ruoman iter Ahinoam seni Jesreel me Apikael piin pwülüen mä we Napal seni Karmel. 1.Sam 25.42-43 Tafit a pwal emwenala ekewe mwän mi nom ren fiti en me an famili. Iwe, ra imweimw lon ekewe telinimw ünükün Hepron.
Mürin, ekewe re Juta ra feito Hepron o epiti Tafit pwe epwe kingen chon Juta. Lupwen ra apworausa ngeni Tafit pwe ekewe re Japes-kiliat ra peiaseni Saul, 1.Sam 31.11-13 Tafit a tinala chon künö ren ekewe re Japes-kiliat pwe repwe üreniir, “Ewe Samol mi Lapalap epwe afeiöchükemi, pun oua pwärätä ämi kirikiröch ngeni Saul ämi we samol ren ämi peiaseni. Ewe Samol mi Lapalap epwe pwal kirikiröch me allükülük ngenikemi. Pwal ngang üpwe öch ngenikemi, pun oua föri ei föför. Iei oupwe pöchökül o pwora, pun Saul ämi samol a mäla, nge chon Juta ra epitiei pwe üpwe ar king.”
Tafit a maun ngeni ekewe pelien Saul
2.8-3.1
Iwe, Apner nöün Ner we mwän, ewe meilapen nöün Saul mwichen sounfiu, a angei Isiposet nöün Saul we mwän o emwenalong Mahanaim mi nom pekilan ewe chanpupu Jortan. Ikenan Apner a seikätä Isiposet pwe epwe kingen Kiliat, Aser, Jesreel, Efraim me Peniamin, pwal unusen Israel. 10 Isiposet a ierini faik, lupwen a tolong lon wisan wisen king lon Israel. A nemenem lon ükükün ruu ier. Nge chon ewe ainangen Juta ra eti Tafit. 11 Iwe, Tafit a king lon Hepron o nemeni unusen Juta seni ikenan lon ükükün fisu ier me wonu maram.
12 Iwe, Apner me nöün Isiposet kewe sounfiu ra towu seni Mahanaim o feila Kipeon. 13 Nge Joap nöün Seruia we mwän me nöün Tafit kewe sounfiu ra pwal towu seni lenier o churiir arun ewe nomun Kipeon. Iwe, ra mottiu, eu mwich a nom epekin ewe nom, nge eu mwich a nom pwal epek. 14 Iwe, Apner a üreni Joap, “Ekewe alüal repwe ütä o fiufengen me mwach.” Joap a üra, “Ina, repwe fiu.” 15 Mürin ra ütä o apälüfengen, engol me ruoman seni ewe ainangen Peniamin me Isiposet, pwal engol me ruoman seni nöün Tafit kewe sounfiu. 16 Iwe, eman me eman a turufi möküren pälüan o en me posu lepekin pälüan ngeni nöün ketilas. Iei usun ir meinisin ra mälapök. Iei mine ewe leni a iteni Helkat-hasurim * wewen Helkat-Hasurim lenien ketilas, a nom Kipeon. 17 Lon ewe ränin a fis eu maun mi fokun pöchökül. Nge Apner me ekewe sounfiun Israel ra kuf ren nöün Tafit kewe sounfiu.
18 Iwe, nöün Seruia kewe ülüman mwän Joap, Apisai me Asael ra nom ikenan. Asael a müttir le sä usun eman chia mi mwacho. 19 Iwe, Asael a tapweri Apner, nge lon an tapweri a sä wenewen ngeni. 20 Mürin, Apner a nennesökür o ais, “Ifa usun, en Asael?” Nge i a pälüeni, “Ewer, ngang Asael.” 21 Iwe, Apner a üreni, “Kopwe rik ngeni pelifichum ika pelimöngum o turufi eman lein ekewe alüal, pwe kopwe angei seni an kewe pisekin maun.” Nge Asael esap mochen kaüla seni an tapweri. 22 Mürin, Apner a kapassefäl ngeni Asael, “Kopwe kaüla seni om tapweriei. Pwota üpwe niikela? Epwe ifa usun ai üpwe nenengeni mesen pwiüm Joap me mürin?” 23 Nge Asael esap fokun mochen kaüla seni. Iei mine Apner a posu ngeni lukan mesen wokun siles, pwe a pwerewu me lükün sökürün. Iwe, a turutiu lepwül o mäla ikenan. Nge meinisin mi feito ren ewe leni ia Asael a turutiu o mäla ie, ra ükütä.
24 Iwe, Joap me Apisai ra tapweri Apner. Nge lupwen akkar a tuputiu, ra tori ewe chuk Ama arap ngeni Kia won ewe al a ale ngeni ewe fanüapön Kipeon. 25 Nge ekewe re Peniamin ra achufengeniir ren Apner pwe ra eu mwich, o ütä won ungen eu chuk. 26 Mürin, Apner a köla ren Joap, “Ifa usun, ach maunfengen epwe chök soposopola? Ifa usun, kosap silei pwe lesopolan feiengau echök? Inet kopwe üreni noum aramas pwe repwe ükütiu le tapweri pwiir?” 27 Nge Joap a üra, “Mwo manauen Kot, are kosap apasa iei, ellet ekei mwän resap ükütiu le tapweri pwiir tori lesosor.” 28 Mürin, Joap a ettiki ewe rappwa pwe ekewe mwän repwe ükütiu le tapweri chon Israel. Iei mine ar maunfengen a ükütiu.
29 Iwe, Apner me nöün kewe sounfiu ra feilong lon ewe lemolun Jortan lon unusen ewe pwin, ra feila pekilan ewe chanpupu Jortan o fetal lon ewe sosoran tori ra tori Mahanaim. 30 Lupwen Joap a liwinto seni an tapweri Apner, a amwichafengeni ekewe mwän meinisin o küna pwe engol me tiueman nöün Tafit kewe sounfiu resap chüen nom fiti Asael. 31 Nge nöün Tafit kewe sounfiu ra niela ükükün ülüpükü wone nöün Apner kewe sounfiu seni ewe ainangen Peniamin. 32 Iwe, Joap me nöün kewe mwän ra angei inisin Asael o peiaseni lon peiasen saman lon Petleem. Mürin ra fetal lon unusen ewe pwin, nge lupwen a ränila, ra tori Hepron.

2:2: 1.Sam 25.42-43

2:4: 1.Sam 31.11-13

*2:16: wewen Helkat-Hasurim lenien ketilas