Paipel 1.SAMUEL 25
25
Tafit me Apikael
25.1-44
Iwe, Samuel a mäla, nge chon Israel meinisin ra mwichefengen pwe repwe kechüeiti. Iwe, ra peiaseni lon lenian lon Rama. Mürin, Tafit a feitiu lon ewe fanüapön Paran.
A wor eman mwän lon Maon mi wor fanüan lon Karmel. Ei mwän a fokun pisekisek. A wor ülüngeröü nöün sip me engeröü nöün kuuch. Iwe, a fichi ülöülen nöün sip lon Karmel. Iten ewe mwän Napal, eman seni ewe eterekesin Kalep, nge iten pwülüan Apikael. Iwe, ewe fefin a miritöch o liöch, nge ewe mwän a aramasangau o miritingau. Iwe, Tafit a rong me lon ewe fanüapö pwe Napal a fichi ülöülen nöün sip. Iei mine Tafit a tinala engol alüal Karmel pwe repwe churi Napal o uwei an kapong ngeni. Iwe, a aiti ngeniir usun mine repwe üreni Napal, “Üa kapong ngonuk. Kinamwe epwe toruk me chon leimwom meinisin, epwe pwal tori meinisin mine ka nöüni. Üa rongorong pwe mi wor noum chon fichi ülöülen sip. Iwe, noum chon masen sip ra nom rem, nge äm aisap aweiresiir, esap pwal pöütüla och seniir lon ükükün ewe fansoun ra nom lon Karmel. Kopwe püsin aisini noum kewe chon angang, pun ir repwe apworausa ngonuk. Iei mine kopwe eäni ümöümöch ngeni nei kana alüal, pun äm aia feito lon ränin kametip. Kose mochen kopwe fang ngeni noum kewe chon angang, pwal ngeniei ngang noum mwän Tafit mine a nom reöm.”
Iwe, lupwen nöün Tafit kewe alüal ra feito ren Napal, ra üreni ekewe kapas meinisin fän iten Tafit. Mürin ra witiwit. 10 Nge Napal a pälüeni nöün Tafit kewe alüal, “Iö na Tafit? Iö nöün Jesi na mwän? Lon ei fansoun a wor chomong chon angang mi süla seni ar samol. 11 Ifa usun, üpwe angei enei pilawa, ünümei koluk me ochäi fituk, üa amolätä fän iten nei chon fichi ülöülen sip, o ngeni ekewe mwän üsap silei ia ra feito me ie?” 12 Iei mine nöün Tafit kewe alüal ra kul, ra liwinla o apworausa ngeni Tafit ekei kapas. 13 Iwe, Tafit a üreni nöün kewe aramas, “Ämi meinisin oupwe rietä nöümi ketilas.” Mürin, iteiten eman me eman mwän a rietä nöün ketilas, pwal Tafit mwo nge a rietä nöün. Iwe, ina epwe ükükün föpükü mwän ra feila mürin Tafit, nge rüöpükü ra nom ngeni ekewe pisek.
14 Nge eman me lein nöün Napal kewe chon angang a üreni Apikael pwülüen Napal, “Tafit a tinato chon künö seni lon ewe fanüapö pwe repwe kapong ngeni äm samol, nge i a rochongau ngeniir. 15 Nge ekewe mwän ra fokun öch ngenikem. Resap aweiresikem, esap pwal pöütüla och senikem lon ükükün tamen ewe fansoun aia etiir le nom lon ekewe mälämäl. 16 Ir ra usun chök tittim lepwin me lerän lon unusen ewe fansoun aia nom rer le tütümwünü ekewe sip. 17 Iei mine kopwe ekieköchü o pii mine kopwe föri, pun feiengau epwe tori äm samol me chon leimwan meinisin. Nge äm samol a fokun aramasangau, pwe esap wor eman a tongeni kapas ngeni.”
18 Mürin, Apikael a müttir angei rüöpükü fochun pilawa, ruu rumen wain, limman sip mi fen wes le kuk, ina epwe ükükün wone paun wiich mi tün, ipükü umwun föün wain mi apwas me rüöpükü nokop seni fik mi apwas. Iwe, a anomuur won ekoch aas. 19 Mürin, a üreni nöün kewe chon angang mwän, “Oupwe akomwola mwei, ngang üpwe tapwela mürimi.” Nge i esap asilei och ngeni Napal pwülüan we. 20 Lupwen Apikael a sätiu won nöün aas lon eu pwokur me epek, Tafit me nöün kewe aramas ra pwal pweretiu me ewe epek. Iwe, neminewe a churiir. 21 Nge Tafit a apasa me mwan, “Ellet, a fokun solap ai tümwünü mine än ewe mwän lon ewe fanüapö pwe esap pöütüla och mine an. Nge i a liwini ai öch ngeni ngau. 22 Kot epwe nieila, are üsap niela nöün Napal kewe mwän meinisin me mwen lesosor.”
23 Iwe, lupwen Apikael a küna Tafit, a müttir tötiu seni waan aas, a chapetiu lepwül o tütiu me mwen Tafit. 24 A chapetiu arun pechen Tafit o apasa, “Ai samol, ewe tipis epwe chök nonom woi. Üa tüngor ngonuk pwe kopwe mwüt ngeniei ngang noum chon angang fefin pwe üpwe kapas ngonuk. Kose mochen kopwe rongorong aloi ngang noum chon angang fefin. 25 Amwo ai samol esap nenengeni ei mwän Napal mi aramasangau. Pun wewen itan iei usun pwal manauan. Itan ei Napal wewen umwes, iei popun i a pwal umwes. Nge ngang noum chon angang fefin üsap küna noum kewe alüal ka tinireto. 26 Iwe, ai samol, ewe Samol mi Lapalap a pinei om kopwe niela chon oputom, pwal om kopwe ngeniir chappen ar föför. Mwo manauen ewe Samol mi Lapalap pwal mwo manauom, chon oputom me chokewe mi mochen afeiengauok repwe küna apwüng usun chök Napal. 27 Iei ewe lifang ngang noum chon angang üa uwato ngonuk en ai samol. Kopwe ngeni ekewe aramas mi etuk. 28 Üa tüngor ngonuk pwe kopwe amusala ai pupungau. Ewe Samol mi Lapalap epwe ngenikemi me mwirimwirum kana ewe wisen king, pun ka eäni än ewe Samol mi Lapalap maun, nge kosap föri och mi ngau lon ränin manauom meinisin. 29 Are eman epwe tapweruk o ekiekin niikela, ewe Samol mi Lapalap om we Kot epwe tümwünuk usun eman aramas a tümwünü an pisek mi fokun aüchea ngeni. Nge epwe moneela manauen chon oputom, usun eman a monei eföü fau ren eu öülül. 30 Nge lupwen ewe Samol mi Lapalap epwe apwönüetä ekewe pwon mi mürina meinisin a pwon fän itom, lupwen epwe pwal seikuketä king won Israel, 31 esap wor popun pwe kopwe lolilen ika mengiringir pokiten om kosap nimanauei chokewe resap tipis, ika pokiten om kosap ngeniir chappen ar föför. Nge lupwen ewe Samol mi Lapalap epwe afeiöchuk en ai samol, kopwe chechemeniei ngang noum chon angang fefin.”
32 Iwe, Tafit a üreni Apikael, “Üa mwareiti ewe Samol mi Lapalap ewe Koten Israel mi tinuketo ikenai pwe kopwe churiei. 33 Kopwe feiöch, pun ka mirit, ka epetiei seni tipisin nimanauei aramas, pwal seni ai üpwe ngeni aramas chappen ar föför. 34 Ewe Samol mi Lapalap a pineei seni ai mochen afeiengauok. Mwo manuen ewe Koten Israel, are kosap müttir feito o churiei, ellet esap fokun wor eman nöün Napal mwän epwe chüen manau lesosorun lesor. 35 Mürin, Tafit a angei ekewe mongö neminewe a uwato ren. Iwe, a üreni, “Kopwe feila lon imwom fän kinamwe. Üa aüselinga alom o mwütätä om tüngor.”
36 Iwe, Apikael a liwinto ren Napal. Nge Napal a föri eu kametip lon imwan usun än eman king kametip. Iwe, a pwapwa lon lelukan, pun a fokun pulas. Iei mine neminewe esap fokun apworausa ngeni och tori a ränila. 37 Nge lon ewe sosoran, lupwen a wes än Napal pulas, pwülüan we a apworausa ngeni ekei mettoch meinisin. Iwe, Napal a cheri och metekin föün ngasangasan pwe inisin a usun chök nge a mä. 38 Nge ina epwe ükükün engol rän mürin, ewe Samol mi Lapalap a nii Napal pwe a mäla.
39 Iwe, lupwen Tafit a rongorong pwe Napal a mäla, a üra, “Üa mwareiti ewe Samol mi Lapalap mi ngeni Napal chappen an turunufaseei, a pwal epetiei ngang nöün chon angang seni föför mi ngau. Ewe Samol mi Lapalap a liwini ngeni Napal liwinin an föföringau.” Mürin, Tafit a tinala pworaus ren Apikael o tüngorei pwe epwe pwülüeni. 40 Iwe, lupwen nöün Tafit kewe chon angang ra feito ren Apikael lon Karmel, ra üreni, “Tafit a tinikeemito reöm, pwe aipwe angeuk, pun a mochen pwülüenuk.” 41 Iwe, Apikael a chapetiu lepwül o apasa, “Ngang nöün chon angang fefin üa molotä pwe üpwe angang ngeni o talü pechen nöün ai samol kewe chon angang.” 42 Mürin, Apikael a müttir ütä o tötä won wan aas, nge nöün kewe limman chon angang fefin ra eti. Iwe, Apikael a tapwela mürin nöün Tafit kewe chon künö, nge Tafit a pwülüeni.
43 Lon ei fansoun Tafit a fen pwülüeni Ahinoam seni Jesreel, nge iei a pwal pwülüeni Apikael. 44 Nge Saul a angei Mikal nöün we fefin pwülüen Tafit o apwüpwülüa ngeni Palti nöün Lais we seni Kalim. 2.Sam 3.14-16

25:44: 2.Sam 3.14-16