12
Eu manau mi fich lon ach angang ngeni Kot
12.1-12
Iei mine üa pese ngenikemi, ämi pwii kana, pokiten watten än Kot ümöümöch ngenikich, pwe oupwe fangala inisimi pwe eu asor mi manau o pin fän iten än Kot angang o i epwe pwapwa ren. Iei usun pwüngün ämi fel ngeni Kot. Ousap apirü pomwen fanüfan, nge oupwe mwüt ngeni Kot pwe epwe awilikemi o asöföla unusen letipemi. Mürin oupwe tongeni silei letipen Kot, ren met mi mürina me unusöch, pwal met mi apwapwai i.
Iwe, pokiten än Kot lifangen ümöümöch ngeniei, üpwe ürenikemi meinisin: Ousap ekiekin tipetekia seni mine a fichitikemi, nge oupwe tipetekison lon ämi ekiek o püsin apwüngükemi ngeni ewe aükükün lükülük Kot a ngenikemi. A wor chomong kifetin inisich, nge ekei kifet meinisin ra sokofesen lon en me an angang. Inamwo ika kich chomong sokun aramas, nge sia eu chök inis lon Kraist. Iwe, eman me eman leich sia chufengen usun ekewe sokopaten kifet lon eu chök inis. 1.Kor 12.12 Iei mine sipwe anganga ekewe sokopaten tufich Kot a lifang ngenikich lon aükükün an ümöümöch. Are eman a tufichin afalafala än Kot we kapas, epwe föri won aükükün ewe lükülük a eäni. Are eman a tufichin angang lon mwichefel, epwe angang, are eman a tufichin asukul, epwe asukul. Are eman a tufichin apöchöküla letipen aramas, epwe föri iei usun. Iö a eäni ewe tufichin alisi aramas, epwe föri seni unusen letipan, iö a eäni ewe tufichin nemenem, epwe achocho le angang, iö a wor ren ewe tufichin eäni kirikiröch ngeni aramas, epwe föri fän pwapwan letipan. 1.Kor 12.4-11
Ämi chen epwe fokun wenechar. Oupwe oput mine a ngau o kamwöchünük won mine a mürina. 10 Tongen pwipwi lon Kraist epwe pwichikar lefilemi. Oupwe fokun asamolufengenikemi lefilemi. 11 Oupwe achocho le angang, nge ousap chipwang. Oupwe angang ngeni ewe Samol ren unusen letipemi. 12 Oupwe pwapwa lon ämi apilükülüköch, oupwe mosonotam lon ämi riaföü, oupwe iotek fansoun meinisin. 13 Oupwe alisi pwimi kewe souläng mi osupwang, oupwe etiwaöchü ekewe wasöla.
14 Oupwe tüngor ngeni Kot pwe epwe afeiöchü chokewe mi ariaföüükemi. Ewer, oupwe tüngor ngeni pwe epwe afeiöchüür, nge esap afeiengauer. Mat 5.44; Luk 6.28 15 Oupwe eti chokewe mi pwapwa le pwapwa, nge oupwe eti chokewe mi kechü le kechü. 16 Oupwe tipeeufengen lefilemi. Ousap lamalamtekia, nge oupwe tipeni le föri angang mi tekisoson. Ousap ekieki pwe oua tipachem. SalF 3.7
17 Are eman a föri mi ngau ngenikemi, ousap liwini ngeni lon föför mi ngau. Oupwe achocho le föri mine a öch ngeni aramas meinisin. 18 Oupwe föri mine oupwe kinamwefengen me aramas meinisin ren ükükün ämi tongeni. 19 Ämi pwii kana, ousap liwini ngeni eman chappen an föför, nge oupwe mwüt ngeni Kot epwe föri. Pun a mak lon ewe Toropwe mi Pin, “Ngang üpwe ngeniir chappen ar föför, üpwe liwini ngeniir ükükün liwinin ar föför mi ngau, iei alon ewe Samol.” Tut 32.35 20 Nge iei oupwe föri usun mine a mak lon ekewe Toropwe mi Pin, “Are chon oputom a echik, kopwe amongöü, nge are a kaka, kopwe aünü, pun are kopwe föri iei usun, säw epwe küri usun ekkei a kürikich.” SalF 25.21-22 21 Kosap mwüt ngeni ngau epwe akufuk, nge kopwe akufu met mi ngau ren om föföröch.

12:5: 1.Kor 12.12

12:8: 1.Kor 12.4-11

12:14: Mat 5.44; Luk 6.28

12:16: SalF 3.7

12:19: Tut 32.35

12:20: SalF 25.21-22