8
La Saul 'e malate'ote'o na ta'a gila tagoto'o
1-2 Ma la Saul ka ala fafia maenga ala Stifin. Ma tani wane nga fito'onga aaga 'e tegela'a, gila nagufia ma gila ngaria nonina la Stifin, ma gila ka kwaiatoa no'o. Ma te'e gani no'ona la'u mola, nga ta'a na gila tagoto'o 'i Jerusalem gila eta 'agila ru'u no'o 'ubulana nonifiinga ba'ita 'e iiki. Ma nga ta'a no'ona te'efou gila ka tagala'i te'efou no'o fana fanua 'ubulana gule'e lefu 'i Judea ma 'i Samaria. Te'e ni Wane ni Kwairiinga na gila nana'i 'ua 'i Jerusalem.
La Saul 'e agea ni 'ola 'e iiki fana tagale'enilana nga fufu'i ta'a na gila tagoto'o. Ma ngaia ka ru'u 'ubulana 'ifi fana gemasilana ni dai na gila fito'o ala Jisas, ta'a wane ma nga ta'ageni la'u mola, ma ka aruga 'ubulana 'ifi na lokafu.
Gila foule'enia
Kwairiinga Le'a lo'oo 'i Samaria
Ma nga ta'a gila tagoto'o, gila ka tagala'i na fanua no'ona te'efou. Ma alata gila leka kau, gila ka kwaifoula'i 'ania Kwairiinga Le'a lo'oo suria la Jisas. La Filip ka leka fana te'e maa'e fanua ba'ita 'ubulana gule'e lefu 'i Samaria, ma ka kwairii 'ania la Jisas Kraes fana ta'a no'ona. Alata ta'a no'ona gila longoa nga fatalana la Filip, ma gila ka agasia la'u mola ni 'ola ni 'alefosilai na'a ngaia 'e agea, gila ka gwalongo le'a fana ni 'ola na'a la Filip ngaia 'e iiria. Ngaia 'e beloa adalo fa'asia ta'a 'e aula, ma gila ka o'omae ba'ita alata gila ru'u mai maa fa'asiga. Ma nga ta'a na'a noniga ma 'a'aega 'e mae, ngaia ka gulaga la'u mola te'efou. Ma nga ta'a 'i Samaria, gila ka aile'a ba'ita.
Ma 'ubulana fanua no'ona, te'e wane 'e nana'i la'u mola latana la Saemon, ma ka aburu no'o mai ngaia 'e fa'alefosia nga ta'a 'i Samaria 'ania taunga'inga na'a ngaia 'e agea 'ania nga rufiniwai. Ma ngaia ka iiria ngaia nga wane taringa'i 'e iiki. 10 Ma nga ta'a no'ona te'efou na fanua no'ona, nga ta'a ba'ita, ma ru'uru'ua sisita, gila ka gwaalongo, ma gila ka iiria ngaia nga wane 'e to'o na tegelangaa fa'asia God, ma gila ka fa'alataa 'ania “Tegelangaa Ba'ita.” 11 Gila leka suria 'e aburu no'o mai ngaia 'e agea taunga'inga lo'oori 'ania rufiniwai. 12 Tafe'ua na alata gila longoa la Filip ngaia 'e fata suria nga Kwairiinga Le'a suria nga foufoula ana God ma la Jisas Kraes, gila ka fito'o, ma gila ka naruabu na ta'a wane ma nga ta'ageni la'u mola. 13 La Saemon 'e tagoto'o la'u mola, ma ka naruabu. 'I burina, ngaia ka leka no'o fe'enia la Filip. Ma alata ngaia 'e agasia la Filip 'e agea ni 'ola ni 'alefosilai lo'oo, ngaia ka 'alefo ba'ita.
14 Ni Wane ni Kwairiinga na'a gila nana'i 'i Jerusalem, na alata no'ona gila longoa ta'a 'i Samaria gila tagoto'o la'u mola na nga fatalana God, gila ka kwatea la Pita fe'enia la Jon 'agala leka kau te'aga. 15 Alata gala nigi, gala fo'a fana ta'a na gila tagoto'o, fana 'agila to'o na nga Anoe 'ola Abu. 16 Gila naruabu na latana la Jisas, ma Anoe 'ola Abu 'ame sifo 'ua fafia te'efuta wane aga. 17 Sui mala Pita mala Jon, gala ka arua nima gaa'a fafiga, ma nga Anoe 'ola Abu bi'i sifo fafiga maka nana'i no'o fe'eniga.
18 Na alata no'ona, la Saemon 'e agasia Wane ni Kwairiinga gala arua nimagaa'a fafiga, ma nga Anoe 'ola Abu ka sifo no'o fafiga, ma ngaia ka ngaria bata maka siria fana kwatelai fala Pita mala Jon, 19 maka fata 'i lo'oo, “Moo'o molo kwatea la'u nga tegelangaa lo'oo fagu, fana 'aku arua nga ninimagu 'i fofona wane, ma ngaia ka to'o la'u na Anoe 'ola Abu.”
20 Tafe'ua, ma la Pita ka lamadu'aa maka fata 'ilo'oo, “Ngaia to'omia fana God 'ani tagale'eni'o fe'enia bata no'ona amu la'u mola, tofuna 'i'oo madafia iiria nga kwakwatenga na God nga 'ola mola fana forilai 'ania bata. 21 'I'oo 'ame to'omia no'o fana taunga'inga fe'eni 'ameeru, suria nga manatalamu 'ame odo 'i na'ona God. 22 'Oi bulota'i mai fa'asia fe'e manata maninga no'ona amu, ma 'i'oo ko fo'asia God fana 'i ngaia 'ani 'olafanataa amu fa'asia fe'e manata maninga lo'oo amu. 23 Du'ana nau ku agasia na'a 'i'oo kwaifii'i no'o, ma 'i'oo nana'inga 'i olofana nga tegelangaa na rianga.”
24 Tafe'ua mala Saemon ka fata 'ilo'oo fala Pita ma la Jon, “Molo fo'asia God 'ani kwaibooni agu, fana ta 'ola na ni 'ola lo'oo moo'o molo iiria sia to'o mola agu.”
25 Mai burina, la Pita fe'enia la Jon gala kwairii suria 'olataa na'a gala su'aai suria la Jisas, ma gala ka fata suria fatalana nga Alafa. Sui ma gala ka ori fani Jerusalem. Na alata gala ori, gaa'a gala ka kwairii 'ania Kwairiinga Le'a lo'oo na ma'e fanua 'e aula 'i Samaria.
La Filip fe'enia wane na'ona'o 'i Etiopia
26 Ma enselo na nga Alafa ka alafuu fala Filip maka fata 'ilo'oo, “'Oi sasari moko leka 'aisifo suria nga tala ne'e eta 'i Jerusalem maka leka fani Gasa suria tala ne'e riu 'ubulana lefu langalanga.” 27-28 Ma la Filip ka leka no'o. Ma te'e wane na'ona'o fa'asia 'i Etiopia ka leka la'u mola mai suria tala no'ona, ngaia 'e ori fana fanua aana. Nga wane no'ona, ngaia 'e aga suria nga bata na noni ne'e ba'ita fafia 'i Etiopia.* Wane na'ona'o fa'asia 'i Etiopia, ngaia nga ‘eunuch.’ Nga fa'aladamilana nga ‘eunuch’ na'a wane na gila kwari 'usia wela. 'Ubulana Tagi ala Moses wane 'ino'ona ngaia 'e sua, ma ngaia 'e sia leka mola 'ubulana 'Ifi Abu na God. Ngaia 'e to'oru mai 'i Jerusalem fana fo'osilana God, sui ma ngaia ka ori no'o 'i fanua 'ubulana nga 'ola ni lelekanga aana na'a hos ngaia 'e totola fe'enia. Ma alata ngaia 'e leka ai, ngaia 'e to'oru maka idumia nga buka ala Aesea nga profet laka'u ngaia 'e giria. 29 Sui ma Anoe 'ola Abu ka fata 'i lo'oo fala Filip, “Leka, moko nana'i galangia nga wane loko'u.” 30 Ngaia na'a la Filip ka totola no'o kau te'ana, ma ka longoa ngaia 'e idumia nga buka ala Aesea nga profet, ma ngaia ka orisia maka fata 'ilo'oo, “'I'oo su'a na nga 'ola lo'oo 'i'oo idumia?”
31 Ma nga wane na'ona'o lo'oori ka lamadu'aa maka fata 'ilo'oo, “'Ino'ona mai nau taku su'a 'utaa ai, lauta te'efuta wane 'ame fa'ananaua nau 'ania?” Ma ngaia ka soea mai la Filip, fana 'ani fane kau te'ana ma ka to'oru fe'enia. 32 Nga Girigiringa Abu na'a ngaia 'e idumia, ngaia ka fata 'ilo'oo,
“Ta'a gila talaia fana kwa'ilana,
'e 'ilaka'u no'o ta'a na gila talaia nga sifisifi fana kwa'ilana,
ma ngaia 'ame iiria no'o ta alafuunga,
ma ka 'ilaka'u no'o dale'e sifisifi na'a ngaia 'e to'oru aloalo
alata gila sufia ifiifuna.
33 Ma gila ka doo 'ania,
ma gila ka sufaa 'ania 'ola 'ame to'o.
Ma ngaia 'ame to'o na wela,
suria gila kwa'ia maka mae no'o.” Aesea 53:7,8
34 Sui ma wane na'ona'o lo'oo ka fata 'ilo'oo fala Filip, “Kwairii madi mai fagu, 'ilo'oo ma ni dai lo'oo nga profet ne'e fata suria? Ngaia 'i talana, 'amoe ma suria ta wane matari ngaa'i?” 35 Ma la Filip ka eta fana alafuunga te'ana suria nga Kwairiinga Le'a lo'oo suria la Jisas, ngaia eta na Girigiringa Abu lo'oori. 36-37 Na alata gala leka suria tala, gala ka riu toto'o fe'enia te'e me'e ka'o. Ma nga wane na'ona'o lo'oori ka fata 'ilo'oo fala Filip, “Nga ka'o lo'oo no'o welakau, naruabu no'o mai agu.” Tani girigiringa arua verse 37 'ilo'oo, “Ma la Filip ka fata 'i lo'oo fana, ‘'I'oo su'asuria 'ani 'oi naruabu no'o amu, lauta 'i'oo tagoto'o ala Jisas 'ania mangomu te'efou.’ Ngaia du'aa maka fata 'ilo'oo, ‘Kiu, nau ku tagoto'o Jisas Kraes ngaia na'a Wela na God.’ ”
38 Sui ma nga wane na'ona'o lo'oo ka iiria fana wane ni taunga'inga aana fana 'ani fa'amamaloa hos aana, ma ngaia ma la Filip gala ka sifo 'ubulana ka'o, ma la Filip ka naruabu no'o ana. 39 Na nga alata gala fane mai fa'asia 'ubulana ka'o, nga Anoe 'ola na God bi'i leka mai, ma 'afe'aferu ka lafua no'o la Filip. Ma wane na'ona'o lo'oori ngaia 'ame agasia no'o la Filip, ma ngaia ka leka no'o fe'enia nga aile'anga ba'ita. 40 Ma 'ame aburu mola ma la Filip ngaia no'o na fanua 'i Asotus, ma ka leka no'o 'i 'afu'afutana lefu fe'enia foule'enilana nga Kwairiinga Le'a lo'oo na fanua no'ona, leleka maka nigi na fanua 'i Sesarea.

*8:27-28 Wane na'ona'o fa'asia 'i Etiopia, ngaia nga ‘eunuch.’ Nga fa'aladamilana nga ‘eunuch’ na'a wane na gila kwari 'usia wela. 'Ubulana Tagi ala Moses wane 'ino'ona ngaia 'e sua, ma ngaia 'e sia leka mola 'ubulana 'Ifi Abu na God.

8:33 Aesea 53:7,8

8:36-37 Tani girigiringa arua verse 37 'ilo'oo, “Ma la Filip ka fata 'i lo'oo fana, ‘'I'oo su'asuria 'ani 'oi naruabu no'o amu, lauta 'i'oo tagoto'o ala Jisas 'ania mangomu te'efou.’ Ngaia du'aa maka fata 'ilo'oo, ‘Kiu, nau ku tagoto'o Jisas Kraes ngaia na'a Wela na God.’ ”