Paipel 1.KRONIKA 27
27
Ekewe meilapen ewe mwü
27.1-34
Iwe, iei tettelin ekewe chon Israel ir mwänirelan än semer kewe cho me ekewe sounemenem won ngeröü me pükü, pwal nöür kewe meilap mi wisen angang ngeni ewe king. Iteiten eu me eu maram lon eu ier eu me eu mwich ükükün rüe me rüanüngeröü mwän ra wisen föri ar angang fän emwenien ewe sounemenem mi emweniir lon ewe maram:
Iwe, Jasopeam nöün Saptiel we mwän a wisen nemeni ewe aeuin mwich lon aeuin maram, nge iteiten chon an mwich rüe me rüanüngeröü mwän. Jasopeam eman mwirimwirin Peres, i samolun ekewe meilapen sounfiu meinisin lon aeuin maram. Totai eman mwirimwirin Ahohi a wisen nemeni eu mwich lon aruuen maram, nge Miklot ewe mi kis fan. Iteiten chon an mwich rüe me rüanüngeröü mwän. Iwe, ewe aülümanün sounemenem lon aülüngatin maram Penaia nöün ewe souasor Jehoiata. Ätei a samol, nge iteiten chon an mwich rüe me rüanüngeröü mwän. Penaia i eman me lein ekewe ilik mwän mi pwora, a pwal nemeni ekewe ilik. Nge Amisapat nöün we mwän a siwili le nemeni an we mwich. Ewe afömanün sounemenem lon arüanün maram Asael pwin Joap. Iwe, Sepatia nöün we mwän a siwili lon wisan, nge iteiten chon an mwich rüe me rüanüngeröü mwän. Ewe alimanün sounemenem lon alimuen maram Samhut eman mwirimwirin Isra, nge iteiten chon an mwich rüe me rüanüngeröü mwän. Nge ewe awonomanün sounemenem lon awonuen maram Ira nöün Ikes we mwän seni Tekoa, nge iteiten chon an mwich rüe me rüanüngeröü mwän. 10 Ewe afümanün sounemenem lon afisuen maram Heles, eman mwirimwirin Efraim seni Pelon, nge iteiten chon an mwich rüe me rüanüngeröü mwän. 11 Iwe, ewe awalumanün sounemenem lon awaluen maram Sipekai seni Husa, seni än Sera we cho, nge iteiten chon an mwich rüe me rüanüngeröü mwän. 12 Ewe atiuemanün sounemenem lon atiuen maram Apieser seni Anatot lon fanüen chon ewe ainangen Peniamin, nge iteiten chon an mwich rüe me rüanüngeröü mwän. 13 Ewe aengolun sounemenem lon aengolun maram Maharai seni än Sera we cho seni Netofa, nge iteiten chon an mwich rüe me rüanüngeröü mwän. 14 Ewe engol me emanün sounemenem lon engol me euin maram Penaia, eman mwirimwirin Efraim seni Piraton, nge iteiten chon an mwich rüe me rüanüngeröü mwän. 15 Nge ewe engol me ruomanün sounemenem lon engol me ruuen maram Heltai eman mwirimwirin Otniel seni Netofa, nge iteiten chon an mwich rüe me rüanüngeröü mwän.
16 Ikkei ir ekewe meilap mi nemeni ekewe ainangen Israel: Seni ewe ainangen Rupen Elieser nöün Sikri we mwän, seni ewe ainangen Simeon Sefatia nöün Maka we mwän, 17 seni ewe ainangen Lefi Hasapia nöün Kemuel we mwän, seni ewe familien Aaron Satok, 18 seni ewe ainangen Juta Elihu, eman me lein pwin Tafit kewe, seni ewe ainangen Isakar Omri nöün Mikael we mwän, 19 seni ewe ainangen Sepulon Ismaia nöün Opatia we mwän, seni ewe ainangen Naftali Jeremot nöün Asriel we mwän, 20 seni ewe ainangen Efraim Hosea nöün Asasia we mwän, seni ewe esopun ainangen Manasa mi nom lotou Joel nöün Petaia we mwän, 21 seni ewe esopun ainangen Manasa mi nom ötiu Ito nöün Sekaria we mwän, seni ewe ainangen Peniamin Jasiel nöün Apner we mwän, 22 nge seni ewe ainangen Tan Asarel nöün Jeroham we mwän. Ikkei ir ekewe meilapen ekewe ainangen Israel. 23 Ewe king Tafit esap angei iteiten chokewe resamwo ier rüe, pun ewe Samol mi Lapalap a pwon pwe epwe achomongala chon Israel usun chomongun ekewe fün läng. Ken 15.5; 22.17; 26.4 24 Iwe, Joap nöün Seruia we mwän a popuetä le angei iteiten chon Israel, nge esap awesala. Kot a aworato feiengau won chon Israel pokiten ei, iei mine iteiten chon Israel esap makelong lon puken uruwon ewe king Tafit. 2.Sam 24.1-15; 1.Kron 21.1-14
25 Ikkei ir ekewe meilap mi wisen tümwünü mettochun ewe king: Asmafet nöün Atiel we mwän a wisen tümwünü än ewe king lenien iseis, nge Jonatan nöün Usia we mwän a wisen tümwünü ekewe lenien iseis lon ewe fanü, lon ekewe telinimw me ekewe sop, pwal lon ekewe imw tekia. 26 Esri nöün Chelup we mwän a wisen nemeni chokewe mi angang lon ekewe tanipi, 27 Simei ewe re Rama a wisen tümwünü ekewe tanipin wain, nge Sapti ewe re Sifam a wisen tümwünü ewe lenien iseis wain. 28 Palhanan ewe re Keter a wisen tümwünü ekewe irä olif me sikamor mi nom fäsonun ekewe chuk me lotou, nge Joas a wisen tümwünü ewe lenien iseis apüra seni föün olif. 29 Sitrai ewe re Saron a wisen tümwünü ekewe pwiin kow mi nom lon ewe maasiesin Saron, nge Safat nöün Atlai we mwän a wisen tümwünü ekewe pwiin kow mi nom lon ekewe lemol. 30 Opil eman mwirimwirin Ismael a wisen tümwünü ekewe kamel, Jeteia seni Meronot a wisen tümwünü ekewe aas, nge Jasis eman mwirimwirin Hakri a wisen tümmwünü ekewe pwiin sip me kuuch. 31 Ir meinisin nöüwis mi souwani wöün ewe king Tafit.
32 Iwe, Jonatan pwin semen Tafit i eman souöüröür me eman mwän mi tipachem o silelap. I me Jehiel nöün Hakmoni we mwän ra wisen asukula nöün ewe king kewe mwän. 33 Ahitofel nöün ewe king souöüröür, nge Husai ewe re Ark chiechien ewe king. 34 Mürin än Ahitofel mäla, Jehoiata nöün Penaia we mwän me Apiatar ra siwili lon wisan. Nge Joap a sounemenemen än ewe king mwichen sounfiu.

27:23: Ken 15.5; 22.17; 26.4

27:24: 2.Sam 24.1-15; 1.Kron 21.1-14